Obumwe Nikiba Nikyetengyesa Kubanza Kubasherura
1. Ahabw’enki omu bicweka ebirimu endimi nyingi, buri kibiina nikiheebwa ekicweka ky’okubuuriramu kurugiirira aha rurimi oru kirikukoresa?
1 Aha izooba rya Pentekoote 33 C.E., abeegi ba Yesu bwanyima y’okushukwaho omwoyo gurikwera ‘bakatandika kugamba endimi ezindi’ ez’abo abaabaire barugire omu bicweka bya hare. (Byak. 2:4) Ekyarugiremu, abantu nka 3,000 bakabatizibwa. Kandi abagyenyi baingi abaabaire bariho nikireebeka bakaba nibagamba orurimi oru boona baabaire nibamanya nka Oruheburaayo nari Orugriika. Kwonka Yehova akacwamu ngu amakuru marungi g’Obukama gababuurirwe omu rurimi rwabo. Ekyo kikabaho ahabw’okugira ngu abantu nibakira kukunda amakuru marungi gababuurirwa omu rurimi rwabo. N’omu bunaku obu, omu bicweka ebirimu abantu b’endimi nyingi buri kibiina nikiheebwa ekicweka ky’okubuuriramu kurugiirira aha rurimi oru kirikukoresa. (Akatabo Organized, rup. 107, kacw. 2-3.) Guruupu erikukoresa orurimi orundi terikuheebwa ekicweka ekyayo eky’okubuurira, kureka neebuurira abo abarikugamba orurimi orwo abarikushangwa omu kicweka eky’ekibiina ekirikugireeberera.
2. (a) Ni ryari obu kirikubaasa kwetengyesa kusherura abarikugamba orurimi orumwe? (b) Ebibiina nibibaasa kuhwerahwerana bita omu kicweka ekirimu endimi nyingi? (c) Twine kukora ki twabona orikugamba orurimi orundi orikwenda kumanya ebirikukiraho?
2 Waaba nootuura omu kicweka ei abantu barikugamba orurimi rumwe, noobaasa kubuurira enju aha ndiijo. Kwonka nikibaasa kutaba kityo waaba nootuura omu kicweka ekirimu endimi nyingi. Ebibiina ebirikukoresa endimi ezindi nibibaasa kuba nibibuurira omu kicweka ekyo. N’obu ab’omu bibiina ebyo barikubaasa kubaha ebirikukwata aha bantu abu barikutunga abarikugamba orurimi rw’ekibiina kyanyu, obujunaanizibwa bw’okusherura abantu nk’abo n’obw’ekibiina kyanyu. (Reeba akabokisi “Muhwerahwerane.”) N’ahabw’ekyo, nikibaasa kukwetengyesa kusherura abantu abarikugamba orurimi orumwe obwo orikubuuza abantu abandi. Abantu nk’abo nitubaasa kubasherura tuta?
3. Ekibiina nikihiirira ahari ki kusherura abarikugamba orurimi orumwe kandi okusherura okwo nikubaasa kutwara bwire ki?
3 Mwetebeekanisize Okusherura Abantu: Obwire obu mwine kumara nimusherura abantu abarikugamba orurimi orumwe, niburugiirira aha mbeera z’ekicweka kyanyu. Nk’eky’okureeberaho, ni bangahi abarikugamba orurimi orwo omu kicweka ekyo? N’ababuurizi bangahi abarikugamba orurimi orwo? Ekibiina kiine endagiriro zingahi ez’abarikugamba orurimi orwo? Ekibiina tikirikukyetengyesa kusherura omu buri kicweka ekikiheereire, kwonka nikibaasa kuta omutima aha ki kirikubuuriramu ekirimu abantu baingi n’ebicweka ebitari hare. Kwonka ni kikuru okwetebeekanisiza gye okusherura okwo, kugira ngu abantu baingi babaase kutunga omugisha kutakira iziina rya Ruhanga.—Rom. 10:13, 14.
4. (a) Okusherura kushemereire kutebeekanisibwa kuta? (b) Nitubaasa kusherura tuta abarikugamba orurimi rwaitu?
