Samueli Akaguma Naakora Ebihikire

Kwiha obu Samueli yaabaire akiri muto, akaguma naaheereza aha hekalu, omu mwanya ogu abantu baabaire baramizamu Yehova kandi arikutuurayo. Noomanya oku Samueli yaizire kuheereza aha hekalu kandi akatuurayo? Ka tubanze twegye ahari nyina Samueli, Hanna.

Hanna akamara emyaka mingi ari engumba, n’obu araabe yaabaire naayenda omwana. Kikamureetera kushaba Yehova arikumweshengyereza ngu amuhe omwana. Akaraganisa ngu yaatunga omwana w’omwojo, naija kumwohereza aha hekalu kutuurayo kandi akaheerezayo. Yehova akagarukamu okushaba kwe, yaazaara omwana w’omwojo yaamweta Samueli. Hanna akakora nk’oku yaaraganiise, ahakuba Samueli ku yaahikize emyaka nk’eshatu nari ena, akamutwara aha hekalu kugumayo naaheereza Ruhanga.

Eli niwe yaabaire ari omunyamurwa omukuru aha hekalu. Batabani ba Eli babiri nabo bakaba nibaheerezayo. Hekalu gukaba guri omwanya gw’okuramizamu, kandi abantu abaabaire nibaheerezayo bakaba bashemereire kuba baine emitwarize mirungi. Kwonka batabani ba Eli bo bakaba nibakora ebibi. Samueli akaba areeba ebi baabaire nibakora. Mbwenu shi Samueli nawe akatooreza emitwarize mibi y’abatabani ba Eli?— Ngaaha, akagumizamu naakora ebirungi nk’oku abazaire be baabaire baamwegyeise.

Noogira ngu Eli akaba aine kukorera ki batabani be abo?— Akaba ashemereire kubafubira. Akaba atashemereire kubareka bakaguma nibaheereza aha hekalu. Kwonka ekyo tarakikozire, kandi kikareetera Yehova kugwerwa kubi Eli n’abatabani bombi. Yehova akacwamu kubafubira.

Ekiro kimwe Samueli ku yaabaire abyami, yaahurira omuntu naamweta ati: ‘Samueli!’ Yaimuka yaaza owa Eli, kwonka Eli yaamugira ati: ‘Tinaakweta.’ Eki kikabaho emirundi eshatu. Kwonka aha murundi gwa kashatu, Eli yaagambira Samueli ngu ku araahuurire iraka omurundi ogundi, agire ati: ‘Ndyaha, Yehova, gamba; mpuriire.’ Ekyo nikyo Samueli yaakozire. Yehova yaagira Samueli ati: ‘Gambira Eli ngu ninyija kufubira eka ye ahabw’ebibi ebi bakozire.’ Noogira ngu kikaba kyorobi Samueli kugambira Eli obutumwa obu?— Ngaaha, kikaba kitoorobi. Kwonka n’obu Samueli yaabaire atiinire, akakora eki Yehova yaamugambiire. Kandi eki Yehova yaagambire kikahikiirira. Batabani ba Eli bombi bakaitwa, kandi Eli nawe yaafa.

Samueli akatuteeraho eky’okureeberaho kirungi. Akaguma naakora ebihikire n’obu araabe yaabaire naareeba abandi barikukora ebibi. Kandi shi iwe? Noija kutwaza nka Samueli ogume nookora ebihikire? Waakora otyo, noija kushemeza Yehova hamwe n’abazaire baawe.