Oñgeni Mandyivasi Ongeleya Yotyotyili?
Ekumbululo Lyo Mbimbiliya
Ombimbiliya itupopila oñgeni tupondola okuimbuka ongeleya yotyotyili. Yati: “Onwe mamuveimbukila kovipuka valinga. Okuti mupondola okunyanga ono uva komikete, ine okunyanga omahipwa komankhondo?” (Mateusi 7:16) Ngetyi tupondola okuimbuka okuti onouva mbelikalela nomahipwa, tupu tupondola okuimbuka okuti ongeleya yotyotyili yelikalela nonongeleya mbomatutu. Otyo tutyiimbukila kovipuka evi:
Ongeleya yotyotyili ilongesa otyili tyivasiwa mo Mbimbiliya, kailongesa oviso viovanthu. (Suau 4:24; 17:17) Mondongeso oyo muakutikinya otyili konthele yohande, nekevelelo liomuenyo wahapu mouye omupe pano pohi. (Salmo 37:29; Isaías 35:5, 6; Ezequiel 18:4) Ongeleya yotyotyili tupu ihololola omatutu alongeswa monongeleya. — Mateusi 15:9; 23:27, 28.
Ongeleya yotyotyili ikuatesako vanthu okunoñgonoka Huku, iya tyakutikinya okuvelongesa enyina liae, Siovaa. (Salmo 83:18; Isaías 42:8; Suau 17:3, 6) Ongeleya yotyotyili kailongesa okuti Huku keko ine kesukile novanthu. Mahi ilongesa okuti Huku uhanda tukale omapanga ae. — Tiaku 4:8.
Ongeleya yotyotyili ilongesa okuti ovanthu mavakayovolwa vala pokati ka Seusi Kilisitu. (Ovilinga 4:10, 12) Ovalanduli va Sesusi vetavela ovitumino viae tupu valinga ononkhono mbokumuhetekela. — Suau 13:15; 15:14.
Ongeleya yotyotyili ilongesa okuti Ouhamba wa Huku oo vala maukamanako ovitateka viovanthu. Ovafendi vongeleya yotyotyili, vaivisa nombili Ouhamba. — Mateusi 10:7; 24:14.
Ongeleya yotyotyili ikuatesako ovanthu okukala noluembia navakuavo. (Suau 13:35) Ikuatesako ovanthu momihoko aviho, okukala nonthilo navakuavo. (Ovilinga 10:34, 35) Mokonda yoluembia, ovalanduli va Sesusi kavelipake movilwa. — Miquéias 4:3; 1 Suau 3:11, 12.
Ongeleya yotyotyili itupu omalombe afetwa, tupu kayavela omanyina omunkhima ovanthu vekahi komutwe. — Mateusi 23:8-12; 1 Petulu 5:2, 3.
Ongeleya yotyotyili kailipake mopulitika. (Suau 17:16; 18:36) Mahi, ovanthu vongeleya yotyotyili vena onthilo nokutavela ovatumini votyilongo vakala. Vetavela etyi Ombimbiliya yapopia okuti: “Fetei ku Sesale ovipuka vya Sesale, [tyilekesa ovatumini] mahi ovipuka vya Huku, viavelei Huku.” Avahuvu nonondaka mbae” — Maluku 12:17; Ova Loma 13:1, 2.
Ovanthu vongeleya yotyotyili vatyinda umwe omuenyo welikuata netyi valongesa kavalingi ngatyi otyiso ine okupopia vala. Vetavela ovitumino aviho vikahi mo Mbimbiliya. (Ova Efesu 5:3-5; 1 Suau 3:18) Namphila vaendela nawa muetyi Ombimbiliya ipopia mahi vena ehambu tyina vafenda “Huku wehambu.” — 1 Timotiu 1:11.
Vana ankho mavaendela mongeleya yotyotyili mavakala ovanthu vehehi. (Mateusi 7:13, 14) Ovalanduli vongeleya yotyotyili vayalwa nokumoneswa ononkhumbi nokupenyua mokonda yokulinga etyi Huku ahanda. — Mateusi 5:10-12.
Ongeleya yotyotyili hakuti vala ‘ongeleya ame ndyihanda’
Tupondola okulipaka motyiponga ankho tuholovona ongeleya okusoka vala okuti itukalesa nawa. Ombimbiliya yapopia okuti ankho mapehiki omuwo umwe makukala ovalongesi ovanyingi “opo vevenyualaleke momakutwi.” (2 Timotiu 4:3) Tupu Ombimbiliya itulunda tulandule “ongeleya yotyotyili yasukuka ihena esilo komaiho a Huku yetu Tate,” alo tyina ovanthu vamwe kavetyitavela. — Tiaku 1:27; Suau 15:18, 19.