Okuteeraho Kubuurira Abarikugamba Orurimi Orundi
1. Omu murimo gwaitu gw’obuurira niki eki tushangire kirikwetengyesa omu kicweka kyaitu?
1 Yesu Kristo akagira ngu amakuru marungi gakaba nigaza kubuurirwa omu nsi yoona “okuba eky’okuhamya aha mahanga goona.” Abo boona abarikwejumba omu murimo gw’okubuurira n’okwegyesa abantu Baibuli nibamanya obukuru bw’ebigambo ebyo. (Mat. 24:14; 28:19, 20) Ku turikuba turi omu murimo gw’okubuurira n’okuhindura abantu abeegi, nitubaasa kushanga abantu b’amahanga gatari gamwe na gamwe abarikugamba endimi zitarikushushana n’orwaitu. Abo nabo baine kuhurira amakuru g’Obukama kandi bakaija omu mazima izooba rya Yehova eririkutiinisa ritakahikire. (Mal. 3:18) Nitubaasa kuteeraho tuta kubuurira abarikugamba orurimi orundi omu kicweka eki turikubuuriramu?
2. Ni mu miringo ki ei turikutoorezamu Yehova twaba nitubuurira abantu abarikugamba endimi ezindi?
2 Reeba Abo Abarikugamba Orurimi Orundi nk’Oku Yehova Arikubareeba: Okubaasa kworeka rukundo nk’eya Yehova aha bantu boona omu kicweka eki turikubuuriramu, twine kugira ekyetengo ky’amaani eky’okuhwera abantu kumanya amazima agahikire agarikukwata ahari Ruhanga Yehova, n’obu baakuba nibagamba orurimi orundi. (Zab. 83:18; Byak. 10:34, 35) N’obu turaabe nituta omutima munonga ahari abo abarikugamba orurimi orurikukoresibwa omu kibiina kyaitu, twine n’okufayo ahari abo abarikugamba endimi ezindi kandi tukareeba oku turikubaasa kubabuurira amakuru g’Obukama bwa Ruhanga. Twaba tutafiireyo kubuurira abo abarikugamba endimi ezindi, ekyo nikiba kitarikuhikaana n’ekigyendererwa kya Ruhanga eky’okubuurira abantu b’amahanga goona. Mbwenu nitubaasa kuhwera tuta abantu abarikugamba endimi ezindi?
3. Ni katabo ki ak’omugasho aku twine, kandi nitubaasa kwetebeekanisa tuta kukakoresa?
3 Koresa Akatabo Good News for People of All Nations: Akatabo aka n’ak’okukoresibwa twabugana abantu abarikugamba endimi zitarikushushana n’orwaitu. Butoosha omu kubuurira ba oine akatabo ako, teeraho kwetegyereza ebikarimu kandi ba oyetebeekaniise kukakoresa. Kubaasa kworoberwa kukakoresa, ta akamanyiso aha ndimi ezirikugambwa omu kicweka kyanyu. Haaba hariho ebitabo ebiri omu ndimi ezo, nikiba kiri kirungi kutunga ebitabo bikye ahari ebyo okabimuha bwanyima y’okukoresa ebyo ebiri omu katabo Good News for People of All Nations.
4. Akatabo Nations nitubaasa kukakoresa tuta omu kubuurira?
4 Waashanga omuntu omu kubuurira orikugamba orurimi orundi kandi otarikumanya oku rurikwetwa, tandika kugamba nawe orikumworeka ebiri aha mutwe gw’akatabo ako. Mworekye mapu y’ensi yoona eri omu katabo ako, omworekye eihanga eri orikurugamu kandi oyorekye ngu nooyenda kumanya eihanga eri we arikurugamu n’orurimi oru arikugamba. Waaheza kumanya orurimi rwe, za aha mutwe gw’ebikarimu, oze aha rupapura oruriho orurimi rwe, omworekye ebigambo ebiri omurangi ekwatsire aha mutwe gw’orupapura reero oyorekye ngu nooyenda ngu ashome ebigambo ebyo. Yaaheza kubishoma, muhe kaaturakiti akari omu rurimi rwe nari mworekye ebigambo ebiri omurangi etakwatsire, ebirikugira ngu noobaasa kumureetera akatabo akari omu rurimi rwe. Reero mworekye ebigambo “eiziina ryangye” ebiri omu rangi ekwatsire kandi omugambire eiziina ryawe. Mworekye ebigambo “eryawe” ebiri omu rangi ekwatsire kandi otegyereze agambe eiziina rye. Kora nawe entebeekanisa kugarukayo.
