3 | Yegyera aha Barikugambwaho omu Baibuli

BAIBULI NEEGAMBA . . . Aha bashaija n’abakazi abeesigwa abaabaire baine enyehurira nk’ezaitu. —YAKOBO 5:17.

Eki Kirikumanyisa

Baibuli erimu eby’okureeberaho by’abashaija n’abakazi abaabaire baine enyehurira zitarikushushana. Twashoma ebirikubakwataho, nitubaasa kwetegyereza ngu bakahikwaho embeera nk’ezaitu.

Oku eki Kirikubaasa Kuhwera

Twena nituba nitwenda ngu abandi beetegyereze oku turikwehurira. Kandi eki nikyetengyesa na munonga twaba nituteganisibwa endwara y’omutwe. Twashoma aha barikugambwaho omu Baibuli, nitubaasa kumanya oku baabaire nibateekateeka n’oku baabaire nibeehurira reero tubeegyereho. N’ekirikurugamu, nitwetegyereza ngu twaba twine amaganya kandi turikwehurira kubi nituba tutari twenka.

Omu Baibuli harimu ebigambo by’abantu abaabaire nibeehurira nk’abataine kihwera kandi beetamirwe. Oreehurireho nk’otarikubaasa kwemera embeera ei orimu? Musa, Eliya na Daudi nikwo baayehuriire.—Okubara 11:14; 1 Abagabe 19:4; Zaaburi 55:4.
Baibuli neegamba aha mukazi orikwetwa Haana owaabaire “aine obusaasi bwingi” ahabw’okuba akaba atarikubaasa kuzaara kandi muka iba arikumutwariza kubi.—1 Samueli 1:6, 10.
Baibuli neegamba aha mushaija orikwetwa Yobu owaabaire aine enyehurira nk’ezaitu. N’obu araabe yaabaire aine okwikiriza kuhami omuri Yehova akagira amaganya maingi, yaahika n’aha kugira ati: “Amagara gangye ngatamirwe, tinkyenda kugumaho.”—Yobu 7:16.

Twayetegyereza oku abantu abo baasingwire emiteekateekyere mibi, naitwe nitubaasa kugira amaani g’okwemera amaganya agu turikugira.

Oku Baibuli Erikuhwera Kevin

Oku Ndikukwatwaho Endwara y’Okurahuka Kuhinduka omu Nyehurira n’Ebiteekateeko

“Ku naabaire ndi haihi kuhitsya emyaka 50 nkagira endwara y’okurahuka kuhinduka omu nyehurira n’ebiteekateeko. Haine obu ndikuhurira ngu nimbaasa kusingura oburemeezi bwona obu nyine. Kwonka obumwe, nimpurira ntarikwenda kuguma mpuriire.”

Oku Baibuli Erikumpwera

“Ondiijo orikugambwaho omu Baibuli ou ndikwegyeraho n’entumwa Petero. Akakora enshobe ezamureeteire kwehurira nk’otaine mugasho. Kwonka omu mwanya gw’okuguma naayehurira atyo, akateeraho kuba n’abanywani abaabaire nibamufaho. Ku ndikwehurira kubi ahabw’endwara egyo, obutahikiirira bwangye nibundeetera kwereeba nk’otaine mugasho. Kwonka nka Petero, niinteeraho kuteetaanisa ahari banywani bangye abarikumpwera kutahanika.

“Ondiijo orikugambwaho omu Baibuli orikumpumuriza n’Omugabe Daudi. Obumwe akaba agira amaganya kandi ayefuuza ahabw’enshobe ezi yaakozire enyima. Ninyehurira nkawe ahabw’okuba obumwe ninkora nari ningamba ebintu ebirikundetera kwefuuza. Ebigambo bya Daudi ebiri omu Zaaburi 51 nibimpumuriza. Omu mushororongo gwa 3, Daudi akagira ati: “Niinyemera eby’okushiisha byangye, n’ekibi kyangye kiri omu maisho gangye obutoosha.” Oku nikwo ndikwehurira naaba nyine amaganya, nikiingumira kwegiraho emiteekateekyere mirungi. Kwonka ebigambo bya Daudi ebiri omu in mushororongo gwa 10 nabyo nibimpwera: “Ompangyemu omutima ogushemeire, ai Ruhanga, ogarure omwoyo murungi omunda yangye.” Ninkoresa ebigambo nk’ebyo naaba ninshaba Ruhanga ngu ampwere kwegiraho emiteekateekyere mirungi. Omushororongo gwa 17 nagwo nigumpumuriza. Nigugira guti: ‘Omutima oguhendekire, ogweteisiize kimwe, ai Ruhanga, torigugaya.’ Omushororongo ogu nigumpamiza ngu Ruhanga naankunda.

“Ku ndikuteekateeka aha by’okureeberaho eby’omu Baibuli n’ebi Ruhanga ankoreire, amatsiko gangye aha biro by’omumaisho nigahama. Nimpamiza kimwe ebi Baibuli erikuraganisa kandi ekyo nikimpwera kutahanika.”