Embibo Niziba Ziine Kwitirirwa Okubaasa Kukura
1. Niki ekiine kwitirirwa okugira ngu kikure?
1 Embibo ezirikubibwa omu musiri niziba ziine kwitirirwa okubaasa kukura. Nikyo kimwe n’embibo z’amazima ezirikubibwa omu mitima y’abantu abu turikubuurira. (1 Kor. 3:6) Twine kugarukayo aha bantu tukaitirira embibo nk’ezo turikukoresa Ekigambo kya Ruhanga twaba nitwenda ngu batunguukye omu by’omwoyo.
2. Nitubaasa kureetera tuta ou turikubuurira kugira ekihika kugaaniira naitwe twagarukayo?
2 Buuza Ekibuuzo: Waatebeekanisa enyanjura yaawe, noobaasa kutebeekanisa n’ekibuuzo eki orikubaasa kugarukamu waaba ogarukireyo? Kibuuze mwaba nimuhendera okugaaniira kwanyu kandi okore entebeekanisa kugarukayo. Baingi nibashanga kirikuhwera kukoresa ekibuuzo kuruga aha biri omu katabo Eki Baibuli Erikwegyesa ekirikubabaasisa kworeka omuntu oku arikubaasa kwega Baibuli.
3. Niki ebi turikubaasa kuhandiika ebirikukwata ahari ogwo ou twabuurira?
3 Gira Ebi Waahandiika: Ahonaaho waaruga aha u waaba noobuurira, gira ebi waahandiika aha bi mwagaaniiraho. Handiika eiziina ry’omuntu n’endagiriro ye. Ni kirungi okuhandiika ebiro n’eshaaha obu waagamba nawe, eki mwagaaniiraho n’ekitabo kyona eki waamuha. Yaagira ngu haine ediini ei arimu? Aine eka? Yaakugambira ebi arikukunda n’oburemeezi bwe? Ebintu nk’ebyo nibiija kukuhwera kugaaniira nawe aha bintu ebi arikukunda waagarukayo. Kandi handiika n’obu mwikirizana kugarukayo n’ekibuuzo eki oraagarukyemu.
4. Twaba nitugumizamu kuhwera abarikwenda kumanya amazima, ahabw’enki tushemereire kugumisiriza?
4 Gumisiriza: Sitaane naija kuteeraho ‘kwihamu ekigambo’ ekibibirwe omu mitima y’abantu. (Mak. 4:14, 15) N’ahabw’ekyo, otakaahwa amaani kyaba kigumire kugaruka kushanga omuka ou waabuuriire. Noobaasa kumuhandiikira akabaruha okate ahansi y’orwigi? Payoniya omwe akatandika kwega Baibuli n’omukazi omwe aha muryango gw’omukazi ogwo kwonka tarabaasize kugaruka kumushanga omuka, yaacwamu kumuhandiikira ebaruha. Munyaanyazi-itwe ku yaarugireho akamushanga omuka, omukazi ogwo akooreka ngu akakwatwaho munonga ahabwa munyaanyazi-itwe kumufaho. Twaba nitwitirira embibo z’amazima, nitubaasa kutunga okushemererwa ahabw’okureeba nizimera, zikakura kandi ‘zikaana ebyana emirundi makumi ashatu, makumi mukaaga, na igana.’—Mak. 4:20.