Abaheereza ba Yehova Nibanga Obubi

1. Niki ekirikutwara omwanya gw’omutaano omu kuramya kwaitu?

OMU bicweka bingi omu nsi, eiziina Yehova nirikira kuba rihandiikirwe aha byombeko nari aha bintu ebirikuba biri omu maju g’ebya ira. Ku oraabe orareebireho bimwe aha bintu ebyo noobaasa kuba waatangaire. Ahabw’okugira ngu turi Abajurizi ba Yehova, eiziina eryo ni rikuru omu kuramya kwaitu. Omu nsi yoona, tihariho bandi abarikumanya ebirikukwata aha iziina eryo okutukira. Kwonka okwetererwa eiziina eryo n’obujunaanizibwa bw’amaani.

2. Okwetererwa eiziina rya Ruhanga nikitwariramu ki?

² Okukoresa eiziina rya Ruhanga ekyo kyonka tikirikureetera Ruhanga kutusiima. Tushemereire kukora ebirikuhikaana n’emitindo ye erikukwata aha micwe. Niyo nshonga ahabw’enki Baibuli neeyoreka ngu abaheereza ba Yehova baine ‘kureka ebibi.’ (Zab. 34:14) Entumwa Paulo akakyoreka gye obu yaagira ati: “Omuntu weena orikugamba eiziina rya Mukama arugye omu bubi.” (Shoma 2 Timoseo 2:19.) Nitumanywa ahabw’okugamba aha iziina rya Ruhanga, ahabw’okugira ngu turi Abajurizi be. Kwonka shi obubi twine kubwanga tuta?

YETANTARE OBUBI

3, 4. Ni kyahandiikirwe ki ekitwire nikishemeza abarikucondooza aha by’omu Baibuli, kandi n’ahabw’enki?

³ Teekateeka aha bukomooko bw’ebigambo bya Paulo ebiri omu 2 Timoseo 2:19. Ebigambo ebyo nibikwata aha ‘musingi gwa Ruhanga oguhamire’ kandi bigamba n’aha butumwa obuhandiikirweho. Obutumwa bw’okubanza oburikugira ngu, “Mukama naamanya abe,” nibujuriza ebiri omu Okubara 16:5. (Reeba ekicweka ekihweire.) Obutumwa obwa kabiri oburikugira ngu, “omuntu weena orikugamba eiziina rya Mukama arugye omu bubi,” butwire nibushemeza abarikucondooza aha by’omu Baibuli. Ahabw’enki?

⁴ Ebigambo ebi Paulo yaakoreise nibyoreka ngu akaba aine ahu yaabaire naajuriza. Kwonka tihariho bigambo omu Byahandiikirwe eby’Oruheburaayo ebirikuhikaana n’ebi Paulo yaahandiikire byenyine. Mbwenu shi Paulo akaba naihirira ahari ki obu yaagira ati: “Omuntu weena orikugamba eiziina rya Mukama arugye omu bubi”? Paulo atakagambire ebigambo ebyo, akajuriza ebiri omu Okubara eshuura 16, ebirikukwata aha bugomi bwa Koora. Mbwenu shi ebiri omu butumwa obwa kabiri nabyo nibikwata aha bugomi obwo?

5-7. Ni bintu ki ebyabaireho omu bunaku bwa Musa ebirikworeka eki Paulo yaabaire naamanyisa obu yaahandiikire ebiri 2 Timoseo 2:19? (Reeba ekishushani aha kutandika.)

⁵ Baibuli neegira ngu Dasani na Abiraamu batabani ba Eliabu, bakashagika Koora barikwebembera abaabaire nibahakanisa Musa na Arooni. (Kub. 16:1-5) Bakakyoreka butunu ngu tibarikuha Musa ekitiinisa kandi baayanga kworobera obushoboorozi bwe obu yaahairwe Yehova. Abagomi abo bakagumizamu barikutuura hamwe n’abaheereza ba Yehova, barikuteeraho kushiisha omukago gw’abantu abo abeesigwa hamwe na Ruhanga waabo. Obunaku ku bwahikire Yehova kworeka entaaniso ahagati y’abaheereza be abeesigwa n’abagomi, akabaha ekiragiro.

⁶ Ekyahandiikirwe nikigira kiti: “MUKAMA yaagira Musa ati: Gambira abantu oti: Mwimukye, murugye aha mahema g’aba Koora, Dasani na Abiraamu. Musa yaimuka, yaaza owa Dasani na Abiraamu; abakuru b’Abaisraeli baagyenda bamukuratiire. Yaagambira omutwe gwona ati: Nimbeeshengyereza, murugye aha mahema g’aba bantu babi, kandi mutagira ekintu kyabo kyona eki mwakoraho, mutakaacwekyerezibwa nabo omu kifubiro ky’ebibi byabo. Abantu nikwo kwimuka, bakaruga aha mbaju zoona ez’amahema g’aba Koora, Dasani na Abiraamu.” (Kub. 16:23-27) Bwanyima, Yehova akacwekyereza boona abaabaire baagomire. Kwonka abo abaagumire bari abeesigwa kandi bakanga obubi, bakarindwa.

