“Noobaasa Kuba Payoniya Murungi!”
1. Munyaanyazi-itwe omwe akaba naahurira ata ahabw’okuheereza nka payoniya?
1 “Tihariho gundi murimo ogwakubaasize kuundetera okumarwa nari kutunga emigisha y’eby’omwoyo.” Ebyo bikagambwa Kathe B. Palm. Akamara emyaka mingi arikuheereza nka payoniya arikubuurira omuri Chile, South America n’ahandi. Omuntu arikwihirira aha birungi ebi abo abari omu buheereza nk’obwo barikutunga, naabaasa kuba araakugizire ati: “Noobaasa kuba payoniya murungi!”
2. Shoboorora ahabw’enki okumarwa okwa buzima kurikuruga omu buheereza obw’eby’omwoyo.
2 Obuheereza Oburimu Okumarwa: Eky’okureeberaho kyaitu Yesu, akatunga okumarwa omu kukora ebi Ishe akunda. (Yoh. 4:34) Nikyo Yesu yaayegyesiize abakuratsi be ngu okumarwa okwa buzima nikuruga omu kwejumba omu biine akakwate n’okuramya Yehova. Nitutunga okumarwa, twayejumba omu mirimo ei Yehova arikusiima. Kandi twahayo obwire bwaitu, amaani gaitu n’ebintu byaitu kuhwera abandi, nitweyongyera kushemererwa.—Byak. 20:31, 35.
3. Nitubaasa kutunga kushemererwa ki ahabw’okwongyera aha bwire obu turikumara omu kubuurira?
3 Oku turikweyongyera kumara obwire bwingi omu kubuurira nikwo turikweyongyera kutunga okushemererwa kw’okutandika kwegyesa abantu Baibuli. N’obu abaingi abu turikubuurira baakuba nibatuhakanisa, ekicweka eki turikubuuriramu nikibaasa kurugamu ebirungi twatandika kuheereza nka baapayoniya. Baapayoniya nibabaasa kukoresa ebyo byona ebi barikuba beegire omu Ishomero rya Baapayoniya ery’Obuheereza eri barikubaasa kutaahamu bwanyima y’okuheereza nka baapayoniya omwaka gumwe. (2 Tim. 2:15) Twagumizamu nituheereza nka baapayoniya, nitubaasa kubiba embibo z’amazima ezirikwija kwana ebijuma omu biro by’omumaisho.—Mub. 11:6.
4. Eminyeeto abari haihi kuhendera emishomo yaabo bashemereire kuteekateeka ahari ki?
4 Eminyeeto: Mwaba nimumariiriza emishomo yaanyu, nimuteekateeka aha biro byanyu by’omumaisho? Hati okushoma nikwo kurikutwara obwire bwawe bwingi. Mbwenu omu bwire obwo noija kukoreramu ki ku oraaheze emishomo yaawe? Omu mwanya gw’okumara obwire bwingi aha murimo, noobaasa kushaba Yehova kukuhwera kuheereza nka payoniya. Ebi oraayege orikubuurira abantu batari bamwe na bamwe, orikusingura oburemeezi obwawe nk’omuntu, orikuteeraho kugira emicwe mirungi, n’omu kuteeraho kuba omwegyesa murungi—nibiija kukuhwera ebiro by’amagara gaawe byona.
5. Abazaire n’abari omu kibiina nibabaasa kuhiga bata abandi kuheereza nka baapayoniya?
5 Abazaire, muriyo nimuhikiiriza obujunaanizibwa obu mwine okuhwera abaana baanyu kutaho ekigyendererwa ky’okutaaha omu buheereza obw’obwire bwona? Ebigambo byanyu n’eby’okureeberaho byanyu birungi nibibaasa kukora kihango kuhwera abaana baanyu kwebembeza eby’Obukama. (Mat. 6:33) Ray owaatandikire kuheereza nka payoniya aherize emishomo ye ya siniya, naagira ati: “Maawe butoosha akaba angira ngu okuheereza nka payoniya nikyo kirikukira kureeta okumarwa omu magara.” Boona omu kibiina omu bigambo byabo nibabaasa kuhiga abandi kuheereza nka baapayoniya kandi barikubahwera. Jose ow’omuri Spania, naagira ati: “Ekibiina eki ndimu kikaba nikitwara okuheereza nka payoniya nk’obuheereza oburikukirayo oburungi ahabw’abakiri bato. Ebigambo byabo, okusiima obuheereza bw’obwapayoniya n’obuhwezi bwabo bikampwera kutandika kuheereza nka payoniya.”