4 Ahabw’okutenda kushiisha obwire, abareeberezi na munonga omureeberezi orikukora aha by’obuheereza ashemereire kwebembera okusherura okwo. (1 Kor. 9:26) Abareeberezi b’ekibiina ekiine guruupu erikugamba orurimi orundi nibatoorana ow’eishe-emwe, na munonga omureeberezi nari omuheereza kwebembera guruupu egyo. Zaaguruupu n’ebibiina bingi bitaireho entebeekanisa nungi y’okusherura abantu, birikukoresa ebitabo ebirimu endagiriro na Intaneeti kutunga amaziina agarikukira kukoresibwa abantu ab’orurimu orumwe. Nibasherura abantu barikubateerera esimu nari barikutaayaayira ekicweka kureeba yaaba nikibaasa kubuurirwamu. Abareeberezi b’ekibiina ekiine guruupu erikukoresa orurimi orundi nibabaasa kucwamu ngu obumwe ekibiina kyona kyejumbe omu kusherura okwo.—Reeba akabokisi “Oku Murikubaasa Kusherura Abarikugamba Orurimi Rwanyu.”
5. (a) Ababuurizi abarikwejumba omu kusherura nibaheebwa buhabuzi ki? (b) Omu kusherura nitubaasa kugamba ki?
5 Buri kwejumba omu kusherura okwo twine kuba n’ekigyendererwa. Omu kusherura oku tushemereire kujwara gye nk’abari omu kubuurira okwa butoosha. Baingi bareebire ngu okwegyeza omu nyanjura kandi bakagamba n’orurimi rw’abantu abu barikusherura nikibahwera kurugamba n’omuhimbo n’okwongyera kurwega gye. Nitubaasa kubara obwire obu twaheza omu kusherura beitu butari obu turikukoresa kutebeekanisa ebicweka by’okubuuriramu. Twatunga omuntu orikugamba orurimi orwo, tushemereire kumubuurira reero ahonaaho tukamanyisa omureeberezi orikukora aha by’obuheereza nari ondiijo ou atooraine kugira ngu abaase kumugaita ahari abo abu barikubuurira. Eki kiine kukorwa n’obu omuntu yaakuba atakunzire gye ebi waamubuurira. N’obu okusherura oku kuraabe kuri kukuru, titushemereire kuba nikwo twataho omutima kwonka beitu twine kwejumba n’omu miringo y’okubuurira endiijo.—Reeba akabokisi “Eki Turikubaasa Kugamba omu Kusherura.”
6. Ahabw’enki okusherura abateta kitoorobi?
6 Okusherura Abateta: Tikyorobi kusherura abateta kandi nikyetengyesa okugumisiriza n’obweziriki. Omuteta torikubaasa kumusherura orikukoresa eiziina rye, ekyemerero kye nari ebi arikujwara. Ekindi, omubuurizi yaabuuza ebirikumukwataho, abanyabuzaare be na banywani be nibabaasa kwanga kumugambira. Obuhabuzi obu ahaifo oburikukwata aha kusherura abateta, nibubaasa n’okukora n’omu kusherura abo abarikugamba.
7. (a) Nitubaasa kusherura tuta abateta omu myanya erikutuurwamu? (b) Nitubaasa kukora ki ou turikubuuza yaatwekyengyera?
7 Guruupu n’ebibiina eby’orurimi rw’abateta bibaasize kubatunga birikubuuza omu myanya erikutuurwamu. Obundi noobaasa kubuuza omuntu akugire ngu omutaahi, ou arikukora nawe, nari ou arikushoma nawe n’omuteta. Obundi naabaasa kuba areebire akaapa aha ruguuto akarikworeka ngu hariho abaana abateta. Naabaasa kuba aine omunyabuzaare omuteta. Guma noijuka ngu waabuuza omuntu naabaasa kukwekyengyera. Kwonka noobaasa kuteeraho kworeka ou waabuuza ngu toine nshonga orikumugambira ahabw’enki noosherura abantu nk’abo. Abamwe nibabuuza omuntu yaaba hariho omuteta ou arikumanya baine Baibuli omu ngaro nari vidiyo y’abateta. Nibamugira ngu nibenda kubuurira abateta amatsiko agari omu Baibuli. N’obu ou mwabuuza yaakwanga kubagambira ei omuteta arikushangwa, naabaasa kwikiriza endagiriro yaanyu nari akapapura ak’okweta abantu omu nteerane reero akahe omuteta ou aine nawe obuzaare nari omunywani.
