Okweta Abantu aha Ruteerane orw’Ebiro Bishatu
1. Kampeyini y’okweta abantu kwija aha ruteerane rw’ebiro bishatu 2014 neetandika ryari?
1 Waatebeekanisiza banywani baawe nari eka ekihuuro ky’omutaano, kandi oteiremu amaani hamwe n’esente nyingi noobeta n’omuhimbo. Nikyo kimwe, bingi bikozirwe omu kutebeekanisa ekiihuro ky’eby’omwoyo ekirikwija kubaho aha ruteerane oruhango orw’ebiro bishatu orwa 2014. Esaabiiti ishatu zirikuburayo oruteerane rukahika, nitwija kugira omugisha gw’okweta abandi kwija omu ruteerane oru. Niki ekiraatuhwere kweta abantu n’omuhimbo kwija omu ruteerane oruhango orw’ebiro bishatu?
2. Niki ekiraatuhige kwejumbira kimwe omu kampeyini y’okweta abantu aha ruteerane oruhango orw’ebiro bishatu?
2 Twateekateeka aha ku turikwija kugasirwa aha kihuuro ky’eby’omwoyo eki Yehova atutebeekanisiize aha ruteerane oruhango orw’ebiro bishatu nikiija kutuhiga kwejumbira kimwe omu kampeyini y’okweta abantu. (Isa. 65:13, 14.) Twine kumanya ngu kampeyini egi erikubaho buri mwaka neerugamu ebirungi. Bamwe aha bu turaayete nibaija kuba hamwe naitwe omu ruteerane oru. N’obu turaabe tutarikumanya yaaba boona abu turaayete baraije aha ruteerane oru, okuteeraho kwaitu kwejumba omu kampeyini egi nikiija kureetera Yehova kuhimbisibwa kandi kyorekye ngu naafayo aha bantu boona.—Zab. 145:3, 7; Kush. 22:17.
3. Obupapura bw’okweta abantu kwija aha ruteerane oruhango orw’ebiro bishatu nibwija kugabwa buta?
3 Buri kakiiko k’abareeberezi kaine kucwamu oku obupapura bw’okweta abantu aha ruteerane oruhango orw’ebiro bishatu buraagabwe, otwariremu na yaaba bushemereire kutsigwa omu maka agataraashangwemu bantu nari kubugaba omu myanya erimu abantu baingi omu kicweka kyanyu ky’okubuuriramu. Mwaba nimugaba obupapura obwo omu wiikenda nimubaasa kubugaba na magaziini kyaba nikibaasika. Orwamukaaga orurikubanza omu kwezi rwaba ruri omu bwire bwa kampeyini, omutima gwine kuteebwa aha kugaba obupapura bw’okweta abantu omu mwanya gw’okutandika kwegyesa abantu Baibuli. Bwanyima y’okuheza kampeyini egi nitwija kugira okushemererwa ahabw’okumanya ngu tukagyejumbiramu kimwe kandi twayeta abantu baingi kwija kutwegaitaho aha kihuuro ky’eby’omwoyo eki Yehova atutebeekanisiize.