Ekibonaboneso kya Ikumi

Musa akaraganisa Faraho ngu taragarukye omumaisho gye. Kwonka atakagyenzire akagambira Faraho ati: ‘Nyekiro nk’omu itumbi, abaana ab’aboojo boona ab’emijigaijo ab’omu nsi ya Misri, kuruga aha mwana wa Faraho kuhika aha w’omuhuuku, nibaija kufa.’

Yehova akagambira Abaisraeli kurya eby’okurya by’omutaano. Akagira ati: ‘Mwite empaya y’omwana gw’entaama nari ogw’embuzi, kandi musiige eshagama yaagwo aha biti by’emiryango yaanyu. Mwotsye enyama, kandi mugirye n’omugaati gutatumbisiibwe. Mujware enkaito zaanyu, mwetebeekanise kugyenda. Ekiro eki niinyija kubacungura.’ Abaisraeli ka baine kuba baashemereirwe munonga!

Nyekiro omu itumbi, maraika wa Yehova akaza ahari buri nju omuri Misri. Enju zoona ezaabaire zitasiigire shagama aha biti by’emiryango yaazo, abaana b’aboojo ab’emijigaijo boona bakafa. Kwonka maraika akaba ahingura enju ezitsiigireho eshagama. Eka ez’Abanyamisri zoona, abagaiga n’abooro bakafeerwa omwana w’omujigaijo. Kwonka tihariho mwana n’omwe ow’Abaisraeli owaafiire.

Omwana wa Faraho nawe akafa. Kandi ekyo Faraho akaba atarikubaasa kukigumisiriza. Ahonaaho akagambira Musa na Arooni ati: ‘Mwimukye. Murugye aha. Mugyende muramye Ruhanga waanyu. Mutware n’amatungo gaanyu mugyende.’

Abaisraeli bakaruga Misri okwezi kurikwaka, batebeekanisiibwe omu maka gaabo n’enganda zaabo. Bakaba bari abashaija Abaisraeli 600,000 hamwe n’abakazi baingi n’abaana. Kandi, abantu baingi bakaruga Misri kugira ngu nabo baze kuramya Yehova. Abaisraeli bakarugaho baacungurwa.

Kubaasa kuguma nibaijuka oku Yehova yaabacungwire, bakaba baine kuguma nibaijuka izooba eryo omurundi gumwe buri mwaka. Ekiro ekyo kikaba nikyetwa Okuhingurwaho.