N’oha Owaakozire Ruhanga?

Teera akashushani ishe abaana naagamba n’omutabani w’emyaka mushanju. Naagira ati: “Kuruga, iranaira, Ruhanga akahanga ensi n’ebigirimu byona, kandi yaakora eizooba, okwezi, n’enyonyoozi.” Omwojo akiteekateekaho kumara akaire reero amubuuza ati: “Tata, n’oha owaakozire Ruhanga?”

Ishe amugarukamu ngu “tihaine owaakozire Ruhanga.” “We atuuraho.” Eky’okugarukamu kigufu ekyo nikimara omwana omu kaanya ako. Kwonka yaaguma naakura, naaguma atamazirwe n’eky’okugarukamu ky’ekibuuzo kye. Naagumirwa kwetegyereza oku omuntu arikubaasa kubaho ataine butandikiro. Ahabw’enki, ensi yo eine obutandikiro. We ‘Ruhanga akaruga nkahi?’

Baibuli neegarukamu eta? Eki erikugarukamu nikyenda kushushana n’eki omuzaire yaagarukiremu omwana we omu ky’okureeberaho. Musa akahandiika ati: ‘Yehova, ebibungo bitakabaireho, otakahangire nsi n’ebirimu byona, okwiha obusingye bwona n’okuhitsya obusingye bwona niiwe Ruhanga.’ (Zaaburi 90:1, 2) Nabi Isaaya akagira ati: ‘Torikumanya? Tokahuriraga? [Yehova] ni Ruhanga otahwaho’! (Isaaya 40:28) Nikyo kimwe, Yuda akagamba ahari Ruhanga otuuraho ‘ebiro byona.’—Yuda 25.

Ebyahandiikirwe ebyo nibyoreka ngu Ruhanga n’Omugabe ‘otarikuhwaho,’ nk’oku entumwa Paulo yaamuhandiikireho. (1 Timoseo 1:17) Eki nikimanyisa ngu Ruhanga atwireho, n’obu twakuteeraho kureeba obwire bw’enyima kirikwingana ki. Kandi naija kugumaho n’ebiro byona eby’omumaisho. (Okushuuruurwa 1:8) N’ahabw’ekyo, okubaho kwe nikimureetera kuba ow’Obushoboorozi Bwona.

Ahabw’enki enshoboorora egyo neetugumira kwetegyereza? N’ahabw’okugira ngu amagara gaitu magufu nigaturemesa kwetegyereza obwire nk’oku Yehova arikubwetegyereza. Ahabw’okugira ngu Ruhanga tarikuhwaho, ahariwe emyaka rukumi ni nk’ekiro kimwe. (2 Petero 3:8) Nk’eky’okureeberaho: Oruseenene orurikumara ebiro 50 byonka, nirubaasa kwetegyereza okuhangaara kw’abantu abarikumara emyaka 70 nari 80? Ngaaha buzima! Kwonka, Baibuli neeshoboorora ngu turi nk’enseenene waatugyeragyeranisa n’Omuhangi Orikukirayo. Nangwa n’okubaasa kwaitu kwine obugarukiro. (Isaaya 40:22; 55:8, 9) N’ahabw’ekyo tikirikutangaaza kushanga ngu abantu tibarikubaasa kwetegyereza omu bwijwire okubaho kwa Yehova.

N’obu kiraabe kigumire kwetegyereza ngu Ruhanga tarikuhwaho, kwonka nitureeba ngu nikikora amakuru. Ku ogire ngu haine owaakozire Ruhanga, omuntu ogwo niwe yaakubaire Omuhangi. Kwonka, nk’oku Baibuli erikushoboorora, Yehova niwe yaahangire ebintu byona. (Okushuuruurwa 4:11) Kandi, nitumanya ngu haine obu ensi egi yaabaire etariho. (Okutandika 1:1, 2) Ekabaho eta? Nikimanyisa owaagihangire akaba kuba ariho. Kandi akaba ariho hataine kintu ekindi kyona ekyabaireho, otwariiremu Omwana we omwe nyamunegyere na baamaraika. (Yobu 38:4, 7; Abakorinso 1:15) Buzima, akaba ariho wenka. Tarahangirwe, tihaine kintu kyona ekyabaire kiriho ekyamuhangire.

Okubaho kwaitu n’ensi yoona nikituhamiza ngu hariho Ruhanga otarikuhwaho ebiro n’ebiro. Owaahangire y’ensi yaitu mpango erikugumaho, owaataireho ebiragiro ebirikugitegyeka, aine kuba yaabaire obutwire bwona. Niwe yaahaire buri kimwe amagara.—Yobu 33:4.