Nikigasha Kuba Omwesigwa

Omu Baibuli, ekigambo ky’Orugriika ekirikwetwa “obwesigwa” nikimanyisa “ekintu kirungi eky’omuhendo.” Nikibaasa n’okumanyisa ekintu ekirikushemeza kureeba aha bikwatiraine n’emicwe.

Abakristaayo nibaikiririza omu bigambo by’entumwa Paulo ebi: ‘Nitwetenga kutwaza gye omuri byona.’ Eki nikitwariramu ki?

OKURWANA KUSINGURA OBUTARI BWESIGWA

Abantu baingi nibeereeba omu ndeeberwamu buri kasheeshe batakagiire omu bantu. Ahabw’enki? Ahabw’okuba nibaba nibenda kuhamya ngu nibareebeka gye. Kwonka hariho ekiri kikuru okukira okuboneza eishokye n’okujwara gye. Buzima, emitwarize yaitu etarikureebwa neebaasa kworeka yaaba turi abantu barungi nari babi.

Ekigambo kya Ruhanga nikyoreka butunu ngu twine omuze gw’okwenda kukora ebibi. Okutandika 8:21 nihagira ngu “ebiteekateeko by’omutima gw’omuntu biba bibi okuruga omu buto bwe.” N’ahabw’ekyo, kubaasa kuba abeesigwa, twine kurwanisa omuze gw’okwenda kukora ekibi. Entumwa Paulo akashoboorora gye oku yaabaire naarwanisa ekibi, arikugira ati: “Omu mutima gwangye nsiima ebiragiro bya Ruhanga; kwonka omu ngingo zangye nshangamu ekindi kiragiro ekirwanisa ekiragiro eky’omu bwengye bwangye, kimpindura omuhuuku w’ebiragiro by’ekibi ebiri omu ngingo zangye.”​—Abarooma 7:22, 23.

Nk’eky’okureeberaho, omutima gwaitu gwaba nigwenda ngu tukore ekintu kibi kandi twine n’ekyetengo ky’amaani ky’obutaba beesigwa, ti twine kuba abahuuku b’ebiri omu mitima yaitu. Nituba twine obugabe bw’okwecweramu. Twateeraho kwanga ekiteekateeko kibi, nitubaasa kuguma turi abeesigwa n’obu turaabe twetoroirwe abantu abatari beesigwa.

OKUSINGURA OKURWANA OKU

Kubaasa kuba abeesigwa, twine kugyendera aha misingye erikukwata aha micwe. Kwonka eky’obusaasi, abantu baingi nibamara obwire bwingi barikucwamu aha bikwatiraine ‘n’eby’enjwara’ kukira emisingye erikukwata aha micwe yaabo. Ekirikurugamu, nibashagika obutesigwa bwaba nibuhikaana n’embeera zaabo. Ekitabo The (Honest) Truth About Dishonesty nikishoboorora kiti: “Buzima, nitubeiha kureeba ngu twaguma twine ekitiinisa kyaitu turikureebwa nk’abantu abeesigwa.” Mbwenu shi hariho omusingye ogurikubaasa kutuhwera kumanya ngu tihariho obutari bwesigwa bwona oburikwikirizibwa? Buzima, kiriho.

Obukaikuru bw’abantu omu nsi yoona bashangire ngu Baibuli buzima neehwera. Baibuli niyo erikukirayo kubamu emisingye erikukwata aha micwe mirungi. (Zaaburi 19:7) Neetuha obuhabuzi aha shonga z’amaka, emirimo, emicwe, n’eby’omwoyo. Emisingye eri omu Baibuli egyezesiibwe kandi neekora. Ebiragiro n’emisingye ebiri omu Baibuli nibikwata aha mahanga goona, abantu b’erangi zoona, n’enganda zoona. Okushoma Baibuli n’okuteekateeka aha bi erikugamba, n’okugyendera aha buhabuzi bwayo nikibaasa kutuhwera kwetendeka kuba abeesigwa.

Kwonka nabwo, hakiriho bingi ebirikubaasa kutuhwera kusingura obutari bwesigwa tukamanya ebihikire ebiri omu Baibuli. Tutwire omu nsi erikutugyemesereza kwikiriza emitwarize mibi yaayo. Niyo nshonga ahabw’enki twine kushaba Ruhanga kutuhwera. (Abafilipi 4:6, 7, 13) Twakora ekyo, nituza kugira obumanzi bw’okukora ekihikire n’okuba abeesigwa omuri byona.