8. Ekibiina ekindi ekiri haihi nikibaasa kuhwera kita ekibiina ky’abateta?
8 Omurundi gumwe nari ebiri omu mwaka ekibiina eky’orurimi rw’abateta kyaba kiine ekicweka kihango munonga, nikibaasa kushaba ekibiina eky’orurimi orundi ekiri haihi kubahwera omu kusherura okwo. Oruteerane rw’okwetebeekanisiza okubuurira rwine kwebemberwa ekibiina eky’orurimi rw’abateta kandi rukabamu n’obuhabuzi n’eky’okureeberaho. Buri guruupu y’abarikuza kubuurira eshemereire kuba erimu omubuurizi kuruga omu kibiina ky’abateta kandi eheebwe na maapu erikworeka ei barikuza kubuurira.
9. Nitubaasa kusherura tuta abateta omu myanya ei barikuzamu kutunga obuhwezi?
9 Nitubaasa kusherura abateta omu myanya ei barikukira kuzamu kutunga obuhwezi. Ababuurizi baine kujwara omu muringo ogushemeire. N’eky’obwengye okugaaniira n’omwe nari babiri omu mwanya gw’okugaaniira na baingi. Baakunda ebi mwagaaniira, noobaasa kubashaba endagiriro zaabo.
10. Ababuurizi nibabaasa kusherura bata abateta omu myanya y’eby’obushuubuzi?
10 Omuringo ogundi n’okuteera zaamaapu ezirikworeka emyanya erikukorerwamu eby’obushuubuzi reero okazayo obu barikubaasa kushangwayo. Maapu neebaasa kutwariramu emyanya emwe ei barikugurizamu amajuta. Maapu emwe neebaasa kutwariramu emyanya ey’okwogyezamu emyenda, hoteeri n’endiijo nk’egyo. Buri maapu yaaba eriho emyanya y’eby’obushuubuzi eby’omuringo gumwe, ababuurizi nibabaasa kukoresa enyanjura niyo emwe. Nk’eky’okureeberaho, obu hoteeri zirikuba niziraarwamu n’abateta, nitubaasa kushoboororera bakama baazo ekyatureeta kandi tubahe vidiyo n’obupapura bw’okweta abantu omu nteerane kubuha abateta abaraijemu. Omu myanya y’eby’obushuubuzi nitubaasa kubuuza yaaba hariho abateta abarikukira kugurayo ebintu. Omu kicweka ekyo haaba harimu eishomero ry’abateta, noobaasa kubatwarira vidiyo z’ebitabo by’abateta z’okuta omu ibiikiro ryabo ry’ebitabo.
11. Ahabw’enki ni kikuru okusherura ab’orurimi orumwe?
11 Omurimo ogu Ni Mukuru: Okusherura abantu abarikugamba orurimi rwanyu nikitwara obwire bwingi. Ekindi ebicweka nibihindahinduka ahabw’okugira ngu abantu nibafuruka, kireetera okusherura abantu nk’abo kyaguma. Kwonka nabwo, omu bicweka ebirikukira obwingi ogu n’omuringo mukuru gw’okubuurira. Yehova atuhaire omurimo gw’okubuurira, tarikushoroora mu bantu. (Byak. 10:34) Ruhanga ‘naayenda ngu abantu boona bajunwe, bamanyire kimwe amazima.’ (1 Tim. 2:3, 4) N’ahabw’ekyo, ka tukwatanise na Yehova hamwe n’ababuurizi bagyenzi baitu kusherura abantu b’endimi zoona abaine ‘emitima eshemeire.’—Luk. 8:15.
