Noe Nombila Onene Otyili, Hanoñgano ko
OKUTI ove uhanda okukala mouye omuwa, wokuna ovanthu vakala nombembwa na vakuavo? Ouye uhena ovita, noungangala nokumoneswa ononkhumbi? Inkha uhanda, mopamekwa nehipululo limue ove wii nawa. Ehipululo olio, o lia Noe. Noe wali omunthu wondalawa, watungile owato omunene omu oe nombunga yae vayovokele etyi ombila onene yaipaele onondingavivi ambuho.
Omahipululo eiwe nawa mouye auho, kaehi. Ehipululo lietyi tyapitile kononthiki mba Noe, livasiwa Mombimbiliya mokapitulu 6 ka Gênesis alo ka 9. Tupu, liapitululwa okuhipululwa momukanda utiwa Alcorão, no monoñgano mbuhipululwa novanthu ouye auho. Okuti kualokele umue tyili Ombila Onene, ine onoñgano vala opo ovanthu valinge etyi tyaviuka? Ononkhalamutue mbonongeleya novanongo mouye, vehole okulipatana unene konthele yepulo olio momanima omanyingi. Anthi, Ombimbiliya Ondaka ya Huku, ityiyandyulula nawa, okuti ehipululo olio, otyili hanoñgano ko. Nkhele tala:
Omukanda wa Genesis utupopila enima, nohanyi, nonthiki Ombila Onene yahimbika okuloka. Utupopila opi owato wapumphamene etyi omeva apuinina kombanda yoohi. Tupu, itulekesa oñgeni owato watungilue, na apa ankho ulifwe, nevi vaundapesile pala okutunga owato oo. Mahi, onoñgano kambupopi ovipuka viotyili.
Omahipululo evali Ombimbiliya apopia onthuko yonombunga, alekesa okuti Noe ankho omunthu waliko tyotyili. (1 Crônicas 1:4; Lucas 3:36) Esdra na Luka, vokuahoneka konthele yonthuko oyo, ankho vaovolele nawa okunoñgonoka oñgeni tyaendele. Luka walekesa okuti Jesus Kristu watukile kombunga ya Noe.
Ovauli Isaia na Ezekiele, no no apostolu Paulu na Petulu, navo vapopia konthele ya Noe no Yombila Onene.—Isaías 54:9; Ezequiel 14:14, 20; Hebreus 11:7; 1 Pedro 3:19, 20; 2 Pedro 2:5.
Jesus Kristu wapopile konthele Yombila Onene, ati: “Ngetyi tyaendele kononthiki mba Noe, otyo matyikakala pononthiki mbo Mona womulume. Ovanthu ankho valia, vanwa, ovalume vanepa, iya ovakai vanepwa, alo onthiki Noe anyingila mowato, iya ombila onene aivekomboko aivenyimiko aveho.” (Lucas 17:26, 27) Inkha Ombila Onene kayalokele, tupu etyi Jesus apopia konthele “yononthiki mbo Mona womulume” hatyili ko.
Apostolu Petulu wapopile okuti makukeya ovanthu “vomukuele” mavakatomba etyi Ombimbiliya ipopia. Petulu wahoneka “konthele yomapeleyo avo” okuti, “valimbuako otyili tyokuti . . . ouye wo kononthiki mba [Noe], wahanyauninweko nomeva ombila onene.” Okuti nonthue tuetyilimbwa “otyili otyo”? Au! Petulu wayauisako okuti: “Eulu no ohi vikahiko hono, viapakelwa otupia, nonthiki yekoyeso no yehanyauko liovanthu vehei Huku.”—2 Pedro 3:3-7.
Huku mahanyaunako vali onondingavivi. Mahi, tupu makukahupa vali ovanthu. Inkha tuhetekela etyi tyalingile Noe, matukakala pokati kovaviuki mavayovolwa pala okunyingila mouye omuwa.