6. Nitubaasa kukora ki, hati ku turaabe tutaine kyetengo ky’okuheereza nka payoniya?
6 Okusingura Ebirikukuremesa: Kwonka shi ku waakuba noogira oti, ‘tinyine kyetengo ky’okuheereza nka payoniya.’ Ku kiraabe nikwo kiri, shaba Yehova omugambire oku orikwehurira kandi omugambire oti, ‘tindikumanya yaaba nimbaasa kuheereza nka payoniya, kwonka niinyenda kukora ekirikukushemeza.’ (Zab. 62:8; Enf. 23:26) Reero osherure obuhabuzi kuruga omu Kigambo kye n’ekibiina. Baapayoniya abaingi bakabanza ‘kuroza’ aha bwapayoniya barikuheereza nka baapayoniya abahwezi, kandi okushemererwa oku baatungire kukabareetera kwenda kutaaha omu buheereza obw’obwire bwona.—Zab. 34:8.
7. Nitubaasa kusingura tuta okubangaanisa aha kuhitsya eshaaha 70 ezirikwetengyesa buri kwezi?
7 Kandi shi ku waakuba nooteekateeka ngu noobaasa kutahitsya eshaaha 70 ezirikwetengyesa buri kwezi? Noobaasa kukigaaniiraho na baapayoniya abaine embeera nk’ezaawe. (Enf. 15:22) Reero okore entebeekanisa zitari zimwe na zimwe eziraakubaasise. Noobaasa kushanga ngu okubuurira orikukoresa obwire obu orikukoreramu ebintu ebitari bikuru, nikikubaasisa kuhitsya eshaaha ezo.—Efe. 5:15, 16.
8. Ahabw’enki tushemereire kushwijuma embeera zaitu haaguma haahinguraho obwire?
8 Guma Nooshwijuma Embeera Zaawe: Embeera z’omuntu butoosha nizihinduka. Ni kirungi okuguma nooshwijuma embeera zaawe haaguma haahinguraho obwire. Nk’eky’okureeberaho, noobaasa kuba ori haihi kuhuumura aha murimo. Randy, owaahuumwire aha murimo akiri muto naagira ati: “Okucwamu kuhuumura aha murimo kimpwereire kutandika kuheereza nka payoniya hamwe n’omukazi wangye, kandi kituhaire omugisha gw’okuheereza ei ababuurizi barikwetengwa munonga. Ntungire emigisha mingi ahabw’okucwamu ntyo, kwonka ogurikukira yoona n’okugira omuntu w’omunda omurungi.”
9. Abashaija n’abakazi baabo nibabaasa kucwamu kukora ki?
9 Abashaija n’abakazi baabo abamwe bwanyima y’okweshwijuma bashangire ngu tikirikwetengyesa ngu omushaija n’omuka we bombi bakore obwire bwona. N’amazima, eki nikibaasa kwetengyesa ngu eka emarwe n’ebintu bikye, kwonka nikirugamu ebirungi. John, ou omukazi we aherize kurekura omurimo kubaasa kwongyera aha buheereza bwe naagira ati: “Tihariho ekindi ekirikundetera okwehurira gye nk’okumanya ngu omukazi wangye naayejumba omu buheereza bwa Yehova omu bwire bwe bwa eihangwe.”
10. Niki ekirikuhiga Abakristaayo kuheereza nka baapayoniya?
10 Nikyoreka Rukundo n’Okwikiriza: Yehova ataireho okubuurira kuba omurimo mukuru ogu buri omwe ahariitwe arikubaasa kwejumbamu. Ensi ya Sitaane egi eri haihi kucwekyerezibwa, kandi abo bonka abarikutakira eiziina rya Yehova nibo baraije kucungurwa. (Rom. 10:13) Okumukunda n’okusiima ebi atukoreire nibiija kutuhiga kukora n’obweziriki omurimo gw’okubuurira ogu Omwana we yaatuhaire. (Mat. 28:19, 20; 1 Yoh. 5:3) Kandi, okwikiriza ngu buzima turi omu biro by’aha mperu nikiija kutuhiga kukora kyona eki turikubaasa omu buheereza hakiriyo obwire, omu mwanya gw’okurengyesereza omu kukoresa eby’ensi.—1 Kor. 7:29-31.
11. Oshemereire kukitwara ota omuntu yaakugira ngu noobaasa kuba payoniya murungi?
11 Okuheereza nka payoniya nikikira aha kumara eshaaha nyingi omu kubuurira; n’ekikorwa ekirikworeka ngu nitworobera Ruhanga. N’ahabw’ekyo omuntu yaakugira ngu noija kuba payoniya murungi, ekyo kireebe nk’obushagiki. Kiteekateekyeho kandi oshabe Yehova kubaasa kwegaita ahari abo abari omu buheereza obwo oburikureeta okumarwa.
[Ebigambo ebitoorainwe aha rupapura 4]
Abazaire, muriyo nimuhikiiriza obujunaanizibwa obu mwine okuhwera abaana baanyu kutaho ekigyendererwa ky’okutaaha omu buheereza obw’obwire bwona?
[Ebigambo ebitoorainwe aha rupapura 5]
Yehova ataireho okubuurira kuba omurimo mukuru ogu buri omwe ahariitwe
arikubaasa kwejumbamu.