Nitubaasa Kuhwera Tuta Abarikwija aha Kiijutsyo?
1. Ni bujurizi ki obw’amaani oburaheebwe Maaci 22, 2008?
1 Maaci 22, 2008, obukaikuru bw’abantu omu nsi yoona nibaija kutunga obujurizi bw’amaani. Abaraije aha Kiijutsyo nibaija kuhurira ebirikukwata ahari rukundo mpango ya Yehova omu kuhayo ekitambo ahabw’abantu. (Yoh. 3:16) Nibaija kwega aha birikukwata aha Bukama n’oku Yehova arikwija kubukoresa kureetera ebi akunda kukorwa omu nsi yoona. (Mat. 6:9, 10) Nibaija kwereebera rukundo hamwe n’obumwe bw’abantu ba Ruhanga kandi nibaija n’okureeba oku turikubafaho.—Zab. 133:1.
2. Nitubaasa kuhwera tuta abeegi ba Baibuli abaraije aha Kiijutsyo?
2 Abeegi ba Baibuli: Bamwe aha baraije n’abo abatandikire kwega Baibuli naitwe. Banjurire ab’eishe-emwe na banyaanyazi-itwe. Bashoboororere enteerane ezi turikugira buri saabiiti, kandi baraambuze Ekyombeko ky’Obukama. Omu rubazo, omugambi naija kubahiga kugumizamu kuhamya omukago gwabo na Yehova. Noobaasa kukoresa ebi araagambe kuhiga abeegi baawe ba Baibuli.
3. Niki ekirikubaasa kukorwa kuhiga ababuurizi abatakiija mu nteerane abaraije aha Kiijutsyo?
3 Ababuurizi Abatakiija mu Nteerane: Bamwe omu baraije n’abaabaire batakiija mu nteerane. Teeraho kubaramutsya n’okushemererwa. Yetantare okubabuuza ebibuuzo nari kugamba ebigambo ebirikubaasa kubagwisa kubi. Bwanyima y’eizooba rw’Ekiijutsyo abareeberezi bashemereire kutaayaayira weena oyizire aha Kiijutsyo kwonka obaire atakiija mu nteerane, bamusiime ahabw’okuteeraho kwija, kandi bamwete kwija omu ruteerane rw’ekibiina oruraakurateho.
4. Buri omwe omuriitwe naabaasa kuhwera ata abagyenyi abaraije aha Kiijutsyo?
4 Abagyenyi: Bamwe ahari abo abaraije nibabaasa kuba bari bantu abu turikumanya nari ab’omuka yaitu abu twetsire. Abamwe nibabaasa kuba baayetsirwe aha Kiijutsyo omu bwire bwa kampeyini ey’omutaano. Waareeba bamwe abu otarikumanya, teeraho kubeyanjurira kandi obaakiire. Nibabaasa kuba batakaijahoga omu nteerane zaitu. Omu kugaaniira nabo, noobaasa kumanya ahu orikubaasa kubashanga. Orikubataayaayira nari orikubateerera esimu ebiro bikye bwanyima y’Ekiijutsyo, noobaasa kuteeraho kubahiga kweyongyera kwega ebirikukiraho kandi otandikye kubegyesa Baibuli.
5. Nitubaasa kugamba ki okubaasa kutandika kwegyesa omuntu Baibuli?
5 Ebiraagambweho omu rubazo rw’Ekiijutsyo nibibaasa kukoresibwa kwanjura akatabo Eki Baibuli Erikwegyesa waaba ogarukireyo. Nk’eky’okureeberaho, oraahe orubazo rw’Ekiijutsyo naija kushoma Isaaya 65:21-23. Waaba ogarukireyo, noobaasa kugamba aha rubazo orwo kandi ogire oti: “Ka nkworekye emigisha endiijo ei turikubaasa kutunga ahabw’ekitambo.” Bwanyima muhanuure aha biri aha rupapura 4-5 orw’omu katabo Eki Baibuli Erikwegyesa. Nari noobaasa kugira oti, “Baingi nibeebuuza obu obunabi bwa Isaaya burihikiirira.” Reero muhanuure aha kacweka 1-3 omu shuura 9. Nari noobaasa kugamba aha bi ohaire orubazo rw’Ekiijutsyo agambireho, reero oyanjure akatabo Eki Baibuli Erikwegyesa, kandi omworekye oku arikubaasa kwega Baibuli.
6. Twine mugisha gw’okukora ki omu kworobera ekiragiro kya Yesu eky’okwijuka okufa kwe?
6 Twena ka tusherure oku turaahwere abeegi ba Baibuli, ababuurizi abatakiija mu nteerane, hamwe n’abagyenyi abaraije aha Kiijutsyo. (Luka 22:19) Yehova buzima naija kutuha emigisha ku turayongyere aha buheereza bwaitu bw’Obukama.