Okulikuambela Tyipondola Okukuetela-Tyi

Putyina nkhele uhenehimbike okulinga otyipuka tyimwe, ove upondola okulipula okuti, ‘Ouwa patyi mandyipolo-ko?’ Okuti okupula ngotyo konthele yelikuambelo, elungavi? Au. Onthue tuhanda okunoñgonoka inkha matyituetela ouwa. Alo umwe Jobe ankho omulume wekolelo, lumwe wapulile okuti: “Inkha nemuihanene, okuti ñgeno wankhumbulula?”—Jó 9:16.

Mononthele mbatetekela, tuamona nawa okuti okulikuambela hatyiso vala tyonongeleya ine olusoke vala luvelula. Huku yotyotyili, utehelela umwe tyili omalikuambelo. Inkha tulikuambela monkhalelo yaviuka, nokuita ovipuka viaviuka, Huku metutehelela. Oe utuihana opo tufuene kwe. (Tiago 4:8) Ngotyo, oityi tukevelela inkha tutualako okulikuambela apeho momuenyo wetu? Tutalei ouwa umwe tyituetela.

Ombembwa momutima.

Tyina uvasiwa novitateka momuenyo wove, okuti ulitehelela okuti walemenua notyiho? Ombimbiliya ituavela ondundo “yokutualako okulikuambela,” pomivo ngovio, “nokupopila Huku etyi tuesukisa.” (1 Tessalonicenses 5:17; Filipenses 4:6) Ombimbiliya itulaa okuti inkha tufuena ku Huku nomalikuambelo, “ombembwa ya Huku, ipona onondunge nomalusoke aeho, maiyungu omitima [vietu] nomalusoke [etu].” (Filipenses 4:7) Tupondola okuvasa ehambu limwe enene, inkha tuuyulila Tate yetu keulu omasukalalo etu. Tyotyili, Huku utulunda opo tutyilinge. Wati: “Pakula omulemo wove ku Jeova, iya oe mekuvatela. Kamayeke omuviuki atengaulwe.”—Salmo 55:22.

Ovanthu ovanyingi mouye auho, vena ombembwa oyo. Hee Ran, ukala Kokumbili kwo Koreia, wati: “Na tyina pamwe ndyina ovitateka ovinene, tyina namelikuambela konthele yavio, ndyilitehelela okuti omulemo watepuluka, ndyina ononkhono mbokukoleleya.” Cecilia, wo ko Filipina, wati: “Ankho ndyisukalala unene novana vange, na me yange uhetyivili vali okundyimbuka. Mahi mokonda yokulikuambela, ndyityivila okulamba onthiki aiho tyihasukalalele unene. Ndyityii okuti Jeova mankhuatesako okuvetekula.”

Eungumaneso nepameko tyina ulambela movitateka.

Okuti ove una ovitateka ovinene, hamwe viepuiya unene? Okulikuambela ku “Huku weungumaneso aliho,” tyipondola okukukuatesako unene. Ombimbiliya ipopia okuti Huku, “utuungumanesa mononkhumbi mbetu ambuho.” (2 Coríntios 1:3, 4) Mongeleka, onthiki imwe etyi Jesus ankho aihamenwa unene, “waikilile konongolo ahimbika okulikuambela.” Atyimuetela tyi? “Oandyu imwe aimumonekela iya aimupameka.” (Lucas 22:41, 43) Omulume omukuavo wekolelo Neemia, wamonesilwe ononkhumbi novanthu onondingavivi, ankho vahanda ayekepo okulinga ovilinga via Huku. Elikuambela okuti: “Pahe, ndyilikuambela okuti pameka omavoko ange.” Ovipuka viaendele-po vilekesa okuti Huku tyotyili wemukuatesileko okufinda owoma wae, etyivili okufuisapo ovilinga via Huku. (Neemias 6:9-16) Reginald wo ko Gana, wapopia ongeleka yae melikuambelo okuti: “Tyina ndyilikuambela, haunene pomivo viovitateka ovinene, omutima wange utula, mokonda napopila ovitateka viange omunthu upondola okunkhuatesako, tupu uhanda nahakale nowoma.” Tyotyili, Huku upondola okutupameka inkha tulikuambela kwe.

Ounongo utunda ku Huku.

Omatokolo amwe tulinga, apondola okupilulula unene omuenyo wetu ine wa vana tuhole. Oñgeni matuholovona nounongo? Ombimbiliya yati: “Inkha umwe pokati kenyi wakamba ounongo, atualeko okuita ku Huku, oe meupewa, mokonda Huku wavela aveho otyali, ahakandukila.” (Tiago 1:5) Inkha tulikuambela okuita ounongo, Huku metuavela ospilitu sandu yae, opo itukuateseko okulinga omatokolo nounongo. Tyotyili, tupondola okuita ospilitu sandu, mokonda Jesus wetulaa okuti: “Tate keulu, maavela ononkhono mbae vana vemuita!”—Lucas 11:13

Alo umwe Jesus wesukisile okuita ku Tate yae opo emukuateseko, pokulinga omatokolo akolela. Ombimbiliya itupopila okuti pokuholovona ovalongwa 12, opo vakale ono apostolu mbae, “watuaileko okulikuambela ku Huku otyinthiki atyiho.”—Lucas 6:12.

Nga Jesus, ovanyingi hono kavasukalala vali unene, tyina vaimbuka onkhalelo Huku evekumbulula tyina vaita opo evekuateseko okulinga omatokolo nounongo. Regina ko Filipina, wapopia ovitateka ovinyingi alamba navio, ngokulitekula oe muene nombunga yae, etyi omulume wae anyima, iya movilinga viae apolwa-mo, atyimupuiya unene okutekula ovana vae. Oityi tyemuvatelele okulinga omatokolo nounongo? Oe wati: “Ame andyilikuambela ku Jeova opo ankhuateseko.” Kwabena wo ko Gana, upopia oityi aitila Huku opo emukuateseko. Wati: “Ame napolwa movilinga viange ankho ndyifetwa nawa, viokutunga onondyuo.” Pokusoka komatokolo malingi, wati: “Andyilikuambela apeho ku Jeova opo ankhuateseko okulinga etokolo liaviuka.” Tupu wati: “Naimbuka okuti Jeova wankhuatesako okuholovona ovilinga mavipameka ekolelo liange, nokumpha etyi nesukisa opo ndyilitekule.” Nove Huku mekuhongolela, inkha ulikuambela konthele yovipuka vipondola okutyika oupanga wove nae.

Tuapopia vala ovipuka vihehi vilekesa oityi okulikuambela tyipondola okukuetela. (Tala onongeleka ononkhuavo mokakasa kati: “Ouwa Utunda Kokulikuambela.”) Mahi opo upoleko ouwa, ove wesukisa okunoñgonoka Huku netyi ahanda. Inkha etyi otyo uhanda, tukuavela ondundo yokuita ko Nombangi mba Jeova, opo vekukuateseko okulilongesa Ombimbiliya.a Otyo, tyipondola okukala onthyimbi yokufuena ko “Muteheleli womalikuambelo.”—Salmo 65:2.