Obukama bwa Ruhanga Nibwija Kukorera ki Abantu?

EKI OBUKAMA BWA RUHANGA BWAHERIZE KUKORA

Ekicweka eky’enyima, kigambire aha kamanyiso aku Yesu yaahaire. Akamanyiso ako n’obuhame oburikureebwa ngu Obukama bwa Ruhanga bwatairweho omu iguru, kandi ngu Yesu Kristo niwe Mugabe wabwo.

Baibuli neegira ngu Yesu bwanyima y’okwemekwa nk’omugabe akabinga Sitaane na baadaimoni omu iguru. Hati nibabaasa kuteganisa ensi yonka, niyo nshonga ahabw’enki embeera zeeyongyeire kuba mbi kuruga 1914.​—Okushuuruurwa 12:7, 9.

N’obu embeera nizeeyongyera kuba mbi, hariho ebintu ebi Yesu Omugabe w’Obukama bwa Ruhanga yaaherize kukora omu nsi. Nitusiima omurimo gw’okwegyesa abantu Baibuli omu nsi yoona ogu Yesu yaagambire ngu nigwija kukorwa. Abantu baingi nibeega emisingye ya Baibuli kandi nibagigyenderaho. (Isaaya 2:2-4) Obukaikuru bw’abantu beegire kugira emiteekateekyere eringaniire aha kukora, okugira eka erimu obuteeka, n’okukoresa gye ebintu batabaire abahuuku babyo. Abantu aba nibeega oku barikubaasa kugasirwa hati, kandi nibahindura emitwarize yaabo kuba abantu abu Ruhanga arikwenda ngu bategyekwe Obukama bwe.

OBUKAMA BWA RUHANGA NIBWIJA KUHIKIIRIZA KI?

N’obu Yesu araabe naategyekyera omu iguru hati, gavumenti z’abantu nizo zikirikutegyeka omu nsi. Kwonka, Ruhanga akagambira Yesu ati: “Otegyekye aha gati omu bazigu baawe.” (Zaaburi 110:2) Juba Yesu naija kucwekyereza abagomi, kandi areetere boona abarikworobera Ruhanga beekundiire kugira oburuhuuko.

Omu bwire obwo, Obukama bwa Ruhanga nibwija

• Kwihaho ediini y’ebishuba. Ebibiina by’ediini ebitwire nibyegyesa ebishuba ahari Ruhanga birikugumisa n’embeera z’abantu, nibiija kuhwaho. Baibuli neegyeragyeranisa ediini y’ebishuba na maraaya. Okucwekyerera kw’ediini y’ebishuba nikwija kureetera baingi kwekanga.​—Okushuuruurwa 17:15, 16.

• Kumaraho obutegyeki bw’abantu. Obukama bwa Ruhanga nibwija kucwekyereza obutegyeki bw’abantu bwona.​—Okushuuruurwa 19:15, 17, 18.

• Kwihaho abantu ababi. Kandi shi abantu abamaririire kukora ebibi, abarikwanga kworobera Ruhanga? ‘Ababi nibaija kumarwaho omu nsi.’​—Enfumu 2:22.

• Kucwekyereza Sitaane na baadaimoni. Sitaane na baadaimoni be tibarikwija kugaruka “kubeihabeiha amahanga obundi.”​—Okushuuruurwa 20:3, 10.

Ebi byona nibiija kumanyisa ki ahari abo abarikushagika Obukama bwa Ruhanga?

EKI OBUKAMA BWA RUHANGA BURAAKORERE ABANTU

Yesu yaaba naategyekyera omu iguru nk’Omugabe, naija kuhikiiriza byona ebi abategyeki b’ensi baremirwe kukora. Naija kuba naahwerwa abategyeki abandi 144,000 abarikutooranwa omu nsi. (Okushuuruurwa 5:9, 10; 14:1, 3) Naija kuhamya ngu ebi Ruhanga arikukunda byakorwa omu nsi. Obukama bwa Ruhanga nibwija kukorera ki abaraabe nibatuura omu nsi?

• Nibwija kwihaho endwara n’okufa. ‘Tihaine mutuuzi waayo orikwija kugira ati: Ndwaire,’ kandi ‘tiharikwija kubaho kufa bundi.’​—Isaaya 33:24; Okushuuruurwa 21:4.

• Nibwija kureetaho obusingye n’oburinzi obwabuzima. ‘Okugogyera kwabo nikwija kuba kwingi,’ kandi ‘buri muntu naija kushutama ahansi y’omuzaabibu gwe n’ahansi y’omutiini gwe, kandi tihaine orikwija kubakangisa.’​—Isaaya 54:13; Miika 4:4.

• Nibwija kureetaho emirimo erikushemeza. ‘Abatoorainwe bangye nibaija kumara omwanya muhango nibashemerererwa ebi emikono yaabo ekozire.’​—Isaaya 65:22, 23.

• Nibwija kutereeza obuhangwa bw’ensi. ‘Eihamba n’ensi eyomire nibiija kushemererwa, eihamba ry’omusheenyi niriija kushemererwa, rirabye ebirabyo nk’esheko y’ensi.’​—Isaaya 35:1.

• Nibwija kuhwera abantu kwega eki baine kukora kubaasa kutuuraho ebiro byona. “Aga nigo magara agatahwaho, okumanya iwe Ruhanga omwe ow’amazima, n’ogwo ou waatumire Yesu Kristo.”​—Yohaana 17:3.

Ruhanga naayenda ngu otungye emigisha egi. (Isaaya 48:18) Ekicweka ekirikukurataho nikiija kushoboorora eki orikubaasa kukora kuba omwe aha baraatungye emigisha egi.