⁷ Yehova naareeba ebiri omu mitima! Naareeba obwesigwa bwabo abarikumuramya. Kwonka nabwo, abaheereza be abeesigwa bakaba baine kugira eki baakora barikwetanisa aha bagomi. Hatariho kubanganisa, Paulo akaba naagamba aha biri omu Okubara 16:5, 23-27 obu yaahandiika ati: “Omuntu weena orikugamba eiziina rya Mukama arugye omu bubi.” Okuhendera okwo nikuhikaana n’ebi Paulo yaagambire arikugira ngu “Mukama naamanya abe.”​—2 Tim. 2:19.

“EMPAKA Z’OBUSHEMA EZITAINE BURYO OZEETANTARE”

8. Ahabw’enki okugamba aha iziina rya Yehova nari okuba omu kibiina Ekikristaayo kitarikumara?

⁸ Obu Paulo yaagamba aha byabaireho omu bunaku bwa Musa, akaba naijutsya Timoseo ngu aine kugira eki yaakora kubaasa kurinda omukago gwe na Yehova. Okuba omu kibiina Ekikristaayo ekyo kyonka tikirikumara nk’oku kyabaire kitarikumara kugamba eiziina rya Yehova omu bunaku bwa Musa. Abaheereza abeesigwa bashemereire kucwamu kwanga obubi. Eki kikakwata kita ahari Timoseo? Kandi abaheereza ba Yehova obunaku obu nibabaasa kwegyera ki aha bigambo ebi Paulo yaahandiikire arikuhwerwa omwoyo gurikwera?

9. “Okuhakana aha bigambo okutaine mugasho” kukakwata kuta aha kibiina Ekikristaayo omu kyasha ky’okubanza?

⁹ Ekigambo kya Ruhanga nikiha obuhabuzi oburikukwata aha bubi obu Abakristaayo bashemereire kwanga nari kwetantara. Nk’eky’okureeberaho, ebyetoroire 2 Timoseo 2:19, nibyoreka ngu Paulo akaba naagambira Timoseo kwetantara “okuhakana aha bigambo okutaine mugasho” hamwe ‘n’okuregyeta.’ (Shoma 2 Timoseo 2:14, 16, 23.) Bamwe omu kibiina bakaba nibeegyesa enyegyesa z’abo abaabaire beehagwire aha mazima. Kandi, nikireebeka ngu abandi bakaba nibareetaho emiteekateekyere etarikushushana erikureeta empaka. N’obu ebiteekateeko byabo ebimwe biraabe byabaire bitarikuhenda emisingye y’ebyahandiikirwe, kwonka bikaba nibireetaho okwebaganisamu. Bikaba nibireetaho okwetomboita n’okuteera empaka, ekyabaire kireetaho embeera etari nungi omu kibiina. N’ahabw’ekyo, Paulo akahamisiriza enshonga arikugira ngu “okuhakana aha bigambo okutaine mugasho” kushemereire kwetantarwa.

10. Twine kutwaza tuta abeehagwire aha mazima baayenda ngu tugaaniire nabo?

¹⁰ Obunaku obu, omu bibiina by’Abajurizi ba Yehova tiharikukira kuba harimu abeehagwire aha mazima. Kwonka nabwo, twashanga enyegyesa ezitarikuruga omu byahandiikirwe, tushemereire kuzeetantara kandi tukazangira kimwe. Nikiba kitari ky’obwengye kwejumba omu kuteera empaka n’abeehagwire aha mazima yaaba twababugana butunu, kugarukamu obutumwa bwabo, nari omuringo gwona ogw’okuhurizana. Nangwa n’obu twakuba twine ekigyendererwa ky’okubahwera, okugaaniira nabo omu muringo nk’ogwo nikiba kitarikuhikaana n’obuhabuzi bw’Ebyahandiikirwe obu twaheza kushwijuma. Omu mwanya gw’ekyo, ahabw’okugira ngu turi Abajurizi ba Yehova, nitwetantarira kimwe abarikwehagura aha mazima.

11. Niki ekirikubaasa kureetaho “okuhakana aha bigambo okutaine mugasho,” kandi abareeberezi nibataho bata eky’okureeberaho kirungi?

