Muteeranire Hamwe Abantu
1. Oruteerane oruhango orw’ebiro bishatu rwine kakwate ki n’oruteerane oru Abaisraeli baagizire baaheza kuruga Misiri?
1 Bwanyima y’Abaisraeli kuruga Misri, Yehova akaragiira Musa ‘kuteeranira hamwe abantu’ aha rushozi Sinai ngu babaase kuhuurira ekigambo kye kandi beegyese abaana baabo emitwarize ye. (Bir. 4:10-13) Oruteerane oru rukahwera Abaisraeli kuhama omu kwikiriza. Omu meezi makye agaraakurateho, abaheereza ba Yehova nibaija kuteeranira hamwe aha ruteerane oruhango orw’ebiro bishatu kwegyesibwa Yehova. Nitubaasa kukora ki kugasirwa omu ruteerane oru?
2. Tushemereire kukora ki ‘kwetebeekanisiza’ oruteerane oruhango orw’ebiro bishatu?
2 Yetebeekanise: Yehova akaragiira Abaisraeli kwetebeekanisiza oruteerane orwabaire niruza kubaho aha rushozi Sinai. (Kur. 19:10, 11) Nikyo kimwe, boona abaraije kuba aha ruteerane oruhango baine kwetebeekanisa gye, kwonka batari abo bonka abarikwija kuba baine ebicweka aha ruteerane oru. Nk’eky’okureeberaho, baingi nikiija kubetengyesa kushaba orusa abu barikukorera kubaasa kuba aha ruteerane oru. Obundi embeera yaawe neebaasa kuba eri nk’eya Nehemia. Akaba naayenda kuruga aha murimo gwe ogw’okugaburira Omugabe Arutagizakiseesi kuza Yerusaalemu kuhwera omu kuhunduuza engo zaayo, kwonka akaba naamanya ngu Omugabe naabaasa kwanga kumuha orusa. Nehemia akashaba kandi yaagambira Omugabe eki yaabaire naayenda atarikutiina. Omugabe akamwikiriza kugyenda kandi yaamuha n’ebyabaire nibyetengyesa omu murimo gw’okuhunduuza. (Neh. 2:1-9) Oyihireho okushaba orusa, oine kuteebekanisa oku oraagyende n’ahu oraarare. Abareeberezi nibaija kushemererwa kuhwera buri omwe orikwenda obuhwezi. Tebeekanisa kugira ngu buri izooba ogume ohikye kare aha mwanya gw’oruteerane, kugira ngu obaase kuta omutima aha biraabe nibyegyesibwa.—Heb. 2:1.
3. Niki ekiraatuhwere kuteebekanisa emitima yaitu kubaasa kugasirwa omu ruteerane oruhango?
3 Ekindi eki tushemereire kukora n’okutebeekanisa emitima yaitu kubaasa kuhurikiza kandi tukeega. (Ezr. 7:10) Oruteerane oruhanga oru rutakahikire puroguraamu yaarwo naija kuteebwa aha jw.org kandi neija kuba eriho emitwe y’embazo zoona na kimwe nari bibiri aha byahandiikirwe ebikuru ebya buri rubazo. Omu Kuramya okw’Eka, nimubaasa kuhikaanisa ebiteekateeko aha biri omu puroguraamu y’oruteerane oru harikuburayo saabiiti nkye mukaruzamu. Ababuurizi abamwe nibaiha aha jw.org puroguraamu egi baagikoresa kuhandiikaho enshonga ezimwe baaba bari omu ruteerane.
4. Abazaire nibabaasa kukoresa bata oruteerane oruhango kwegyesa abaana baabo?
4 Mwegyese n’Abaana Baanyu: Kimwe aha bigyendererwa by’oruteerane orwabaire aha rushozi Sinai kikaba kiri okuhiga abazaire ‘kwegyesa abaana baabo.’ (Bir. 4:10) Kandi n’oruteerane oru niruha abazaire omugisha kwegyesa abaana baabo. Abazaire bashemereire kushutama n’abaana baabo kugira ngu babaase kubahwera kuhurikiza gye. N’ahabw’ekyo, nikiija kubahwera nk’eka, mwatunga akiire buri mwabazyo mukagaaniira aha bi mwayega kandi na bwanyima mwaba muri omu kuramya kwanyu kw’eka.
5. Nitwija kugasirwa tuta twaza omu ruteerane oruhango orurikuza kubaho?
5 Oruteerane orwabaire aha rushozi Sinai rukahwera Abaisraeli kwetegyereza ngu okuba abaheereza ba Yehova gukaba guri omugisha gw’amaani. (Bir. 4:7, 8) Oruteerane oruhango oru rutebeekanisiibwe kutuhwera omu muringo nigwo gumwe. Ebiro bishatu ebi turikwija kumara omu ruteerane oru nibiija kutubaasisa kwongyera kugarurwamu amaani omu by’omwoyo hamwe n’okuba n’ab’eishe-emwe omu paradiso yaitu y’eby’omwoyo. (Isa. 35:7-9) Nk’oku ekiro kya Yehova kirikwirira haihi, ka tuteereho kuguma nituza omu nteerane kubaasa kugaruranamu amaani kandi tugumyane!—Heb. 10:24, 25.