Yehova Okugamba na Samueli

Omunyamurwa Omukuru Eli akaba aine abatabani babiri abaabaire nibaheereza nk’abanyamurwa omu ihema. Bakaba nibeetwa Hofuni na Fenehaasi. Bakaba batarikworobera ebiragiro bya Yehova, kandi bakaba nibatwariza kubi abantu. Abaisraeli ku baabaire bareetera Yehova ebitambo, Hofuni na Fenehaasi bakaba batwara enyama enungi. Eli akamanya ebi abaana be baabaire nibakora, kwonka tarabazibiire. Mbwenu shi Yehova akaba naija kureka ebyo biguma ni bibaho?

N’obu Samueli yaabaire ari muto ahari Hofuni na Fenehaasi, tarabatooriize. Yehova akasiima Samueli. Ekiro kimwe Samueli ku yaabaire agwejegyeire, akahurira eiraka niryeta eiziina rye. Akaimuka, yaaza owa Eli, yaamugira ati: ‘Ndi aha.’ Kwonka Eli akamugira ati: ‘Tinaakweta. Garukayo obyame.’ Samueli akagarukayo yaabyama. Bwanyima yaagaruka yaahurira eiraka. Samueli ku yaahuriire eiraka aha murundi gwa kashatu, Eli akamanya ngu akaba ari Yehova owaabaire naayeta Samueli. Eli akagambira Samueli ngu ku araagaruke kuhurira eiraka, agire ati: ‘Gamba, Yehova. Omuheereza waawe ahuriire.’

Samueli akagarukayo yaabyama. Bwanyima akahurira orikumweta ati: ‘Samueli, Samueli!’ Akagarukamu ati: ‘Gamba, ahakuba omuheereza waawe ahuriire.’ Yehova akamugira ati: ‘Gambira Eli ngu ninza kumufubira n’eka ye. Ahakuba naamanya ngu abaana be nibakora ebintu bibi omu ihema, kwonka tarikubazibira.’ Akasheeshe akakuratsireho Samueli akaigura enyigi z’eihema. Akaba atiinire kugambira omunyamurwa omukuru ebi Yehova yaamugambiire. Kwonka Eli akamweta yaamubuuza ati: ‘Mwana wangye, Yehova akugambiire ki? Ngambira byona.’ N’ahabw’ekyo Samueli akagambira Eli buri kimwe.

Samueli akakura, kandi Yehova akaguma nawe. Kuruga aha muheru gw’ensi kuhika aha gundi, Abaisraeli boona bakamanya ngu Yehova akatoorana Samueli kuba nabi kandi omuramuzi.