Omuringo Murungi gw’Okubuurira aha Nguuto
1. Ni muringo ki gumwe ogu turikubaasa kutoorezamu Yesu?
1 Obu yaabaire naabuurira omu nsi, Yesu akaba ateeziringa kugamba n’abantu abu yaabaire abugana omu nguuto n’omu myanya endiijo. (Luk. 9:57-61; Yoh. 4:7) Akaba naayenda kugambira abantu baingi obutumwa bukuru obu yaabaire aine. Omu bunaku obu, okubuurira aha nguuto n’omuringo murungi munonga gw’okuhwera abantu kutunga obwengye oburikuruga ahari Ruhanga. (Enf. 1:20) Nitwija kwongyera kubuurira gye aha nguuto twateeraho kuhika aha bantu kandi tukakoresa okwetegyereza.
2. Niki eki oine kukora waaba noobuurira aha nguuto?
2 Ba Niiwe Waahika aha Bantu: Nikiba kiri kirungi kuba niiwe waahika aha bantu omu mwanya gw’okwemerera nari kushutama hamwe okategyereza ngu bakuhikeho. Orikumwenya, reeba omuntu aha maisho kandi ogambe nawe omu muringo gw’obucureezi. Twaba nitubuurira n’ababuurizi abandi, ni kirungi buri omwe kuhika aha muntu okwe. Teeraho kureeba ngu waagaruka kugamba n’ogwo oraayorekye ngu naayenda kumanya ebirikukiraho. Kyaba nikibaasika, bwanyima y’okugamba n’omuntu, noobaasa kumushaba endagiriro ye kugira ngu obaase kugaruka kugaaniira nawe ogundi murundi. Ababuurizi abamwe nibaguma nibabuurira aha nguuto omu mwanya gumwe, ekirikubabaasisa kuguma nibagaaniira n’abantu abu baabaire baabugaine kubaasa kubahwera kumanya ebirikukiraho.
3. Nitubaasa kukoresa tuta okwetegyereza twaba nitubuurira aha nguuto?
3 Koresa Okwetegyereza: Koresa okwetegyereza omu kucwamu ahu oraayemerere aha nguuto n’ou oraahikeho. Tikirikwetengyesa kubuurira buri omwe orikuhingura. Teeraho kwetegyereza. Nk’eky’okureeberaho, omuntu yaaba ari aha bwira, nikiba kiri kirungi kumureka akagyenda. Waaba noobuurira omu mwanya ogu barikugurizamu ebintu, koresa obwengye kugira ngu mukama waagwo atakwerarikirira. Ni kirungi butoosha kubuurira abantu baaba nibaruga ahu baagura ebintu omu mwanya gw’okubabuurira baaba nibataahamu. Hika aha bantu omu muringo ogutarabatiinise. Kandi koresa okwetegyereza n’omu kugaba ebitabo. Omuntu yaaba atakunzire gye ebi orikumugambira noobaasa kumuha turakiti omu mwanya gw’okumuha zaamagaziini.
4. Ahabw’enki okubuurira aha nguuto guri omuringo murungi gw’okubuurira kandi ogurikushemeza?
4 Okubuurira aha nguuto nikitubaasisa kujanjaaza embibo nyingi z’amazima omu bwire bukye. (Mub. 11:6) Abantu abamwe abu turikubugana nibabaasa kuba bari abo abu tutarikushanga muka twaba nitubuurira enju aha nju. Ahabw’enki otarikukora entebeekanisa okeejumba omu kubuurira aha nguuto, omuringo murungi gw’okubuurira kandi ogurikushemeza?