Omapulo Ekuana Akumbululwa Konthele Yonthyulilo

JESUS KRISTU wapopia konthele yonthiki ‘yonthyulilo maikeya’ komutwe. Oe wapopia konthele yomuvo oo okuti: “Makukakala ononkhumbi mbumwe ononene, mbuheneendeko tunde konthyimbi youye alo pahe. Tupu, kamambukaendako otyikando tyavali.”—Mateus 24:14, 21.

Etyi Jesus apopia konthele yonthyulilo, kumwe no notestu ononkhuavo Mbombimbiliya mbupopia konthele oyo, tyikatula omapulo omanyingi akolela. Oityi uhaikulila Ombimbiliya yove, otale oñgeni ikumbulula omapulo oo?

1 Oityi Matyikanyimako?

Ombimbiliya kailongesa okuti oohi maikahanyuako. Omuhoneki wono salmu wahoneka okuti: “[Huku] watunga oohi pomphangu yaviuka nawa. Kamaitengaiswa, omuvo uhapu ine apeho, apeho.” (Salmo 104:5) Tupu, Ombimbiliya kailongesa okuti aviho vina omuenyo pano pohi mavikanyimuako nehanyu malikaenda mouye auho. (Isaías 45:18) Jesus walekesa okuti ovanthu vamwe mavakahupa konthyulilo. (Mateus 24:21, 22) Mahi, oityi Ombimbiliya ipopia, okuti matyikanyimako?

Outumino wovanthu maukapwa. Huku watumine omuuli Daniele okuhoneka okuti: “Huku yo keulu makavialeka ouhamba umwe uhakahanyuako vali. Ouhamba oo kamaukapita pomaoko elongo ekuavo. Maukahanyaunako omautumini atyo aeho nokuenyimako. Iya ouhamba watyo oo, ngao ukakalako apeho.”—Daniel 2:44.

Ovita nokusilisa omphepo mavikapwa. O Salmo 46:9 yapopia konthele yetyi Huku makalinga, okuti: “Huku makamanako ovita alo kuna kuaoyela oohi. Uhanya ononkhondyi nokutetateta omaonga. Omatemba ovita wepaka otupia.” Ombimbiliya tupu ilongesa okuti Huku ‘makahanyako vana vahanyauna oohi.’—Revelação [Apocalipse]11:18.

Oungangala novipuka vihaviukile mavikanyimako. Ondaka ya Huku ilaa okuti: “Ovaviuki mavakakala kombanda yoohi, iya vana vahavelwa onombei mavakatualako okukala kombanda yoohi. Anthi, onondingavivi mavakanyimuako kombanda yoohi, iya onongangala mavakatukuluako keheke.”a—Provérbios 2:21, 22.

2 Onalupi Onthyulilo Maiya?

Jeova Huku “momuwo wanakua” makaeta onthyulilo yonondingavivi nokupakako outumini Wouhamba wae. (Marcos 13:33) Mahi Ombimbiliya itupopila nokuayandyuluka okuti katupondola okuvalula onalupi onthyulilo oyo maiya. Jesus wati: “Konthele yonthiki oyo no ola yatyo, nawike utyii, tyilinge onoandyu keulu, tyilinge Omona, o Tate vala utyii.” (Mateus 24:36) Jesus novalongwa vae vapopile onkhalelo patyi maikakala kombanda yoohi tyina Huku eheneete onthyulilo. Tyina ovipuka mavipopiwa pombuelo viamamoneka aviho momuwo wike ouye auho, onthyulilo ikahi popepi.

Opulitika, nesiliso liomphepo, novilwa pokati kovanthu, vikahi nokumoneka unene monkhalelo ihenemonwe novanthu. Opo akumbulule epulo liovalongwa konthele yonthyulilo, Jesus wati: “Otyilongo matyikatukila otyilongo otyikuavo novita, iya ouhamba maukatulila ouhamba omukuavo ovita. Konofika mbumwe makukaenda ovinimawe, nondyala. Ovipuka ovio aviho, onthyimbi vala yonongembia.” (Marcos 13:8) Apostolu Paulu wahoneka okuti: “Kononthiki mbahulililako, makukeya omuvo wokuepuiya. Ovanthu mavakakala vokulihole ovo muene, vokuhole onombongo, vokulipanda, vomalityindailo, vehena onthilo na Huku, vehetavela kovohe novoina, vehena olupandu, ononkhembi. Vehena oluembia, vokuna omphata, vokutendeleya, vehetyivili okulikondola omutima, ovakalavi, no kuhehole otyiwa. Ovapakuli, vomphata, vokuna omalityindailo, vehole vali ovitalukiso tyipona Huku. Velilekesa ngatyina vena onthilo na Huku, mahi kavayeke ondaka ya Huku ihongolele omuenyo wavo.”—2 Timóteo 3:1-5.

Okuivisa onondaka onongwa momalaka omanyingi ouye auho tyenda no komutwe. Jesus wati: “Iya onondaka ombu onongwa mbouhamba wa Huku, mambukaiviswa kombanda yoohi aiho, pala oumbangi movilongo aviho, konyima onthyulilo aiya.”—Mateus 24:14.