5. Niki ekindi eki twine, okuhwera gye abo abarikugamba endimi ezindi abarikworeka ngu nibenda kwega?
5 Okusherura Abo Aboorekire ngu Nibenda Kweyongyera Kwega: Haine kubaho entebeekanisa y’okugarukayo ahari abo abarikworeka ngu nibenda kumanya amakuru g’Obukama, n’obu bakuba nibagamba endimi ezindi. Twayetegyereza ngu nibenda kumanya ebirikukwata ahari Ruhanga n’Ekigambo kye Baibuli, twine kwijuza foomu erikwetwa Please Follow Up (S-43) kandi ahonaaho tukagiha omuhandiiki w’ekibiina akagyohereza aha ofiisi y’eitaagi kugira ngu omuntu ogwo orikwenda kumanya ebirikukiraho abaase kutungirwa orikumanya orurimi rwe. Kandi, ofiisi y’eitaagi neija kwohereza foomu egyo omuri guruupu erikukoresa orurimi rw’omuntu ogwo. Guruupu yaaheza kutunga foomu egyo, omuntu orikwenda kumanya ebirikukiraho naija kutaayaayirwa ahonaaho. Omuhandiiki w’ekibiina oraatungye foomu egyo naabaasa kuha omureeberezi w’obuheereza kopi yaayo kugira ngu abe naamanya abo abarikwenda kwega, abarikugamba orurimi orundi. Foomu egyo eine kwijuzibwa omuntu yaaheza kworekyera kimwe ngu naayenda kwega.
6. Twashanga omuntu orikwenda kwega orikugamba orurimi orundi, nituba twine kukora ki?
6 Kuruga obu foomu erikwetwa (S-43) eraijuzibwe kuhitsya obu omuntu ogwo orikwenda kwega araataayaayirwe orikugamba orurimi nk’orwe, nihabaasa kuhinguraho obwire. N’ahabw’ekyo, omubuurizi owaijwize foomu egyo naabaasa kuguma nagarukayo aha muntu ogwo, okuhitsya obu omuntu orikugamba orurimi nk’orwe yaatungwa. Obumwe, omuntu ogwo naabaasa kuguma naayegyesibwa Baibuli. Kwonka shi, obwire obwo bwona omubuurizi naabaasa kutunga ata ebitabo ebiri omu rurimi rw’ogwo orikwenda kwega?
7. Ni ntebeekanisa ki erikubaasa kutuhwera omu kutunga ebitabo eby’abarikugamba endimi ezindi?
7 Ebitabo eby’Endimi Ezindi: Ebibiina tibishemereire kugira omu bwingi ebitabo eby’endimi ezindi. Kwonka, omureeberezi w’obuheereza yaayetegyereza ngu hariho abantu abarikugamba orurimi orundi abatandikire kwega amazima, naabaasa kucwamu ngu ebitabo by’orurimi orwo ebirikumara bibe biriho kubaasa kukoresibwa ababuurizi. Omu kibiina haaba hatarimu ebitabo by’orurimi orwo, nibibaasa kushabwa kuruga aha ofiisi y’eitaagi. Nikibaasa kutwara obwire kutunga ebitabo eby’endimi ezimwe. N’ahabw’ekyo, omu mbeera nk’egyo nitubaasa kukoresa ebyo ebiri ahari Intaneeti aha www.watchtower.org. Aha www.watchtower.org hariho ebitabo omu ndimi nyingi ebirikubaasa kukoresibwa ababuurizi nari abo abarikwenda kwega. Hatariho kubangaanisa entebeekanisa egyo ey’okwiha ebitabo ahari Intaneeti, neija kuhwera omu kwongyera kwegyesa abo abarikugamba endimi ezindi.
8. Ekibiina kiine bujunaanizibwa ki aha bikwatiraine n’okwegyesa abo abarikugamba endimi ezindi?
8 Obujunaanizibwa bw’Ekibiina: Obumwe nooshanga ngu omu kicweka ekirimu abantu baingi abarikugamba orurimi orundi, tiharimu kibiina ekirikugira enteerane omu orurimi orwo. N’ahabw’ekyo, abantu nk’abo abarikugamba orurimi orundi baine kwetwa kwija omu nteerane z’ekibiina kyanyu. Okubakiira gye n’okubafaho nikubaasa kubahiga kwenda kuguma nibaija omu nteerane obutoosha. N’obu omu kubanza harikubaasa kubaho okutahurizana omu rurimi, kwonka tihariho ekishemereire kuremesa kubooreka rukundo y’Ekikristaayo. (Zef. 3:9; Yoh. 13:35) Noogamba gye orurimi orundi? Ku kiraabe nikwo kiri kandi orikubaasa kwegyesa abantu abarikugamba orurimi orwo, manyisa omuhandiiki w’ekibiina kugira ngu amanyise ofiisi y’eitaagi. Eki nikiija kuhwera ofiisi y’eitaagi yaaba neesherura omubuurizi orikubaasa kwegyesa abarikugamba orurimi orundi.
