Buurira omu Myanya Erikukorerwamu eby’Obushuubuzi Otarikutiina
1. Ahabw’enki tutashemereire kuhwa amatsiko twaba nitutiina kubuurira omu myanya y’eby’obushuubuzi?
1 Nootiina kubuurira omu myanya erikukorerwamu eby’obushuubuzi? Ku kiraabe nikwo kiri, otakaahwa amatsiko ahakuba na Paulo omubuurizi owaabaire atarikutiina, akabaasa ‘kugira obumanzi’ kubuurira. (1 Tes. 2:2) Ka tureebe bimwe ebirikukira kutureetera kutiina n’oku turikubaasa kubisingura.
2. Ahabw’enki tutaine kuteekateeka ngu nitwija kugwisa kubi abarikuba nibakora?
2 Okubuurira Abarikukorerayo Nikibagwisa Kubi? Omu myanya mingi nk’egyo abarikukorerayo nibaakiira buri omwe, n’ahabw’ekyo okubabuurira tikirikwija kubagwisa kubi. Nibabaasa kukutwariza gye barikuteekateeka ngu oyizire kugura ebintu. Waajwara gye kandi okooreka ngu noobafaho, nibaija kukutwariza gye.
3. Nitubaasa kwetantara tuta okugwisa kubi abarikuba nibagura ebintu?
3 Nyine Kubuurirayo Abantu Baaba Nibagura Ebintu? Noobaasa kubuurirayo nka baaba baaheza kwiguraho, abaguzi batakabaire baingi. Noobaasa kubuurira orikukurira abakozi yaaba ari wenka. Koresa enyanjura ngufu.
4. Nitubaasa kugamba ki twaba nitubuurira omu myanya y’eby’obushuubuzi?
4 Nimbaasa Kugamba Ki? Abakozi baaba bari baingi, noobaasa kugamba n’orikubakurira. Noobaasa kugira oti: “Twabataayaayira aha, ahakuba abarikukora kigumire kubashanga omuka. Obu muriyo nimukora, ka ngaaniire naimwe omu bugufu.” Obu barikubaasa kuteekateeka ngu nituguza ebitabo, nitubaasa kutagamba aha kuhayo okwihaho baatubuuza oku omurimo gwaitu gurikwemerezibwaho. Kurugiirira aha mwanya ogu turimu, nitubaasa kushaba orikugukurira kutwikiriza kugaaniiraho n’abakozi. Koresa enyanjura niyo emwe. Baaba baine bingi by’okukora, gamba nabo omu bugufu reero obahe bwaturakiti. Kyaba kitarikubaasika kugaaniira n’abakozi, noobaasa kutsigaho ebi baraije kushoma.
5. Ahabw’enki tushemereire kubuurira omu myanya y’eby’obushuubuzi twine obumanzi?
5 Yesu na Paulo bakaba babuurira omu myanya y’eby’obushuubuzi baine obumanzi, naitwe nitubaasa kukora nikyo kimwe. (Mat. 4:18-21; 9:9; Byak. 17:17) Shaba Yehova kukuhwera kugira obumanzi n’okutatiina. (Byak. 4:29) Noobaasa kuteeraho kubuurira omu myanya y’eby’obushuubuzi ahakuba abarikukorerayo nibakira kushangwayo.