Epulo Limwe Lingwangwanesa

OVANTHU vasoka ovipuka vielikalaila konthele yomuenyo no nonkhia. Vamwe vasoka okuti tyina vamankhi, mavatualako nomuenyo komphangu onkhuavo. Ovakuavo vasoka okuti mavatyitwa otyivali avakala nomuenyo welikalela. Iya nkhele ovakuavo vasoka okuti ononkhia onthyulilo ya atyiho.

Katyisukisa opi ukala, nove tyipondola una etyi usoka konthele yotyo. Mokonda ovanthu mouye auho vasoka mononkhalelo mbelikalaila konthele yononkhia, okuti, pena omunthu ine omphangu tupondola okuvasa ekumbululo liotyotyili konthele yepulo olio lingwa-ngwanesa?

Mokueenda kuomanima omanyingi, ononkhalamutwe mbonongeleya mbuhole okulongesa okuti omunthu una ohande yahankhi. Ovanthu ovanyingi veli monongeleya ombo ngetyi: Ovakristau, no va Hindu, no va Judaismo, no va Musulumanu, novakuavo vali, vetavela okuti omunthu una ohande yahankhi. Vapopia okuti, tyina omunthu amankhi ohande yae itualako nomuenyo komphangu onkhuavo. Tupu, ova Budista vetavela okuti, ovanthu ovanyingi vatyitwa otyivali kononkhono mbukahi mokati komunthu alo akakala momphangu vaihana okuti Nirvana.

Namphila kuna omalongeso omanyingi, mahi ovanthu ovanyingi mouye auho vetavela okuti ononkhia mbuikula ondyila pala omuenyo mouye omukuavo. Ku vamwe, ononkhia onthambo imwe yakolela unene momuenyo, iya kuvo ononkhia mbulinga onthele yehando lia Huku. Mahi, oityi Ombimbiliya ipopia konthele yotyo? Mbambavo tanga onthele ilandulako. Ekumbululo lipondola okukuhuvisa.