Onombangi mba Jeova Vetavela ku Jesus?

OKUTAVELA KU JESUS TYAKOLELA

Antonio: Oñgeni, Tim. Nahambukwa etyi tuelivasa vali.

Tim: Vaketu, naama nahambukwa.

Antonio: Nekuetela omikanda omipe Omutala Womulavi no Despertai!. Ndyitavela okuti mohambukwa okutala omikanda evi.

Tim: Napandula. Nahambukwa etyi weya vali mokonda ndyina etyi nahanda okukupula.

Antonio: Oo, oityi?

Tim: Nthiki imwe natompholele na umwe tuundapa nae. Napopia nae konthele yomikanda vimwe ove wamphele noñgeni omikanda ovio omiwa. Mahi wati kahande okutanga omikanda vio Nombangi mba Jeova mokonda kavetavela ku Jesus. Otyo otyili? Andyimupopila okuti mandyikupulu ove tyina tuamelivasi.

Antonio: Vaketu, nahambukwa etyi wamphula. Walinga nawa wapula Kombangi ya Jeova. Mahi nkhele ndyikupule, opo unoñgonoke etyi omunthu etavela tyaviuka okupula kwe muene ine okomunthu omukuavo?

Tim: Naame otyo nasoka.

Antonio: Tyilityili, Onombangi mba Jeova vetala ku Jesus. Onthwe tutavela okuti okukala nekolelo mu Jesus tyesukisa pala eyovo.

Tim: Ame ndyitavela okuti otyo otyili, mahi etyi una tuundapa nae amphopila okuti onwe kamutavela ku Jesus, tyandyetela olumbwe. Ame ndyisoka okuti nalumwe tuapopile konthele yotyo.

Antonio: Ndyipondola okukulekesa onoversikulu mbumwe Mombimbiliya mbupopia esilivilo liokukala nekolelo mu Jesus? Ombo onoversikulu Onombangi mba Jeova vaundapesa unene tyina vaivisa.

Tim: Ewa.

Antonio: Otyiwa okuhimbika nonondaka mba Jesus muene mbukahi mu João 14:6. Ombu onondaka, mbumwe mbetompho Jesus akalele nalio nono apostolu mbae. Tutangamo okuti: “Jesus evepopila okuti: ‘Ame ndyila, ame tyili, ame muenyo. Nawike uya ku Tate ahapiti puame.’” Ngetyi tyapopia oversikulu ei, oipi ondyila ike yokuhika ku Tate?

Tim: O Jesus.

Antonio: Tyaviuka. Iya Onombangi mba Jeova otyo vetyitavela nawa. Nkhele eta ndyikupule: Ngetyi ove wanoñgonoka ovitumino via Huku konthele yelikuambelo, omenyina lia lie ovanthu vena okulikuambela?

Tim: Omenyina lia Jesus.

Antonio: Iyaa. Omalikuambelo aeho, alingwa menyina lia Jesus. Onombangi mba Jeova naavo omalikuambelo avo otyo alingwa.

Tim: Otyo otyiwa okutyinoñgonoka.

Antonio: Otestu onkhuavo tupondola okutanga o João 3:16. Oversikulu oyo yakolela unene alo umwe ihole okuihanwa okuti o Evandyeliu onthutu. Otyo okuti, inkha ukongolola ovipuka aviho viahonekwa konthele yetyi Jesus alinga etyi ekahi pano pohi, omuenyo wae, nokuivisa, ovipake moversikulu ike, o João 3:16. Okuti upondola okutanga otestu ei?

Tim: Ewa. Yati: “Mokonda Huku una oluembia olunene novanthu, waava Omona wae wongunga, opo kese omunthu ukala nekolelo mwe ahakanyimueko, mahi akakale nomuenyo uhapu.”

Antonio: Napandula. Oversikulu ei wii nawa?

Tim: Enga, ndyii, mokapela kange ipopiwa unene.

Antonio: Tyotyili yankhimana unene. Okutala nawa oversikulu oyo, tumona etyi Jesus ati mokonda yoluembia lwa Huku ovanthu mavakamona omuenyo uhapu​—mahi otyina vala tulinga tyi?

Tim: Tukala nekolelo.

Antonio: Enga. Haunene okukala nekolelo Momona wae wongunga, Jesus Kristu. Iya ngotyo, ekolelo mu Jesus liikula ondyila pala omuenyo uhapu, ngetyi tyalekeswa apa pefo 2 liomukanda nekuetela. Okutanga etyi Omutala Womulavi walingilua tuvasapo onondaka mbati “ulunda ovanthu okukala nekolelo mu Jesus Kristu una wankhia opo tukamone omuenyo uhapu pahe walinga Ohamba Youhamba wa Huku.”

Tim: Yoo, pahe netyimona. Mokonda tyahonekwa momukanda wenyi tyilekesa okuti Onombangi mba Jeova vetavela ku Jesus.

Antonio: Otyo yatyo.

Tim: Ngotyo, oityi ovanthu vapopila okuti Onombangi mba Jeova kavetavela ku Jesus?

Antonio: Tyipondola pena omahunga omanyingi ovanthu vapopila ngotyo. Pamwe, vapopia ngotyo mokonda yokuiva vala etyi vakuavo vapopia. Ine tyipondola valongeswa monkhalelo yapenga novalongesi vavo.

