Ni Bintu ki Ebi Ruhanga Araakore?

Waaba oine oburemeezi, nooba noohamya ngu munywani waawe naija kugira eki yaakora kukuhwera. Ahabw’enshonga egi, baingi nibateekateeka ngu Ruhanga ti munywani waabo ahakuba tihaine ki arikukora kubahwera. Buzima, Ruhanga yaakozire bingi eby’okutugasira, kandi naija kugira eki yaakora kwihaho oburemeezi n’okubonabona ebiriho hati. Naija kukora bintu ki?

OKWIHAHO EBIKORWA BIBI BYONA

Ruhanga naija kumaraho ebikorwa bibi arikwihaho obukomooko bwabyo. Baibuli neeyoreka gye obukomooko obwo erikugira eti: ‘Ensi yoona eri omu butegyeki bw’Omubi ogwo.’ (1 Yohaana 5:19) ‘Omubi ogwo’ niwe omwe ou Yesu yaayetsire “omutegyeki w’ensi egi,” Sitaane Omuregi. (Yohaana 12:31) Sitaane niwe bukomooko bw’obugomi obureeteire abantu obusaasi. Ruhanga naija kukora ki?

Juba Yehova naija kukoresa Omwana we Yesu Kristo ‘kuhindura busha ogwo oine obushoboorozi bwa rufu, niwe Sitaane.’ (Abaheburaayo 2:14; 1 Yohaana 3:8) Nangwa Baibuli neeyoreka ngu Omuregi nawe “naamanya ku aine omwanya mukye” akacwekyerezibwa. (Okushuuruurwa 12:12) Kandi Ruhanga naija kwihaho ebintu bibi byona n’abo abarikubireetaho.​—Zaaburi 37:9; Enfumu 2:22.

OKUHINDURA ENSI PARADISO

Omuhangi waitu ku araiheho ebintu bibi byona, naija kuhikiiriza ekigyendererwa kye eky’okuhindura ensi ekaba paradiso ekatuurwamu abantu abahikiriire. Obwo nihaija kubaho mbeera ki?

Obusingye n’oburinzi ebyabuzima. ‘Abacureezi nibaija kuhungura ensi, beesiime ahabw’okugira obusingye bwingi.’​—Zaaburi 37:11.

Eby’okurya bingi kandi birungi. ‘Nihaija kubaho omweru mwingi omu nsi, emyaka neija kukondakonda omu misiri omu bibungo.’​—Zaaburi 72:16.

Amaka marungi n’emirimo erikureeta okumarwa. Abantu ‘nibaija kwombeka amaju, bagatuuremu; babyare emizaabibu, barye ebijuma byayo. Nibaija kushemerererwa ebi emikono yaabo ekozire.’​—Isaaya 65:21, 22.

Oine ekihika ky’okureeba embeera nk’ezi nizibaho? Abantu boona bari haihi kutunga embeera nungi nk’ezi buri izooba.

OKWIHAHO ENDWARA N’OKUFA

Obunaku obu, buri omwe naabaasa kurwara kandi afe, kwonka eki tikirikwija kugaruka kubaho. Ruhanga ari haihi kureetera abantu kugasirwa omu kitambo kya Yesu kugira ngu “omuntu weena orikumwikiriza arekye kuhwerekyerera, kureka atungye amagara agatahwaho.” (Yohaana 3:16) Eki nikiija kurugamu ki?

Endwara niziija kuhwaho. ‘Tihaine mutuuzi waayo orikwija kugira ati: Ndwaire, abantu abatwireyo nibaija kusaasirwa okutahikiirira kwabo.’​—Isaaya 33:24.

Abantu tibarikwija kugaruka kufa. Yehova ‘Ruhanga naija kumirira kimwe rufu, aragaze amarira aha maisho goona.’​—Isaaya 25:8.

Abantu nibaija kugumaho ebiro byona. “Ekiconco kya Ruhanga n’amagara agatahwaho omuri Kristo Yesu Mukama waitu.”​—Abarooma 6:23.

Abaafiire nibaija kuzoorwa. ‘Nihaija kubaho okuzooka kw’abahikiriire n’abatahikiriire.’ (Ebyakozirwe 24:15) Abafu nibaija kugasirwa omu kiconco kya Ruhanga eky’ekitambo.

Ebi byona Ruhanga naija kubihikiiriza ata?

OKUTAHO GAVUMENTI EHIKIRIIRE

Ruhanga naija kuhikiiriza ekigyendererwa eki ainiire abantu n’ensi arikukoresa gavumenti y’omu iguru erikwebemberwa Kristo Yesu, Omutegyeki ou atooraine. (Zaaburi 110:1, 2) Egi ni gavumenti, nari obukama obu Yesu yaayegyeise abakuratsi be kushaba omu bigambo ebi: “Tataitwe ow’omu iguru, . . . Obukama bwawe bwije.”​—Matayo 6:9, 10.

Obukama bwa Ruhanga nibwija kutegyeka ensi bwiheho obusaasi n’okubonabona. Obukama obu niyo gavumenti erikukirayo oburungi ei abantu barikubaasa kugira! Niyo nshonga ahabw’enki Yesu yaabaire ari omweziriki omu kubuurira ‘amakuru marungi g’Obukama’ omu nsi, kandi akagambira n’abeegi be kukora nikyo kimwe.​—Matayo 4:23; 24:14.

Yehova Ruhanga araganiise abantu kubakorera ebintu birungi ebi byona ahabw’okubakunda. Mbwenu shi eki tikirikukureetera kwenda kumumanya n’okumwirira haihi? Waacwamu kukikora noija kugasirwa ota? Ekicweka ekirikukurataho nikiza kushoboorora.