3 Konyima Yonthyulilo Oityi Matyilandulako?

Ombimbiliya kailongesa okuti ovanthu aveho onondalawa mavapolwa pano pohi avakakala apeho nehambu keulu. Anthi, Jesus walongesa okuti ehando lia Huku liotete konthele yovanthu malikafuisuapo. Jesus wati: “Vomutima wapoleya ovana-mbembwa, mokonda mavakapiñgana oohi.” (Mateus 5:5; 6:9, 10) Vana vokuankhia etyi onthyulilo iheneye, Ombimbiliya ilaa okuti mavakatutila. (Jó 14:14, 15; João 5:28, 29) Konyima yonthyulilo oityi matyikalandulako?

Jesus makatumina Mouhamba wa Huku keulu. Omuuli Daniele wahoneka okuti: “Ame natualako okutala momamonekelo ange o kounthiki, iya andyimono omunthu, ukahi ngomona womulume [omututiliswa Jesus] uya nomakaka o keulu. Oe eya Pomukulu Wononthiki, [Jeova Huku] avemuhikiya ponthele Yae. Iya oe [Jesus] apewa outumini, nounene, nouhamba, opo ovanthu aveho, novilongo, nomalaka vemuumbile. Outumini wae, maukatualako apeho, kamaukapwa, iya ouhamba wae, kamaukanyonwa.”—Daniel 7:13, 14; Lucas 1:31, 32; João 3:13-16.

Vana mavakatuminwa Nouhamba wa Huku mavakakala nekongoko, nepameko nomuenyo wahapu. Omuuli Isaia wahoneka okuti: “Mavakatunga onondyuo avakalamo, mavakatuika omiti avakalia ovinyango viatyo. Kavakatunga iya mukuavo ngae ukakalamo, kamavakatuika iya mukuavo ngae ukalia. Mokonda ononthiki mbelongo liange mambukakala ngononthiki mbomuti, iya ovanthu aveho mavakalinga ovilinga viveetela ehambu liotyotyili. Kamavalingi ovilinga tyihapoloko esilivilo, kamavakatyita pala ononkhumbi, mokonda ovo novana vano vapewa ononkhano onongwa na Jeova.” (Isaías 65:21-23) Apostolu João wahoneka konthele yomuvo oo okuti: “Ekaka lia Huku likahi pokati kovanthu, iya oe makakala navo, ovo mavakakala ovanthu vae. Iya Huku muene makakala navo. Huku makasekuna ononkhuka momaiho avo, ononkhia, okulila, no nongembia kamavikakalako vali. Mokonda ovipuka ovio aviho mavikalamba.”—Revelação 21:3, 4.

4 Oityi Una Okulinga Opo Ukahupe Konthyulilo?

Apostolu Petulu ankho utyii okuti, vamwe mavakakala nomuenyo mokueenda kuomuwo wonthyulilo, mavakatomba olusoke lwa Huku luokuti makaeta onthyulilo youye, novivi pano pohi. (2 Pedro 3:3, 4) Petulu, alo umwe walondola vokuna omuenyo hono opo valinge etyi matyilandulako.

Lilongesila komahipululo etyi tyaendeleko. Petulu wahoneka okuti: Huku “kelityilikile okuhitisa ouye wokohale, mahi, ahupisa Noe, omuivisi wouviuki, kumwe novanthu epanduvali, etyi aeta ombila onene mouye wovanthu onondingavivi.” (2 Pedro 2:5) Konthele ya vana valinga omukuele, Petulu wati: “Mokonda yehando liavo, kavanoñgonokele otyili tyokuti tunde kohale mokonda yondaka ya Huku kuali eulu, noohi yatumbuluka kohi yomeva, aikala pokati komeva. Iya moluotyo, ouye wo kononthiki ombo, auhanyaunwako nomeva ombila onene. Mahi, nondaka yatyo oyo, eulu noohib vikahiko hono, viapakwa pala otupia, nonthiki yekoyeso no yehanyauko liovanthu onondingavivi.”—2 Pedro 3:5-7.

Endela movitumino via Huku konthele yovituwa. Petulu wahoneka okuti vana vahanda okukahupa konthyulilo youye uno, mavakaovola okukala ‘novituwa viasukuka nokulinga ovilinga vilekesa onthilo na Huku.’ (2 Pedro 3:11) Tala okuti Petulu watoneka okupopia “ovituwa viasukuka novilinga vilekesa onthilo na Huku.” Anthi, otyo hakupopia vala okuti ndyina ekolelo, ine okuovola okulinga oviwa mominutu yahulililako opo upandwe na Huku.

Ovituwa patyi novilinga Huku apanda? Omokonda yatyi uhaelekela otyo, netyi Ombimbiliya ilongesa? Onombangi mba Jeova vena ehambu liokukuatesako. Veita vekulekese Mombimbililya yove oityi ipopia konthele yomapulo oo. Okulinga ngotyo matyikukuatesako, okutala komutwe nomutima wakola, nonthumbi, namphila mouye omu mumoneka ovipuka vitilisa owoma.

[Onondaka Poutoi]

[Ehangununo liolutalatu pefo 7]

Oohi kamaihanyuako, mahi vokunyona oohi ovo mavahanyaunuako