Tim: Ame ndyikahi nokusoka okuti hamwe ovanthu vapopia ngotyo mokonda muliihana okuti Munombangi mba Jeova, kamu Nombangi mba Jesus.

Antonio: Tupu tyipondola hamwe.

Tim: Oityi onwe mupopila unene konthele ya Jeova?

“AME NDYIVENOÑGONOKESA ENYINA LIOVE”

Antonio: Kuna otyipuka tyimwe tyakolela onthwe tuundapesila enyina lia Huku, Jeova, tulinga ngetyi Omona wae Jesus alingile. Tala etyi Jesus apopia etyi elikuambela ku Tate yae. Tyikahi mu João 17:26. Okuti upondola okuitanga?

Tim: Yoo, “Ame, mandyitualako okuvenoñgonokesa enyina liove, opo ohole una naame, nayo ikale muvo iya naame ndyikale navo.”

Antonio: Vaketu. Tala okuti Jesus wati ndyivenoñgonokesa enyina liove. Mokusoka kuove, oityi alingila ngotyo?

Tim: Humm. Ame hityii.

Antonio: Tupondola okutala otestu onkhuavo opo tupoleko ounongo. Otestu ame nasoka o Atos 2:21 tutangamo okuti: “Kese munthu wihana enyina lia Jeova makayovolwa.” Tala, nekulekesa opo ukale tyityi okuti okuihana enuyina lia Jeova otyitumino pala eyovo, tyotyili Jesus otyitumino otyo, ankho utyii nawa.

Tim: Enga, otyo otyili.

Antonio: Ngotyo olio ehunga limwe lilekesa omokonda yatyi ku Jesus ankho tyakolela atolele ovalanduli vae vanoñgonoke nokutumbula enyina lia Huku. Iya olio o limwe pomahunga alekesa omokonda yatyi tupopila unene enyina lia Jeova. Onthwe tusoka okuti tyakolela tunoñgonokese ovanthu enyina lia Huku, natyivekuatesako navo vapopie enyina olio.

Tim: Mahi alo umwe inkha kavei enyina lia Huku ine okulitumbula, nongotyo vetyii olie vekahi nokupopia nae tyina vapopia konthele ya Huku.

Antonio: Otyo hamwe otyili. Mahi, Huku mokuetupopila enyina liae tyitukuatesako okufuena kwe.

Tim: Otyo okutiwi?

Antonio: Nkhele soka kuetyi: Onthwe ñgeno, katuanonoñgonokele enyina lia Moisesi. Ankho tupondola vala okuti omulume watetele pokati omaande Elunga Enkhuhu ine omulume wapelwe Ovitumino Ekwi. Na Noe, omokonda yatyi twii enyina liae? Ankho tupondola vala okuti omulume watungile Owato ayovola ombunga yae novinyama. Tupu, alo umwe Jesus Kristu ankho tupondola vala okuti omunthu umwe watundile keulu ankhila ononkhali mbetu. Hatyili?

Tim: Otyo yatyo.

Antonio: Mahi Huku wetunoñgonokesa omanyina ovanthu ovo. Okunoñgonoka omanyina ovanthu ovo tyitukuatesako okuimbuka okuti etyi valinga otyotyili. Namphila nalumwe tuamuene Moisesi, na Noe ine o Jesus, okunoñgonoka omanyina ovanthu ovo tyitukuatesako okuti valiko.

Tim: Ame nalumwe nasokele ngotyo, mahi tyaviuka!

Antonio: Olio, olio ehunga ekuavo onombangi mba Jeova vatumbulila unene enyina lia Huku. Tuhanda okukuatesako ovanthu vapameke ekolelo liavo mu Jeova Huku, vanoñgonoke okuti Omunthu wotyotyili vapondola okulinga nae oupanga. Pamwe tupopia unene otyilinga tya Jesus pala eyovo lietu. Tupondola okutanga vali otestu onkhuavo ityilekesa nawa.

Tim: Tyitavela.

Antonio: Tete tuatanga João 14:6. Hinangela etyi Jesus aihanwa okuti “ondyila, otyili, omuenyo.” Tukondoke nkhele konoversiku mbumwe atutale onondaka mbae mu João 14:1. Okuti upondola okutanga etyi apopia konthyulilo yo versikulu?

Tim: Iya. Yati: “Kalei nekolelo mu Huku, tupu kalei nekolelo muame.”

Antonio: Napandula. Ove hamwe upondola okulipula okuti, ekolelo liotyotyili okutavela ku Jesus ine oku Jeova?

Tim: Au. Jesus wati tuesukisa aveho vevali.

Antonio: Otyo tyaviuka. Ame ndyityii okuti ove utavela okuti katyituuka okuti vala ndyina ekolelo mu Huku nomu Jesus. Tyotyili, tusukisa okutyinda omuenyo monkhalelo yelikuata netyi tutavela.

Tim: Yoo.

Antonio: Mahi oñgeni omunthu alekesa okuti tyotyili una ekolelo mu Huku nomu Jesus? Tupondola okupopia epulo olio monthiki onkhuavo.a

Tim: Tyikahi nawa.