Eky’Okutangaaza aha Nyanja Erikutukura

Faraho ku yaamanyire ngu Abaisraeli baaruga Misri, ahonaaho akahindura ekiteekateeko kye ky’okubaikiriza kugyenda. Akaragiira engabo ze ati: ‘Mutebeekanise ebigaari byangye by’okurwanisa tubakurate. Tubaire tutashemereire kubaikiriza bakagyenda.’ We n’abashaija be bakakuratira Abaisraeli.

Yehova akaba naayebembera abantu be, arikukoresa ekicu omu ihangwe kandi nyekiro arikukoresa omuriro. Akabeebembera yaabahitsya aha Nyanja Erikutukura, kandi yaabagambira kuteera amahema gaabo aho.

Abaisraeli bakareeba Faraho n’eihe rye ribakuratiire. Orubaju orumwe hakaba hariyo enyanja orundi hariyo eihe ry’Abanyamisri. Bakagambira Musa bati: ‘Twaza kufa. Okaba oshemereire kutureka Misri.’ Kwonka Musa akabagira ati: ‘Mutatiina. Mutegyereze mureebe oku Yehova araabajune.’ Buzima, Musa akaba naayesigira kimwe Yehova.

Yehova akagambira Abaisraeli kuruga omu mahema. Ekiro ekyo, Yehova akata ekicu ahagati y’Abanyamisri n’Abaisraeli. Aha rubaju rw’Abanyamisri, bakaba baine omwirima. Kwonka Abaisraeli bakaba baine ekyererezi.

Yehova akagambira Musa kwimutsya omukono gwe ahaiguru y’enyanja. Bwanyima Yehova akareeta omuyaga gw’amaani kumara ekiro kyona. Enyanja ekeebaganisamu kabiri, kandi ahagati hakabaho omuhanda. Abaisraeli baingi baakaraba aha itaka ryomire, ahagati y’ebisiika by’amaizi, baahika seeri.

Eihe rya Faraho rikakuratira Abaisraeli barikuraba aha itaka ryomire. Yehova akabuzabuza eihe rya Faraho. Enziga z’ebigaari byabo zikatandika kucweka. Eihe rikagira riti: ‘Murekye tuhungye! Yehova niwe arikubarwanira.’

Yehova akagambira Musa ati: ‘Gorora omukono gwawe aha nyanja.’ Amaizi gakagaruka, gaashweka eihe rya Banyamisri. Faraho n’abashaija be boona bakafa. Tihariho n’omwe owaatsigireho.

Seeri y’enyanja, abantu baingi bakahimbisa Ruhanga barikweshongora bati: “Niinyeshongorera Mukama, ahakuba asingwire n’ekitiinisa; embaraasi n’ogitembire abinagire omu nyanja.” Abantu ku baabaire nibeshongora, abakazi boona bakateera ebitaasa nibazina. Buri omwe akaba ashemereirwe ahakuba hati bakaba baine obusingye.