[Akabokisi aha rupapura 5]
Muhwerahwerane
Ekibiina nari guurupu yaaba neeyenda ngu bagihwere omu kusherura ab’orurimi rwayo, omureeberezi orikukora aha by’obuheereza naabaasa kumanyisa abareeberezi b’ekibiina eky’orurimi orundi ekiri haihi. Nikiba kiri kirungi kumanyisa ebibiina ebiri haihi byonka nari ebiri omu bicweka ebirimu abantu baingi abarikugamba orurimi orwo. Abareeberezi abamanyisiibwe nibagambira ababuurizi ngu baashanga omuntu orikugamba orurimi orwo, bahandiikye endagiriro y’omuntu ogwo reero bagihe omureeberezi orikukora aha by’obuheereza ow’ekibiina ekishabire kukihwera. Abareeberezi abarikukora aha by’obuheereza ab’ebibiina ebyejumbire omu kusherura okwo, bashemereire kukwatanisa kubaasa kubuurira gye ekicweka ekyo n’okumanyisa abarikwenda kumanya amazima, ekibiina ekirikukoresa orurimi rwabo.
Ababuurizi baatunga orikugamba orurimi orundi orikwendera kimwe kumanya ebirikukiraho nari omuteta, ahonaaho bashemereire kwijuza Please Follow Up (S-43) foomu bakagiha omuhandiiki w’ekibiina. Eki nikiija kubaasisa omuntu ogwo ahonaaho kuhwerwa kwega Baibuli.—Reeba km 5/11 rup. 3.
[Akabokisi aha rupapura 6]
Oku Murikubaasa Kusherura Abarikugamba Orurimi Rwanyu
• Buuza abandi nk’abeegi ba Baibuli, abanyabuzaare, nari abu orikukora nabo.
• Koresa ebitabo ebirimu enamba z’esimu kutunga amaziina agarikukira kukoresibwa abantu b’orurimi orumwe. Aha Intaneeti noobaasa kushangaho endagiriro z’abantu nk’abo.
• Buuza omu myanya erikukira kugibwamu abantu, nk’eibikiro ry’ebitabo, ofiisi za gavumenti, n’amatendekyero.
• Reeba ebirango ebiri omu mpapura z’amakuru ebirikukwata aha mikoro etebeekanisiibwe ab’orurimi orumwe.
• Za omu myanya y’eby’obushuubuzi erikukira kuguza ebi ab’orurimi orumwe barikukunda.
• Noobaasa kushaba kutsiga ebitabo omu myanya y’eby’obushuubuzi, omu matendekyero, n’ei abantu ab’orurimi orumwe barikukira kukwatira ebiiruka.
• Kyaba nikiikirizibwa omu ihanga ryanyu, noobaasa kugura puroguramu ya kompyuta erikubaasa kusherura emyanya erimu abantu nk’abo aha Intaneeti.
[Akabokisi aha rupapura 7]
Eki Turikubaasa Kugamba omu Kusherura
Waabuuza omuntu omu muringo murungi otarikwekiikuura tarikwija kukwekyengyera. Okubanza kworeka omuntu ebitabo by’omu rurimi rwe nakyo nikihwera.
Waaheza kumuramutsya noobaasa kugira oti: “Nitusherura abantu abarikugamba ․․․․․ kugira ngu tubaase kugaaniira nabo ebiri omu Baibuli. Haine ou orikumanya?”
Waaba noosherura abateta noobaasa kugira oti: “Haine eki ndikwenda kukworeka. [Mworekye vidiyo y’abateta eriho ekyahandiikirwe kuruga omu New World Translation.] Eki n’ekyahandiikirwe ekiri omu rurimi rw’abateta orwa Amerika. Okwongyerera aha Baibuli, twine na vidiyo ezindi ez’abateta ezitebeekanisiibwe kubahwera kumanya amazima ezi barikubaasa kutunga batashashuriire. Haine omuteta nari ofiire amatu ou orikumanya?” Ou waabuuza yaaba ataine ou arikwijuka, ni kirungi okumushaba kukugambira emyanya ei arabareebiremu, nk’ahu arikukorera, aha ishomero nari omu bataahi.