Okukwatanisa Kubuurira omu Kicweka Ekirimu Endimi Nyingi

Obwire obwingi abantu nibakunda amakuru marungi g’Obukama ku barikugahurira omu rurimi rwabo. Niyo nshonga ahabw’enki Yehova yaataireho entebeekanisa aha Pentekoote omu 33 Y.A.K., ngu ‘Abayudaaya kuruga omu mahanga goona agari ahansi y’eiguru’ bahurire amakuru marungi omu ‘ndimi z’ow’abo,’ n’obu baraabe baabaire nibabaasa kugamba endimi ezaabaire ziriho, nk’Oruheburaayo nari Orugriika. (Byak 2:5, 8) Omu bicweka ebirimu endimi nyingi obunaku obu, ebibiina ebirikugira enteerane omu ndimi zitarikushushana nibibaasa kugira ekicweka kyʼokubuuriramu kimwe. Ababuurizi abari omu bibiina ebyo nibabaasa kubuurira bata buri omwe kandi batarikubuurira ahu ekibiina ekindi kyaruga batateganiise abu barikubuurira?

• 

  Buuza (Enf 15:22): Abarikukora ahaby’obuheereza baine kukora entebeekanisa kumanya omuringo murungi gw’okubuurira amakuru marungi. Ekicweka kyaba kiri kikye, ebibiina ebirikubuurira omu ndimi ezindi nibibaasa kwenda ngu murekye amaka agarikugamba endimi ezo agari omu kicweka kyabo. Kwonka, ekicweka kyaba kiri kihango batarikubaasa kukibuurira omu bwire, nibabaasa kubareka mubuurire amaka goona kwonka mubamanyise haagira owaayoreka ngu naayenda kumanya ebirikukiraho. (od-E 93 kacw. 37) Nari nibabaasa kushaba ekibiina kyanyu kubahwera kusherura abarikugamba orurimi rw’ekibiina kyabo kandi bakabaha n’endagiriro zaabo. (km 7/12 5, kab.) Guma noijuka ngu, omu mbeera ezimwe, omu ka emwe noobaasa kushangamu abarikugamba endimi nyingi. Entebeekanisa y’okubuurira kuheza ekicweka eine kuba neehikaana n’ebiragiro by’okwerinda.

• 

  Okuhwerahwerana (Efe 4:16): Teeraho kugyendera aha buhabuzi obu orikutunga kuruga aha barikukora ahaby’obuheereza. Hariho ou orikwegyesa Baibuli orikukunda kwega omu rurimi orutari rw’ekibiina kyanyu? Omwegi wa Baibuli naabaasa kutunguuka juba waakora entebeekanisa kugira ngu omuntu ori omu kibiina nari guruupu erikukoresa orurimi rwe amwegyese.

• 

  Tebeekanisa (Enf 15:28; 16:1): Omu kicweka kyanyu waabugana orikugamba orurimi orundi, teeraho kumubuurira amakuru marungi. Noobaasa kutebeekanisa orikuteekateeka aha ndimi ezirikugambwa omu kicweka kyanyu, okwiha aha mukura Baibuli na vidiyo omu ndimi zitarikushushana okazita aha simu yaawe kyaba nikibaasika. Noobaasa n’okukoresa JW Language app kwega endamutsyo z’endimi ezo.