EBIBUUZO EBI BAIBULI ERIKUGARUKAMU
Ahabw’enki twine kushaba ngu Obukama bwa Ruhanga bwije?
Nooyenda kumanya ebirikukiraho aha Bukama bwa Ruhanga n’eki buraakore?
Obukama bwa Ruhanga ni gavumenti ey’omu iguru. Yesu akagambira abakuratsi be kushaba ngu bwije, ahakuba nibwo buraareeteho okuhikiirira n’obusingye omu nsi. Tihariho gavumenti y’abantu erikubaasa kuhezaho obushaarizi, obutari buringaaniza, nari endwara. Kwonka Obukama bwa Ruhanga bwo nibubaasa kandi nibwija kubiihaho. Ruhanga atooraine Omwana we Yesu kuba Omugabe w’Obukama obwo. Kandi Yehova atooraine n’abamwe aha bakuratsi ba Yesu kutegyeka na Yesu omu Bukama obwo.—Shoma Luka 11:2; 22:28-30.
Juba, Obukama bwa Ruhanga nibwija kwihaho abarikuhakanisa obutegyeki bwa Ruhanga. N’ahabw’ekyo, ku turikushaba ngu Obukama bwa Ruhanga bwije, nituba nitushaba ngu gavumenti ya Ruhanga eije eze omu mwanya gwa gavumenti z’abantu zoona.—Shoma Danieli 7:13, 14; Okushuuruurwa 11:15, 18.
Ahabw’enki Obukama bwa Ruhanga burikwija kugasira abantu?
Yesu niwe Omugabe ohikire ahakuba aine esaasi. Kandi ahabw’okugira ngu n’Omwana wa Ruhanga, aine amaani g’okuhwera abo boona abarikushaba Ruhanga ngu abahwere.—Shoma Zaaburi 72:8, 12-14.
Obukama bwa Ruhanga nibwija kugasira abo boona abarikushaba ngu bwije, kandi bakakora ebirikuhikaana n’ebi Ruhanga akunda. Torikubaasa kwefuuza ahabw’okwega eki Baibuli erikugamba aha Bukama bwa Ruhanga.—Shoma Luka 18:16, 17; Yohaana 4:23.