¹¹ Kwonka hariho ebintu ebindi, oyihireho okwehagura aha mazima ebirikubaasa kushiisha obusingye omu kibiina. Nk’eky’okureeberaho, okutashushanisa miteekateekyere aha by’okweshemeza nikibaasa kureetaho “okuhakana aha bigambo okutaine mugasho.” Buzima, omuntu weena yaaba naayejumba omu by’okweshemeza ebitarikuhikaana n’emisingye ya Yehova, abareeberezi tibashemereire kwikiriza emitwarize nk’egyo omu kibiina. (Zab. 11:5; Efe. 5:3-5) Kwonka, abareeberezi bashemereire kwetantara okwebembeza emiteekateekyere yaabo. Bashemereire kuhamira aha buhabuzi oburi omu Byahandiikirwe oburikuheebwa Abakristaayo abareeberezi: “Muriise gye obusyo bwa Ruhanga, obu mwakwatsiibwe, . . . murekye kutegyekyesa eikama obusyo obu mwakwatsiibwe, kureka mube eky’okureeberaho aharibwo.”​—1 Pet. 5:2, 3; shoma 2 Abakorinso 1:24.

12, 13. (a) Abajurizi ba Yehova baine miteekateekyere ki aha kutoorana eby’okweshemeza, kandi ni misingye ki ya Baibuli ei barikugyenderaho? (b) Emisingye erikugambwaho omu kacweka 12 neekwata eta aha nshonga ezi buri omwe aine kwecweramu?

¹² Aha bikwatiraine n’eby’okweshemeza, ekibiina tikirikutugambira zaavidiyo, ebitabo, ebyeshongoro, n’emizaano y’ahari kompyuta ebi tushemereire kwetantara. Ahabw’enki? Baibuli neehiga buri omwe kutendeka okubaasa kwe okw’okwetegyereza kutaanisa ekibi n’ekirungi. (Heb. 5:14) Ebyahandiikirwe nibyoreka emisingye ei Omukristaayo arikubaasa kukoresa yaaba naatoorana eby’okweshemeza. Omu buri kimwe eki turikukora, ekigyendererwa kyaitu kishemereire kuba okuteeraho ‘kwetegyereza ebirikusiimwa Mukama.’ (Efe. 5:10) Kurugiirira ahari Baibuli, emitwe y’amaka baine obushoboorozi buringaniire, n’ahabw’ekyo, nibabaasa kucwamu kutaikiriza eby’okweshemeza ebimwe omu maka gaabo.a​—1 Kor. 11:3; Efe. 6:1-4.

¹³ Emisingye ya Baibuli eyaagambwaho aharuguru terikukwata aha kutoorana eby’okweshemeza byonka. Hariho ebindi ebirikubaasa kureetaho okutaikirizana nk’eby’okujwara, okweboneza, eby’obujanjabi, eby’okurya, n’ebintu ebindi. Kandi haaba hatariho misingye ya Baibuli ehenzirwe, abaheereza ba Yehova nibateeraho kwetantara kuteera empaka aha nshonga nk’ezo ahabw’okugira ngu “omuhuuku wa Mukama tashemereire kuba entongani, kureka orikutwaza gye ahari boona.”​—2 Tim. 2:24.

YETANTARE EMIKAGO MIBI

14. Ni ky’okureeberaho ki eki Paulo yaakoreise kworeka ngu ni kikuru kwetantara emikago mibi?

¹⁴ Ni mu muringo ki ogundi ogu abo ‘abarikugamba aha iziina rya Mukama’ barikwanga obubi? Okwetantara kukwatanisa n’abantu abarikukora ebibi. Paulo akakuratanisa eky’okureeberaho ‘ky’omusingi gwa Ruhanga oguhamire’ n’eky’okureeberaho ekindi. Akahandiika aha “nyaruju” erimu ebintu ‘by’ezaabu n’efeeza n’eby’ebiti n’eby’eibumba; ebimwe nibikoresibwa emirimo y’ekitiinisa, ebindi erikugaywa.’ (2 Tim. 2:20, 21) Bwanyima akahiga Abakristaayo ‘kwetaanisa’ aha bintu byona ebirikukoresibwa ‘emirimo erikugaywa.’

15, 16. Niki eki turikwegyera aha ky’okureeberaho ky’enju mpango?

¹⁵ Eky’okureeberaho eki kiine makuru ki? Paulo akagyeragyeranisa ekibiina Ekikristaayo hamwe n’enju mpango, kandi ab’eishe-emwe omu kibiina nk’ebintu ebirikukoresibwa omu nju. Ebintu ebirikukoresibwa omu nju nibibaasa kusiisikara ahabw’oburofa. Ebintu ebirofa, nyineeka naabaasa kubishoroora abiihe omu bicumire gye.

