Obukama Bwa Ruhanga Nibwija Kukugasira Buta?

Omu bicweka eby’enyima noobaasa kuba waayetegyereza ngu Abajurizi ba Yehova nibatwara Obukama nka bukuru. Obundi noobaasa kuba waashemererwa munonga ahabw’emigisha erikugambwaho ei Obukama bwa Ruhanga buraareete. Kandi obundi, noobaasa kwebuuza yaaba ebi Ruhanga yaaraganiise buzima nibiija kuhikiirira.

N’eky’obwengye kwebuuza, omu mwanya gw’okwikiriza buri kimwe eki orikuhurira. (Enfumu 14:15) Okwebuuza kwawe nikubaasa kugyeragyeranisibwa n’okw’abantu ba Beroya aba ira.a Aba Beroya obu baabanza kugambirwa amakuru marungi g’Obukama bakaikiriza, kwonka bwanyima bakashwijuma Ebyahandiikirwe “kureeba ebigambo ebyo ku biraabe nikwo biri.” (Ebyakozirwe 17:11) Ekyo nikimanyisa ngu Aba Beroya bakaba bagyeragyeranisa amakuru marungi agu baahurira n’eki Ebyahandiikirwe birikugamba. Ekyarugiremu, bakahamiza kimwe ngu amakuru marungi gakaba nigeegamira aha Kigambo kya Ruhanga.

Abajurizi ba Yehova nibakushaba ngu naiwe okore nikyo kimwe. Kurabira omu kukwegyesa Baibuli otashashwire, nitukuha omugisha kugyeragyeranisa ebi Abajurizi ba Yehova barikwikiriza aha Bukama bwa Ruhanga n’ebi Baibuli erikwegyesa.

Okwega Baibuli nikwija kukuhwera kumanya ebirikukwata aha Bukama bwa Ruhanga, n’okutunga eby’okugarukamu by’ebibuuzo bikuru ebi:

• Tukakomooka nkahi?

• Ekigyendererwa ky’okubaho niki?

• Ahabw’enki Ruhanga naareka okubonabona kukabaho?

• Haine ekirikuruga omu muntu kikaguma kihuriire bwanyima y’okufa?

• Mbwenu shi ensi neija kucwekyerezibwa?

• Niki ekirikureeta okushemererwa omu ka?

N’ekirikukirayo, okwega Baibuli nikiija kukuhwera kwirira “haihi Ruhanga.” (Yakobo 4:8) Oku oraayeyongyere kwiririra haihi Ruhanga, nikwo oraayeyongyere kureeba ebintu birungi eby’ebiro byona, ebi Obukama bwa Ruhanga buraareete. Yesu akashaba ishe ati: “Aga nigo magara agatahwaho, okumanya Iwe Ruhanga omwe ow’amazima, n’Ogwo ou waatumire Yesu Kristo.”​—Yohaana 17:3.