OMUTWE OGURI AHA MUNAARA | AHABW’ENKI TWINE KWESIGWA?
Oku Obutesigwa Burikukukwataho
“Nihakira kubaho embeera zigumire ezirikubaasa kwetengyesa okutaba mwesigwa obumwe.”—Samantha, South Africa.
Ebigambo ebyo noobiikiriza? Nka Samantha, naitwe haine obu turikuhikwaho embeera zigumire. Oku turikutwaza twayohibwa kutaba beesigwa nikworeka emitwarize ei turikutwara nka mikuru. Nk’eky’okureeberaho, okutiina okuhemuka kyaba kiri kikuru ahariitwe okukira ekindi kintu kyona, nitubaasa kureeba obutesigwa nk’oburikwetengyesa. Kwonka amazima ku garikumanywa, obutesigwa niburugamu ebintu bibi. Yetegyereze enshonga ezi.
OBUTESIGWA NIBUSHIISHA OBWESIGWA
Abantu kubaasa kugira omukago murungi baine kuba nibeesigana. Abantu babiri baaba nibeesigana, nibahurira baine oburinzi. Kwonka okuba omwesigwa tikirikwija ahonaaho. Abantu nibeesigana baaba nibamara obwire hamwe, obwo barikugaaniira omu bwesigwa kandi batarikutwaza omu muringo gw’okweyendeza. Ekikorwa kimwe ky’obutesigwa nikishiisha obwesigwa. Kandi obwesigwa bwasiisikara, nikibaasa kuguma kubugaruraho.
Omuntu ou orikuteekateeka ngu ni munywani waawe ow’aha mara arakubeihireho? Ku kiraabe kirakubaireho, okeehurira ota? Nikibaasa kuba kyakukozire kubi, kandi okahurira ngu akureebize. Buzima ekyo nikyetegyerezibwa. Hatariho kubanganisa obutesigwa nibushiisha omusingi gw’omukago murungi.
OBUTESIGWA NIBUTURIRA
Okucondooza kwa Robert Innes, omuhangu omu by’embaririra aha University ya California, kukooreka ngu “obutesigwa buzima nibuturira.” Ekirikumanyisa ngu, obutesigwa ni nk’akakooko akarikurwaza endwara. Waamara obwire bwingi n’omuntu otari mwesigwa, naiwe nooba oine emigisha mingi y’okukwatwa omuze gw’okutaba mwesigwa.
Noobaasa kwerinda ota kugwa omu mutego gw’obutesigwa? Baibuli neebaasa kukuhwera. Nyabura ‘we, yetegyereze emwe aha misingye ya Baibuli.