Okwongyera Kubuurira Gye​—Okuhandiika Ebirikukwata aha Muntu Orikwenda Kumanya Ebirikukiraho

“Oyerinde iwe wenka kandi n’omu bi orikwegyesa.” (1 Tim. 4:16) Obuhabuzi obu entumwa Paulo yaahaire Timoseo nibworeka ngu n’obu twakuba turi basya omu kubuurira nari tumazire obwire buraingwa turikubuurira twine kuteeraho kwongyera kuba ababuurizi barungi. Okutuhwera kukora ekyo, ekicweka kisya ekiine omutwe “Okwongyera Kubuurira Gye” nikiija kuba nikiizira omu Obuheereza Bwaitu obw’Obukama. Buri kicweka nikiija kuba nikishoboorora omuringo gumwe mukuru oguraatuhwere kwongyera kubuurira gye hamwe n’obuhabuzi aha ku kirikubaasa kukorwa. Buri mubuurizi naahigwa kuteeraho kukoresa omuringo ogwo omu kubuurira. Aha muheru gw’okwezi, nihaija kubaho ekicweka omu Ruteerane rw’Obuheereza, kandi oraayebembere ekicweka ekyo naija kushaba ababuurizi kugamba oku bagasirwe omu kukoresa omuringo ogwo n’ebirungi ebirugiremu. Okwezi oku nituhigwa kuguma nituhandiika ebirikukwata aha bantu abarikwenda kumanya ebirikukiraho.

Ahabw’Enki Ni Kikuru: Kubaasa kuhikiiriza obuheereza bwaitu, tushemereire kwongyera kubuurira gye. Tukagarukayo ahari abo abarikworeka ngu nibenda kumanya ebirikukiraho, tukabegyesa turikwitirira embibo z’amazima. (Mat. 28:19, 20; 1 Kor. 3:6-9) Eki nikimanyisa ngu twine kugarukayo aha muntu, tukagarukamu ebi arikwenda kumanya kandi tukongyerera aha ki twagaaniireho nawe. N’ahabw’ekyo, twabona abantu abarikwenda kumanya ebirikukiraho, ni kikuru kuhandiika ebirikubakwataho.