Teeraho Kushemerererwa Abagyenyi
1. Ni mukoro ki ogurikutubaasisa kuhwera abantu kutumanya gye, kandi n’ahabw’enki?
1 Ekiijutsyo nigwo mukoro ogurikukirayo kutubaasisa kuhwera abantu baingi kutumanya gye. Omwaka ogu nituteekateeka ngu abantu abarikurenga obukaikuru ikumi nibo baraije aha Kiijutsyo bakahurira oku ekitambo kirikworeka rukundo omu miringo ebiri mikuru. (Yoh. 3:16; 15:13) Nibaija kwega aha migisha ei barikubaasa kutunga ahabw’ekiconco eki Yehova yaatuhaire. (Isa. 65:21-23) Kwonka, omugambi tiwe wenka oraahwere abantu kutumanya gye aha mukoro ogu. Twena nitwija kutunga omugisha gw’okuhwera abagyenyi abaraije kutumanya gye turikubashemerererwa.—Rom. 15:7.
2. Nitubaasa kushemerererwa tuta abagyenyi?
2 Omu mwanya gw’okushutama okategyereza omukoro kutandika, noobaasa kweyanjurira abo abashutami haihi naiwe? Abagyenyi nibabaasa kuburabura batarikumanya ekirikuza kubaho. Twabaramutsya n’amashemererwa nikiija kubahwera kuhurira baikaikaine. Kubaasa kumanya yaaba yaija ahabw’okutunga akapapura k’okweta abantu, noobaasa kumubuuza ku guraabe guri omurundi gwe gw’okubanza kwija omu nteerane zaitu nari ku araabe aine ou arikumanya omu kibiina. Noobaasa kumushaba kushutama naiwe kugira ngu mukorese hamwe Baibuli n’ekitabo ky’ebyeshongoro. Omukoro gwaba guri aha Kyombeko ky’Obukama, noobaasa kukimurambuza. Bwanyima y’orubazo, noobaasa kugarukamu ebibuuzo bye. Mwaba nimuza kugyenda juba kugira ngu abandi bakorese Ekyombeko ky’Obukama, noobaasa kumubuuza akugambire oku yaareeba omukoro, omushabe n’endagiriro ye. Kandi okore entebeekanisa nawe kwongyera aha bi mwagaaniiraho. Okukira munonga abareeberezi nibaija kuteeraho kugaruramu amaani ababuurizi abamazire obwire buraingwa batarikubuurira abaraije aha Kiijutsyo.
3. Ahabw’enki kiri kikuru okuteeraho kushemerererwa abagyenyi abaraije aha Kiijutsyo?
3 Bamwe aha bagyenyi abaraije nigwija kuba omurundi gw’okubanza kureeba okushemererwa, obusingye n’obumwe ebi twine ahabw’okuheereza Yehova. (Zab. 29:11; Isa. 11:6-9; 65:13, 14) Abagyenyi abaraije aha Kiijutsyo nibaija kuguma nibaijuka ki? Ekyo nikiija kurugiirira aha ku turaabashemerererwe.