OMUTWE OGURI AHA MUNAARA | AHABW’ENKI YESU YAABONABOINE KANDI AKAFA?
Buzima Kikabaho?
Omu mwaka gwa 33, nibwo Yesu owa Nazareesi yaitwa. Bakamubeiherera ngu naagomesa abantu, baamuteera kubi munonga, reero baamuhanika aha muti. Yesu akafeera omu busaasi bwingi. Kwonka Ruhanga akamuzoora, kandi bwanyima y’ebiro 40, akaza omu iguru.
Ebyo ebyagambwaho aha ruguru nibishangwa omu bitabo bina eby’Engiri eby’Orugriika, ebirikumanywa nk’Endagaano Ensya. Ebintu ebyo buzima bikabaho? Ekibuuzo eki ni kikuru. Ku biraabe bitarabaireho, okwikiriza kw’Abakristaayo nikuba kutaine mugasho, kandi n’amatsiko g’okutunga amagara agatahwaho omu Paradiso nigaba gari ebirooto ebitaribaasa kuhikiirira. (1 Abakorinso 15:14) Kwonka, ebintu buzima ku biraabe byabaireho, abantu nibaba baine ebiro birungi eby’omumaisho, naitwe ebirikutuhwera kugira amatsiko. Mbwenu shi, ebiri omu Ngiri n’amazima nari n’ebishuba?
OBUHAME NGU BIKABAHO
Okutashushana n’ebitebyo bya ira, abaahandiikire Engiri bakahandiika ebihikire omu bwijwire. Nk’eky’okureeberaho, bakahandiika amaziina g’emyanya yenyini, mingi ahariyo eriho na hati. Bakahandiika aha bantu benyine abaabaireho, abaagambirweho n’abanyabyafaayo.—Luka 3:1, 2, 23.
Yesu naagambwaho n’abahandiiki ab’omu nsi ab’omu kyasha ky’okubanza n’ekya kabiri.a Omuringo ogu yaafiiremu nk’oku gurikushoboororwaho omu bitabo by’Engiri, niguhikaana n’omuringo ogu Abarooma baabaire baitwamu. Kandi, ebintu ebi bihikire kandi birimu amazima, nibyoreka n’enshobe ezi abeegi be baabaire nibakora. (Matayo 26:56; Luka 22:24-26; Yohaana 18:10, 11) Amazima aga goona nigooreka ngu abaahandiikire ebitabo by’Engiri bakahandiika amazima kandi ebihikire ebirikukwata ahari Yesu.
KANDI SHI OKUZOOKA KWA YESU?
N’obu abantu baingi baraabe nibaikiriza ngu Yesu akabaho kandi yaafa, abamwe nibabaanganisa aha kuzooka kwe. Nangwa n’entumwa ze tibaraikiriize amakuru ag’okubanza ngu akaba azookire. (Luka 24:11) Kwonka, okubanganisa okwo kukahwaho obu entumwa ezindi zaareeba Yesu aherize kuzooka aha mazooba gatari gamwe na gamwe. Nangwa eizooba rimwe hakaba hariho abantu abarikurenga 500 abaamureebire.—1 Abakorinso 15:6.
Abeegi ba Yesu bakooga amagara gaabo baabuurira aha kuzooka kwa Yesu baine obumanzi nangwa baabuurira n’abo abaamwitsire. (Ebyakozirwe 4:1-3, 10, 19, 20; 5:27-32) Mbwenu shi abeegi baingi bakaagizire obumanzi ku ogire ngu bakaba batarikuhamiza kimwe ngu Yesu buzima akaba azookire? Nangwa okuzooka kwa Yesu nikwo kwareeteire Obukristaayo kujanjaara munonga omu nsi ira n’obunaku obu.
Ebiri omu bitabo by’Engiri ebirikukwata aha kufa n’okuzooka kwa Yesu nibihamiza kimwe ngu ebintu ebyo ebyahandiikirwe ira bihikire. Waabishoma n’obwegyendesereza noija kuhamiza kimwe ngu ebintu ebi buzima bikabaho. Noobaasa kwongyera aha buhame bwawe waayetegyereza ahabw’enki byabaireho. Ekicweka ekirikukurataho nikiza kushoboorora.
a Omuribo harimu Tacitus, owaazairwe omu mwaka gwa 55 Yesu aherize kuzaarwa. Akahandiika ngu “Christus, owaakomookirweho eiziina Abakristaayo, akabonabonesibwa munonga omu butegyeki bwa Tiberio arikubonabonesibwa omwe aha beebembezi orikwetwa, Pontio Pilaato.” Yesu akagambwaho na Suetonius (omu kyasha ky’okubanza); omunyabyafaayo Omuyudaaya Josephus (omu kyasha ky’okubanza); na Pliny Omuto, owaabaire naayebembera Bisunia (omu kyasha kya kabiri kitandikire).