Bakanga Kwinamira Ekishushani

Ku haahingwireho obwire Omugabe Nebukadeneeza aherize kuroota aha kishushani, akakora ekishushani kihango eky’ezaabu. Akakyemereza omu ruhita rwa Duura kandi yaayeta abantu bakuru omu nsi egyo, otwariiremu Seduraaka, Mesaaki, na Abedeneego, kuteeranira hamwe omu maisho gaakyo. Omugabe akaragiira ati: ‘Ku muraahurire amaraka g’enzamba, esheegu, n’endingiri, mwinamire ekishushani eki, omuntu weena oraayangye kwinama, naija kunagwa omu kikoomi ky’omuriro ogurikubuguma.’ Mbwenu shi Abaheburaayo bakaba nibaza kwinamira ekishushani, nari bakaba nibaza kuramya Yehova wenka?

Bwanyima omugabe akaragiira kuteera amaraka g’enzamba, esheegu, n’ag’endingiri. Buri omwe akajumara ahansi yaaramya ekishushani ekyo, okwihaho Seduraaka, Mesaaki, na Abedeneego. Bamwe aha bantu aba bakabareeba reero baagambira omugabe bati: ‘Abaheburaayo bashatu baangire kuramya ekishushani.’ Nebukadeneeza akabatumaho kandi yaabagira ati: ‘Naaza kubaha akagisha akandi muramye ekishushani eki. Mwaba mutakikozire, niinyija kubanaga omu kikoomi ky’omuriro ogurikubuguma. Tihariho ruhanga oraabaase kubajuna akabaanyiha omu mikono.’ Bakamugarukamu bati: ‘Titurikwetenga akagisha akandi. Ruhanga waitu naabaasa kutujuna. Kandi n’obu yaakuba atatujunire, Nyakusinga omugabe, titurikwija kuramya ekishushani eki.’

Nebukadeneeza akagira ekiniga kingi. Akagambira engabo ze ati: ‘Mukoomeere omuriro gwake n’amaani okukira oku gutwire nigwaka emirundi mushanju.’ Bwanyima akaragiira abaserukare be ati: ‘Mubohe abashaija aba, mubanagye omu muriro.’ Ahabw’okugira ngu omuriro gukaba nigwaka munonga, abaserukare abaagwiraire haihi bakafa ahonaaho. Abaheburaayo bakabanaga omu muriro. Kwonka Nebukadeneeza ku yaareebire omu muriro ogwo, yaareeba abashaija bana nibagyendagyenda omu kikoomi. Akatangaara munonga reero yaabuuza abahi b’obwengye be ati: ‘Hari abashaija abu twanaga omu muriro baaba batari bashatu? Nindeeba bana, kandi omwe ahari bo naareebeka nka maraika.’

Nebukadeneeza akairira haihi n’ekikoomi ky’omuriro yaabeeta ati: ‘Imwe abairu ba Ruhanga Orikukira Boona, nimushohore.’ Buri omwe akatangaara kureeba Seduraaka, Mesaaki, na Abedeneego nibaruga omu kikoomi ky’omuriro hataine eki babaireho. Omubiri gwabo, eishokye, n’ebijwaro byabo tibiraheire, kandi omuriro gukaba gutarikubanuukaho.

Nebukadeneeza akagira ati: ‘Ruhanga wa Seduraaka, Mesaaki na Abedeneego n’ow’amaani. Yaayohereza maraika we yaabajuna. Tihariho ruhanga ori nka Ruhanga waabo.’

Nka Abaheburaayo bashatu, omaririire kuhamira ahari Yehova n’obu haakubaho ki?