Okwegyesa Gye Abeegi ba Baibuli
1. Ababuurizi abaine abeegi ba Baibuli baine bujunaanizibwa ki?
1 Tihaine orikubaasa kuheereza Yehova yaaba “atamwiriize haihi.” (Yoh. 6:44) N’obu kiraabe kiri kityo, ababuurizi abaine abeegi ba Baibuli baine kuteeraho kuhikiiriza obujunaanizibwa bwabo kuhwera abantu kwirira haihi Ruhanga. (Yak. 4:8) Eki nikyetengyesa okutebeekanisa. Okushoma buri kacweka n’okubuuza ebibuuzo byonka tibirikuhwera abeegi baitu ba Baibuli kwetegyereza amazima n’okutunguuka.
2. Okwegyesa gye omwegi wa Baibuli nikihwera kita?
2 Kubaasa kwegyesa gye abeegi ba Baibuli, ababuurizi baine kuhwera abeegi baabo (1) kwetegyereza eki Baibuli erikwegyesa, (2) kwikiriza eki Baibuli erikwegyesa, hamwe (3) n’okugyendera aha ki Baibuli erikwegyesa. (Yoh. 3:16; 17:3; Yak. 2:26) Nikibaasa kutwara ameezi kuhwera omuntu kubaasa kukora ebintu ebi. Kwonka buri kimwe ahari ebyo ni kikuru omu kugira omukago murungi na Ruhanga n’okwehayo ahariwe.
3. Ahabw’enki abarikwegyesa gye nibabuuza omuntu kugamba eki arikuteekateeka?
3 Niki Eki Omwegi wa Baibuli Arikuteekateeka?: Kubaasa kwetegyereza yaaba omwegi wa Baibuli naakunda ebi arikwega, yetantare kuba niiwe waaguma noogamba kandi muhigye kugamba eki arikuteekateeka. (Yak. 1:19) Naayetegyereza eki Baibuli erikwegyesa aha nshonga ei murikugaaniiraho? Naabaasa kushoboorora enshonga egyo omu bigambo bye? Naatwara ata ebi ayegire? Naikiriza ngu eki Baibuli erikwegyesa kihikire? (1 Tes. 2:13) Naayetegyereza ngu ebi arikwega bishemereire kumureetera kuhindura aha mitwarize ye? (Kol. 3:10) Kubaasa kutunga eby’okugarukamu by’ebibuuzo ebi, twine kubuuza omwegi kugamba eki arikuteekateeka reero tukahurikiza gye.—Mat. 16:13-16.
4. Nitubaasa kukora ki, kyaba nikigumira omwegi kwetegyereza ebi arikwega omu Baibuli nari kubigyenderaho?
4 Emize n’emiteekateekyere mibi bigumire eicwa kandi nibitwara obwire kubyebwa. (2 Kor. 10:5) Kandi shi omwegi waawe ku yaakuba atarikwikiriza ebi arikwega nari atarikubigyenderaho? Okugumisiriza nikwetengyesa kugira ngu haahingureho obwire Ekigambo kya Ruhanga n’omwoyo gwe gurikwera bibaase kukora aha mutima gw’omwegi. (1 Kor. 3:6, 7; Heb. 4:12) Omu mwanya gw’okugyemesereza omwegi wa Baibuli yaaba atarikwetegyereza enyegyesa ya Baibuli emwe nari atarikugigyenderaho, nikiba kiri kirungi kuza aha nshonga endiijo. Twagumisiriza kandi tukagumizamu nitumwegyesa Baibuli twine rukundo, naabaasa kurugaho akore empindahinduka ezirikwetengyesa.