¹⁶ Nikyo kimwe, abaheereza ba Yehova obunaku obu abarikuteeraho kuba abeecumi omu mitwarize, bashemereire kwetantara kukwatanisa nari kugira omukago n’abantu omu kibiina abatarikworobera misingye ya Yehova. (Shoma 1 Abakorinso 15:33.) Eki kyaba nikwo kiri aha bari omu kibiina, nituba tushemereire kwetantarira kimwe abari aheeru y’ekibiina, ahabw’okugira ngu baingi omuri bo ‘n’abakunzi b’empiiha, abarikugomera abazaire, abatarikwera, abarikubeihererana, enshaarizi, abarikwanga ebirungi, abarikureebyana, kandi abarikukunda kweshemeza bonka okukira Ruhanga’!​—2 Tim. 3:1-5.

YEHOVA NAATUHA EMIGISHA TWACWAMU GYE

17. Abaisraeli abeesigwa bakatwaza bata aha bikwatiraine n’okwangira kimwe okutahikiirira?

¹⁷ Yehova ku yaahaire ekiragiro ngu “murugye aha mahema g’aba Koora, Dasani na Abiraamu,” Abaisraeli abeesigwa ‘bakagarugamu’ ahonaaho. (Kub. 16:24, 27) Tibarayeziringire nari kubanza baategyereza. Ekyahandiikirwe nikyoreka oku baayorobeire gye ekiragiro ekyo. ‘Bakaruga aha mbaju zoona.’ Abantu abeesigwa bakaba batarikwenda kweta omu kabi. Bakoorobera ekiragiro ekyo n’omutima gwabo gwona batarikubanganisa. Bakaguma bari abeesigwa ahari Yehova kandi baayangira kimwe okutahikiirira. Niki eki turikubaasa kwegyera aha ky’okureeberaho eki?

18. Paulo akaba naamanyisa ki obu yaayehanangiriza Timoseo kwetantara “okwetenga okubi kw’obutsigazi”?

¹⁸ Twaba nituteeraho kurinda omukago gwaitu na Yehova, tushemereire kucwamu kugira eki twakoraho ahonaaho. Nikyo Paulo yaabaire naamanyisa obu yaayehanangiriza Timoseo kwetantara “okwetenga okubi kw’obutsigazi.” (2 Tim. 2:22) Obu Timoseo yaatunga obuhabuzi obwo akaba ari omushaija mukuru, aine emyaka nka 30. Kwonka “okwetenga okubi kw’obutsigazi” tikurikurugiirira aha myaka. Timoseo ku yaakugizire okwetenga nk’okwo, akaba ashemereire kukwetantarira kimwe. Omu muringo ogundi, nitubaasa kugira ngu Timoseo akaba aine kwangira kimwe okutahikiirira. Yesu nawe akagamba aha nshonga niyo emwe obu yaagira ati: ‘Eriisho ryawe ku riraakureetere kukora ekibi, oriihemu orinagye hare.’ (Mat. 18:9) Obunaku obu, Abakristaayo abarikuta omutima aha buhabuzi obu, nibacwamu ahonaaho kukora ekihikire baayeshanga omu mbeera egumire.

19. Bamwe bacwiremu kukora ki kubaasa kuguma baine omukago murungi na Ruhanga?

¹⁹ Bamwe abaabaire bari abasinzi batakabaire Bajurizi ba Yehova, bacwiremu kwetantarira kimwe amaarwa batarikunywaho na kakye. Abamwe nibeetantara eby’okweshemeza ebimwe ebitari bibi kwonka ebirikubaasa kubareetera kugira ebyetengo bibi. (Zab. 101:3) Nk’eky’okureeberaho, ow’eishe-emwe omwe atakabaire Mujurizi wa Yehova, akaba naakunda kuza aha magyenyi agaabaire garimu okuzina okurikuhemurana. Kwonka bwanyima y’okwega amazima, akacwamu kwetantarira kimwe amagyenyi nk’ago, nangwa n’okuza aha bugyenyi bw’Abajurizi ba Yehova, ahabw’okuba akaba naakimanya ngu nikibaasa kumureetera kugira ebyetengo bibi ebi yaabaire aine enyima. N’amazima ngu Abakristaayo tibarikuragiirwa kwetantarira kimwe amaarwa, okuzina, nari ebintu ebindi ebitari bibi. Kwonka, twena tushemereire kuteeraho kugira eki twakora ahonaaho kubaasa kwerinda ekintu kyona ekirikubaasa kushiisha omukago gwaitu na Ruhanga.

20. N’obu kiraabe kitoorobi kwetantara obubi, niki ekirikutuhuumuriza?

²⁰ Okwetererwa eiziina rya Ruhanga n’obujunaanizibwa. Twine kwangira kimwe ekibi kandi tukaruga omu bubi. (Zab. 34:14) N’amazima ngu okukora ekyo tikyorobi. Ka nikitugaruramu amaani kumanya ngu Yehova naakunda “abe,” abo abarikworobera emisingye ye ey’okuhikiirira.​—2 Tim. 2:19; shoma 2 Obusingye 16:9a.