Okwongyera Kubuurira Gye—Okworeka Oku Omuntu Arikubaasa Kwega Baibuli Orikukoresa Akatabo Eki Baibuli Erikwegyesa

Ahabw’Enki Kiri Kikuru: Abantu abaingi ku turikubagira ngu nitwegyesa abantu Baibuli hatariho kushashura tibarikukyetegyereza. Nibabaasa kuteekateeka ngu nikibetengyesa kwegyera Baibuli omu guruupu. Omu mwanya gw’okubagira ngu nitwegyesa abantu Baibuli, nikirungi kubooreka oku barikubaasa kugyega. Omu dakiika nkye, noobaasa kworeka omuntu omu muringo gworobi oku arikubaasa kwega Baibuli n’ebirungi ebirimu.

Oku Turikubaasa Kukikora:

Bwanyima y’okweyanjura, buuza ou orikubuurira ku araabe naateekateeka munonga aha biro bye by’omumaisho.
Mumanyise ngu abantu baingi nibateekateeka aha biro byabo by’omumaisho, reero omworekye emitwe eri omu katabo Eki Baibuli Erikwegyesa. Mushoboororere ngu akatabo aka karimu amashomo agoorobi kwetegyereza agarikworeka eki Baibuli erikwegyesa aha biro by’omumaisho n’enshonga ezindi, reero omubuuze eshuura ei yaakunda.
Muhe akatabo aka kandi omworekye eshuura ei yaatoorana. Mushoboororere ngu ebibuuzo ebiri aha kutandika kw’eshuura nibigarukwamu omu bucweka bw’eshuura egyo.
Shaba ou orikubuurira kushoma akacweka k’okubanza yaaba naabaasa. Mushomere ekibuuzo ky’akacweka ako reero musherure hamwe eky’okugarukamu. Mushome bimwe aha byahandiikirwe ebyorekirwe omu kacweka ako ebirikushagika eky’okugarukamu. Mworekye oku oshazire aha ky’okugarukamu omu katabo kaawe.
Mushome akacweka ka kabiri, kwonka hati oshabe ou orikubuurira kuteeraho kusherura eky’okugarukamu ky’ekibuuzo kyako.
Mwebaze kandi okore entebeekanisa kugarukayo muheze eishomo.
Kyaba nikibaasika, mworekye vidiyo eri aha mukura jw.org eine omutwe, Niki Ekirikutwarirwa omu Kwegyesibwa Baibuli?

Teeraho Kukora Eki Okwezi Oku:

Shaba Yehova kukuhwera kutunga omuntu musya w’okwegyesa Baibuli.—Fil. 2:13.
Teeraho kworeka omuntu oku arikubaasa kwega Baibuli orikukoresa akatabo Eki Baibuli Erikwegyesa, nari mworekye vidiyo Niki Ekirikutwarirwa omu Kwegyesibwa Baibuli? omurundi nka gumwe waaba ori omu kubuurira.