9. Ni ryari obu kirikubaasa kwetengyesa kwegyesa ababuurizi orurimi orundi, kandi eki nikibaasa kukorwa kita?
9 Okwegyesibwa Orurimi: Waaba noohwera abo abarikugamba orurimi orundi, ni kirungi kubahiga kutandika kuza omu nteerane omu kibiina ekirikukoresa orurimi rwabo ekiri haihi. Kwonka, ekyo kyaba kitarikubaasika, ababuurizi abamwe nibabaasa kucwamu kwega orurimi orwo reero bahwere gye abantu nk’abo. Haaba hatariho kibiina haihi, ofiisi y’eitaagi neebaasa kucwamu ngu habeho okwegyesa ababuurizi orurimi orwo orundi orw’abantu baingi abari omu kicweka ekyo. Kyaba kityo, ofiisi y’eitaagi neebaasa kumanyisa ebibiina ebiri haihi, ekyetengo ekiriho kugira ngu bimanyise ababuurizi aha bikwatiraine n’okwegyesibwa orurimi orwo. Abo abarikushaba kwegyesibwa orurimi orwo baine kuba beteekateekire kuza omu kibiina nari omu kicweka ei abarikugamba orurimi orwo bari.
10. Niki ebirikubaasa kwihirirwaho kutandikaho guruupu y’orurimi orundi, kandi niki ekishemereire kukorwa?
10 Okutandikaho Guruupu: Okubaasa kutandikaho guruupu ey’orurimi orundi, hariho ebintu bina ebikuru ebiine kuhikiirizibwa. (1) Omu kicweka ekyo, haine kuba hariho abo abarikugamba orurimi orwo baingi abarikwenda kwega. (2) Haine kuba hariho ababuurizi abarikumanya orurimi orwo nari barikurwega. (3) Haine kuba hariho omureeberezi nari omuheereza oraayebembere enteerane omu rurimi orwo haakiri omurundi gumwe buri saabiiti. (4) Akakiiko k’abareeberezi kaine kuba keteekateekire kuhwera guruupu egyo. Ebyo byona byahikiirizibwa, abareeberezi nibaija kuhandiikira ofiisi y’eitaagi aha bikwatiraine na guruupu egyo kandi nibaija kushaba ngu ekibiina kyabo kikiirizibwe kuhwera guruupu egyo erikugamba orurimi orundi. (Reeba akatabo Organized, rup. 106-107.) Omureeberezi nari omuheereza orikwebembera guruupu egyo naba naayetwa “omureeberezi wa guruupu” nari “omuheereza wa guruupu.”
11. Ahabw’enki ni kikuru okuteeraho kubuurira abantu abarikugamba endimi ezindi abari omu kicweka eki turikubuuriramu?
11 Okubuurira abantu abarikugamba orurimi orundi ni kimwe aha bintu bikuru eby’omurimo gwaitu gw’okubuurira, ogu Yesu Kristo, eky’Okureeberaho kyaitu yaatandikireho. Ka tuteereho kugira obweziriki omu kuhikiiriza obuheereza bwaitu reero tureebe oku Yehova arikugumizamu naatengyetsa amahanga kandi arikureeta n’abo abarikusiimwa ahariwe. (Hag. 2:7) Ka ni kikuru ngu tukwatanise hamwe omu murimo ogu! Ni tushaba Yehova ngu ahe omugisha okukwatanisa kwaitu omu kubuurira abantu abarikugamba endimi ezindi omu kicweka kyaitu kandi butoosha turikwijuka ngu n’obu abantu baraabe nibagamba endimi zitarikushushana, Ruhanga naabahwera kubaasa kwega amazima.—1 Kor. 3:6-9.
(Byayeyongyerayo aha rupapura 9)
Okuteeraho Kubuurira Abarikugamba Orurimi Orundi (Byayeyongyerayo)