2 | ‘Okuhuumurizibwa Ebyahandiikirwe’

BAIBULI NEEGIRA ETI: ‘Ebyahandiikirwe ira byona bikahandiikwa kutwegyesa, ngu tubone kugira amatsiko ahabw’okugumisiriza, n’ahabw’okuhuumurizibwa Ebyahandiikirwe ebyo.’ —ABAROOMA 15:4.

Eki Kirikumanyisa

Baibuli erimu ebirikubaasa kutuhuumuriza kandi ebirikutuhwera kuhama n’okugumisiriza twagira emiteekateekyere etahikire. Kandi obutumwa bwa Baibuli oburikworeka ngu juba nihaija kuba hatariho ebirikutureetera kwehurira kubi nibutuha amatsiko.

Oku Birikubaasa Kukuhwera

Twena hariho obu turikugira amaganya, kwonka abaine oburemeezi bw’amaganya nari okwerarikirira nibakira kwehurira kubi. Baibuli neebaasa kukuhwera eta?

Baibuli erimu emiteekateekyere erikubaasa kutuhwera kusingura okwehurira kubi. (Abafilipi 4:8) Nitubaasa kushangamu ebirikubaasa kutuhwera kwehurira gye.—Zaaburi 94:18, 19.
Baibuli neebaasa kutuhwera kusingura enyehurira z’okwereeba nk’abataine mugasho.—Luka 12:6, 7.
Ebyahandiikirwe nibituhamiza ngu tituri twenka kandi Ruhanga, Omuhangi waitu naayetegyereza gye oku turikwehurira.—Zaaburi 34:18; 1 Yohaana 3:19, 20.
Baibuli neeraganisa ngu Ruhanga naija kumaraho byona ebirikutureetera kwehurira kubi. (Isaaya 65:17; Okushuuruurwa 21:4) Twaba twine ebiteekateeko n’enyehurira ezirikutureetera kugira amaganya, ekiragaaniso eki nikituhwera kugumisiriza.

Oku Baibuli Erikuhwera Jessica

Oku Ndikukwatwaho okugira amaganya

“Obu naabaire nyine 25 nkarwara endwara y’omutwe, kandi bakancebera baashanga nyine endwara y’amaganya. Nkaba ninkira kuteekateeka aha bintu bibi ebyabaireho enyima. Abashaho bakampwera kumanya ngu amaganya agu naabaire nyine nigareetwa ebintu ebi naarabiremu. N’obu ndaabe naatungire obujanjabi nkaba nyine kugambaho n’omushaho otendekirwe gye kumpwera kuhindura emiteekateekyere yangye etahikire.”

Oku Baibuli Erikumpwera

“Ku naabaire ngira amaganya maingi, nkaba nkangarana, nyerarikirira munonga, kandi mburwa obutuuro. Omu kiro nkaba nteganisibwa emiteekateekyere etahikire. Nk’oku Zaaburi 94:19 erikushoborora, Ruhanga naabaasa kutuhuumuriza, kutugwisa gye twarengwa amaganya. Nkaba nta Baibuli na katabo kangye aku ndikuhandiikamu ebyahandiikirwe ebirikungumya haihi n’ekitanda kyangye. Ku naabaire mburwa oturo nkaba nshoma Baibuli nyikiriza ebiteekateeko bya Yehova kumpuumuriza.

“Baibuli neetuhiga kweihamu ebiteekateeko ebitarikuhikaana n’ebi turikumanya ahari Ruhanga. Enyima, nkaba niimanyira kimwe ngu tinyine mugasho, kandi tindikukundwa. Kwonka nyegire ngu emiteekateekyere egyo neetaana n’enyegyesa ya Baibuli erikworeka ngu, Ruhanga ni Tataitwe owa rukundo, omunyambabazi kandi orikufayo ahari buri omwe. Mporampora ntandikire kutegyeka emiteekateekyere yangye omu mwanya gw’okwikiriza ngu entegyeke. Nyegire kwereeba nk’oku Ruhanga arikundeeba. Eki kimpweraire kusingura emiteekateekyere ei naabaire nyine.

“Nyine ekihika ky’okureeba obu okwijuka ebintu bibi n’okugira ebiteekateeko bitahikire kuraahwereho kimwe. Okumanya ngu endwara z’omutwe niziza kuhweraho kimwe n’okugira amatsiko aha biro by’omumaisho, nibimpwera kwemera obweremwa bwangye kuhitsya obu ndasingurire kimwe amaganya.”