Okuti Utyihinangela?

Okuti welilongesa Omutala Womulavi wa Janeiro atee wa Dezembro wenima lino? Ine welilongesa-o, tala ine utyivila okukumbulula omapulo aa:

Ovipuka patyi tuna okulinga “tupilulule omalusoke etu”? (Loma 12:2)

Hakulinga vala ovilinga oviwa, mahi tuna okulitala umwe nawa etyi tukahi momutima, atuyeke-po evi viehekahi nawa opo tutyivile okulandula ovitumino vya Huku. — w23.01, pefo 8-9.

Oñgeni matukala nonondunge mbupumphi nawa, tyina tutala evi vimoneka mouye?

Onthwe tusuka nokunoñgonoka oñgeni ovipuka vili nokumoneka mouye vifwisapo etyi tyapopilwe m’Ombimbiliya. Mahi katufwanyeka ovipuka, mokonda tyipondola vala okutuyapaula, tulandula vala etyi tupopilwa neongano lya Siovaa. (1 Kol. 1:10) — w23.02, pefo 16.

Okutyi ombatisimu ya Sesusi yelikalela no yovalanduli vae?

Sesusi ankho kesukisile-ale nokulipakula ku Siovaa, mokonda ngwe watyitwa movanthu ankho vatiwa velipakula-le ku Huku. Sesusi ankho kesukisile okulivela nokwiita ku Huku opo emwevele, mokonda ankho omunthu wehena onkhali. — w23.03, pefo 5.

Oityi tuna okulinga tukwateseko vakwetu navo vaave omakumbululo momaliongiyo?

Tyimwe tuna okulinga, okwahapopi unene tyina twaava omakumbululo opo na vakwetu vapopie-po-vo. Na tyina wapopia onondaka mbehehi, wahatie okakwata pweetyi okakwata pweetyi, ovikwavo visila-po vakwenyi. — w23.04, pefo 23.

“Ondyila Yokwasukuka” yapopiwa mu Isaiya 35:8, ondyila patyi?

Po tete, ondyila oyo yali ondyila yova Sundaa pokutunda ko Mbambilonia okwenda no kotyilongo tyavo. Ya pahe hono ipopia-tyi? Otyilinga tyokusukula ondyila, tyahimbika pweetyi enima lyo 1919 liehenehike-po. Momanima atyo omo, kwali ovanthu vapitiyile Ombimbiliya momalaka omakwavo ovanthu vapopia, kwalingilwe ovipuka ovikwavo vali pokusukula ondyila. Ovanthu va Huku, veli umwe nokupolesa-po “Ondyila Yokwasukuka” ivetwala mombembwa vena-yo pehepano meongano, no koviwa Ouhamba wa Huku maukaeta. — w23.05, pefo 15-19.

Ovakai vevali vapopiwa momukanda Omihe 9 vetulongesa-tyi?

Momukanda Omihe mwapopiwa omukai omuhima, mahi ava vemutavela tyivetwala “kondyembo.” Tupu mwapopia “ounongo wotyotyili” waelekwa nomukai, ava aihana vemutavela venda “mondyila yekungunyiko,” ondyila yomwenyo. (Omih. 9:1, 6, 13, 18) — w23.06, pefo 22-24.

Oityi tutila pweetyi Huku apopile na Lote tyamoneka umwe nawa okuti ulikondola koututu, wapepuka omutima?

Siovaa wapopilile Lote mo Sondoma atunde-mo, ataulile kohika yonomphunda. Mahi etyi Lote ati hahe ndyende no ko Sowale, Siovaa emutavela. — w23.07, pefo 21.

Oityi omukai ena okulinga ine omulume wae utala evi viasila?

Una okunoñgonoka okuti haeko uvelwa onombei. Una okulipaka mweevi mavipameka oupanga wae na Siovaa, nokusoka kovakai vamwe vapopiwa m’Ombimbiliya navo veihamenenwe unene, mahi etyi velikwambela ku Siovaa, avapame umwe omutima. Tupu una okukwatesako omulume wae eliyunge kweevi vipondola okumulingisisa. — w23.08, pefo 14-17.

Tyina tupulwa evi tutavela, oñgeni okupunga nawa ovipuka tyitukwatesako atupopi nomapole?

Tyina twamapulwa, tutyitalei ngatyina uti omphitilo yokunoñgonoka evi omunthu asoka, neevi esuka navio. Ine otyo tulinga ngootyo, matutyivili okukumbulula nomapole. — w23.09, pefo 17.

Oityi tulilongesila ku Maliya tyiyemba kokupola ononkhono mu vakwetu?

Etyi Maliya atiwa malingi mee Mesiya, wapolele ononkhono mu vakwavo. Tyati oandyu Ngambiliyeli, o Elisabete, pokupameka Maliya vapopile onondaka mbatunda ku Huku. Noonthwe tupondola umwe okupola ononkhono mu vakwetu tufenda navo. — w23.10, pefo 15.

Oityi Siovaa alinga etwaavele etyi twaita melikwambelo?

Siovaa wati metwiivi tyina tulikwambela kwe, atale kweetyi twaita, asoko komphango ena-yo. (Sele. 29:12) Ovanthu vapondola okwiita otyipuka tyike, Siovaa pokuvekumbulula, atyiti ou wemukumbulula ñgaa, ou wemukumbulula ñgaa, mahi apeho metukwatesako. — w23.11, pefo 21-22.

Omukanda Ova Loma 5:2 upopia ‘okukevelela,’ omokonda yatyi ondaka oyo okukevelela yawanenwa vali movelesikulu 4?

Tyina omunthu amapopilwa oviwa ovipe etavela, makevela okukala nehambu mouye omupe. Putyina akondya novitateka akoleleya, etyimono umwe okuti Huku umuhole, mapamena umwe vali nawa mweevi akevelela. — w23.12, pefo 12-13.