1 | Okushaba—“Mumwegyekyerere Okushoberwa Kwanyu Kwona”

BAIBULI NEEGIRA ETI: ‘Mwegyekyerere [Ruhanga] okushoberwa kwanyu kwona, ahabw’okuba naabataho omutima.’—1 PETERO 5:7.

Eki Kirikumanyisa

Yehova naatushaba kumugambira byona ebituri omu biteekateeko n’omu mutima ebirikutwerarikiriza. (Zaaburi 55:22) Nitubaasa kumugambira oburemeezi bwona yaaba ni buhango nari bukye. Kyaba kiri kikuru ahariiwe, ni kikuru ahari Yehova. Kubaasa kutunga obusingye bw’omu biteekateeko ni kikuru kushaba.—Abafilipi 4:6, 7.

Oku Okushaba Kurikubaasa Kukuhwera

Twaba twine endwara y’omutwe, nitubaasa kwehurira turi twenka. Abantu abandi nibaba batarikumanya embeera ei turikuba niturabamu. (Enfumu 14:10) Kwonka twagambira Ruhanga oku turikwehurira omu kushaba, naija kutugirira embabazi kandi atwetegyereze. Yehova naatureeba, naamanya obusaasi n’oburemeezi bwaitu, kandi naayenda ngu tumushabe tumugambire byona ebirikutwerarikiriza.—2 Obusingye 6:29, 30.

Okushaba Yehova nikuhamya obwesigye bwaitu ngu naatufaho. Nitubaasa kwehurira nk’omuhandiiki wa zaaburi owaashabire ati: “Okareeba obusaasi bwangye, waamanya enaku zangye.” (Zaaburi 31:7) Okumanya ngu Yehova naareeba ebi turikurabamu nikibaasa kutuhwera kwemera embeera zigumire. Kwonka naakora ekirikukira aha kureeba oburemeezi bwaitu. Naayetegyereza gye ebi turikurabamu kandi naatuhwera kutunga okuhuumurizibwa omu Baibuli.

Oku Baibuli Erikuhwera Julian

Oku Ndikukwatwaho Okwerarikirira

“Ninteganisibwa okwerarikirira hamwe n’ebiteekateeko ebirikundetera kugira amaganya maingi. Niinyerarikirira kitaraariire. Omu kaanya kakye nimba ndi gye, kwonka bwanyima nyerarikirira ekirenga hataine kibaireho. Ninkira kwerarikirira naaba ndi omu bantu. Ninta omutima aha ki abandi barikunteekateekaho.

“Abarikwetegyereza embeera yangye nibateeraho kumpwera. Amazima gari ngu, obumwe nibagamba ebi ndikuba ntarikwenda kuhurira. Kwonka nimbasiima ahabw’okworeka ngu nibanfaho.

“Obumwe okwerarikirira hamwe n’ebiteekateeko ebirikundetera kugira amaganya nibindeetera kugumirwa kushaba. Nimba nyine kuteeraho munonga kutahuga naaba ninshaba Yehova. Ninteekateeka aha bintu bingi omurundi gumwe kindeetera kushoberwa. Ekyo kyabaho, ningumirwa kushoboorora eki ndikuteekateeka n’oku ndikwehurira.”

Oku Baibuli Erikumpwera

“Omu kweyegyesa Baibuli nyetegyereize ngu tikirikwetengyesa kuba omugambi murungi nari kugamba bingi omu kushaba kubaasa kuhurirwa Ruhanga. Obumwe, ku ndikuba ntarikubaasa kugamba oku ndikwehurira, ninshaba nti: ‘Yehova, nyabura ‘we mpwera.’ Kandi nabwo niimanya ngu Yehova naanyetegyereza gye kandi naampa eki ndikumushaba. Ekindi, nkacwamu kusherura obujanjabi. Nyine okushemererwa kwingi ahabw’okugira ngu emiringo egi yoona empweraire, kwongyera kuba gye. Buzima okuteeraho kwangye kushaba Tata ow’omu iguru tikwabusha kandi nindeeba ngu naampwera.