EBIRUNGI EBIRIKURUGA OMU BWESIGWA

Hitoshi, owaaba yaagambirweho omu kicweka ekirikubanza, akagasirwa ahabw’okuba omukozi omwesigwa. Hati naakorera omuntu orikumukunda ahabw’okuba omwesigwa. Hitoshi naagira ati: “Ninshemererwa munonga, kureeba ngu nkabaasa kutunga omurimo ogurikumbaasisa kuguma nyine omutima ogushemeire.”

N’abandi bareebire ngu eki kihikire. Yetegyereze bamwe aha bantu abagasiirwe ahabw’okugyendera aha musingye gwa Baibuli ‘ogw’okutwaza gye omuri byona.’

• Omuntu w’Omunda Omurungi

  

  “Nkaruga omu ishomero nyine emyaka 13 naaza kukora n’abashuma. N’ekyarugiremu, entaasya yangye ebicweka 95 ahari 100 ekaba neeruga omu bikorwa by’obutari bwesigwa. Bwanyima, nkashwerwa, kandi nyowe n’omushaija wangye, Abajurizi ba Yehova bakatandika kutwegyesa Baibuli. Tukeega ngu Yehovaa Ruhanga naayanga obutari bwesigwa, n’ahabw’ekyo tukacwamu kukora empindahinduka omu mitwarize yaitu. Omuri 1990 tukeehayo ahari Yehova twabatizibwa twaba Abajurizi ba Yehova.”​—Enfumu 6:16-19.

  “Ira, enju yangye ekaba eijwire ebintu byenyibano, kwonka hati tiharimu kintu kyona ekiibirwe; kandi eki nikindeetera kugira omuntu w’omunda omurungi. Ku ndikuteekateeka emyaka mingi ei naamazire ntari mwesigwa, nsiima Yehova ahabw’embabazi ze nyingi. Nikindeetera okumarwa buri kiro naaba ninza kubyama kumanya ngu Yehova hati naansiima.”​—Cheryl, Ireland.

  

  “Mukama wangye aha murimo ku yaamanyire ngu nyangire ekituga ky’omuntu orikukira kutuhagira, akangira ati: ‘Ruhanga waawe naakuhwera kuba omuntu omwesigwa! Buzima n’eky’omugisha kuba naiwe aha omu kitongore kyaitu.’ Okuba omwesigwa omu bintu byona, nikimbaasisa kugira omuntu w’omunda omurungi omu maisho ga Ruhanga. Nikimbaasisa kuhwera eka yangye n’abandi kukora nikyo kimwe.”​—Sonny, Hong Kong.

• Obugwagye

  

  “Ninkora nk’omuhwezi w’omuntu mukuru omu banka y’ensi yoona. Omu bikwatiraine na banka, okuba omutungi ni kikuru munonga kukira okuba omwesigwa. Abantu baingi baine emiteekateekyere egi: ‘Ni kabi ki akari omu butari bwesigwa bwaba nibuhwera abantu kuba abagaiga kandi bukahwera n’omu by’entaasya?’ Kwonka nyowe ahabw’okuba omwesigwa, nyine obugwagye. Mmaririire kuguma ndi omwesigwa n’okwemera ebiraarugyemu byona. Bakama bangye aha murimo nibamanya ngu tindikubaasa kubabeiha.”​—Tom, United States.

• Okugira Ekitiinisa

  

  “Orikunkurira aha murimo akampiga kugamba ebishuba ahabw’ebintu ebyabaire bibuzire, kwonka naayanga. Ku baakwatsire abashuma, mukama wangye akansiima ahabw’okuba omwesigwa. Okuba omwesigwa nikyetengyesa obumanzi omu nsi egi eijwiremu obutari bwesigwa. Kwonka ekirikurugamu, abantu nibatwesiga kandi batuha n’ekitiinisa.”​—Kaori, Japan.

Okugira omuntu w’omunda omurungi, obugwagye, n’ekitiinisa, n’ebihembo ebirikuruga omu kuba abeesigwa. Mbwenu shi ekyo torikukiikiriza?