EBIBUUZO AHA BY’OMU BAIBULI NIBIGARUKWAMU
Ni baahi abaraaze omu iguru, kandi n’ahabw’enki?
Abantu baingi munonga nibateekateeka ngu nibaija kuza omu iguru ku baraafe. Yesu akagira ngu entumwa ze abeesigwa bakaba nibaija kuza omu iguru. Atakafiire, akaraganisa kubatebeekanisiza omwanya omu iguru owa Ishe.—Shoma Yohaana 14:2.
Ahabw’enki abantu barikwija kuzoorwa bakatunga amagara agatahwaho omu iguru? Nibaija kukorayo ki? Yesu akagambira entumwa ze ngu bakaba nibaija kuba abagabe. N’ahabw’ekyo, nibaija kutegyeka ensi.—Shoma Luka 22:28-30; Okushuuruurwa 5:10.
Mbwenu shi abarungi boona nibaza omu iguru?
Omu mahanga maingi, abantu bakye nibo barikutegyeka. Obu Yesu arikuzoora abantu kuza omu iguru kutegyeka ensi, abo abarikutooranwa bashemereire kuba bari bakye. (Luka 12:32) Baibuli neeyoreka omubaro gw’abo abaraategyeke na Yesu.—Shoma Okushuuruurwa 14:1.
Yesu atebeekanisiize bamwe aha bakuratsi be emyanya omu iguru. Noomanya eki baraakoreyo?
Abo abarikuza omu iguru tibo bonka abaraatungye amagara agatahwaho. N’abo abu Yesu araategyekye omu nsi eraabe ehindwirwe paradiso, nibaija kugatunga. (Yohaana 3:16) Abamwe nibaija kuhonokaho batungye amagara agatahwaho omu Paradiso, ensi egi ku eraacwekyerezibwe. Kandi abandi nibaija kugatunga baaheza kuzooka.—Shoma Zaaburi 37:29; Yohaana 5:28, 29.