EBIBUUZO AHA BY’OMU BAIBULI NIBIGARUKWAMU

Ahabw’enki Kristo naija kugaruka?

Yesu atakagarukire mu iguru omu gwa 33, akaraganisa ngu akaba naija kugaruka. Akeegyeragyeranisa n’Omunyiginya owagiire omu nsi ya hare kuheebwa obugabe ngu bwanyima agarukye kutegyeka. Ekigyendererwa ky’okwija kwa Yesu n’okureetera abantu obutegyeki burungi.​—Shoma Luka 19:11, 12.

Yesu naija kugaruka aine mubiri gwa muringo ki? Akazoorwa aine omubiri gw’omwoyo atarikubaasa kureebwa. (1 Petero 3:18) Akagaruka omu iguru kandi yaashutama aha mukono gwa buryo ogwa Ruhanga. (Zaaburi 110:1) Bwanyima, akaija omu maisho ga Yehova Ruhanga, ‘Omukuru owa iranaira,’ owaahaire Yesu obushoboorozi bw’okutegyeka abantu boona. N’ahabw’ekyo, Yesu ku araagarukye naija kuba atarikureebwa.​—Shoma Danieli 7:13, 14.

Yesu naija kukora ki ku araagaruke?

Yesu ku araagarukye hamwe na baamaraika be, naija kucwera abantu orubanja. Naija kucwekyereza abantu ababi kwonka abarikumwikiriza nk’Omugabe naija kubaha amagara agatahwaho.​—Shoma Matayo 25:31-33, 46.

Yesu ku araategyeke nk’Omugabe naija kuhindura ensi ebe Paradiso. Naija kuzoora abaafiire bashemerererwe amagara omu Paradiso.​—Shoma Luka 23:42, 43.