Omuntu Weena Naija Kwekorera Omugugu gwe Wenka
‘Buri omwe omuriitwe naija kwegambira, naayetonganira ahari Ruhanga.’—ABAROOMA 14:12.
1. Abaheburaayo bashatu bakaba baine bujunaanizibwa ki?
Abatsigazi Abaheburaayo bashatu abaabaire nibatuura omuri Babulooni bakaba baine kucwamu aha nshonga nkuru eyabaire neebaasa kubareetera kwitwa. Mbwenu shi bakaba nibaza kworobera ekiragiro ky’omugabe bakainamira ekishushani kihango? Nari bakaba nibaza kwanga kukiramya banagwe omu kikoomi ky’omuriro? Seduraaka, Mesaaki na Abedeneego bakaba bataine bwire bw’okwebuuza aha muntu weena, kandi kikaba kitarikwetengyesa kwebuuza aha muntu weena. Ahonaaho, bakagira bati: “Nyakusinga, okimanyire kimwe ku tutarikwija kuheereza baaruhanga baawe, n’obu kwakuba okuramya ekishushani ky’ezaabu eki oyemereize.” (Danieli 3:1-18) Abaheburaayo bashatu abo bakeekorera omutwaro gwabo.
2. Ni baahi abaacwerairemu Pilato aha bikwatiraine na Yesu Kristo, kandi eki kikamwihaho orubanja?
2 Bwanyima y’ebyasha mukaaga, omutegyeki akaba ahuriire ebirikukwata aha mushaija omwe ou baabaire niboomesereza. Ku yaayongyeire kushwijuma obuhame, akeetegyereza ngu omushaija ogwo akaba ataine rubanja. Kwonka abantu bakaba nibenda ngu aitwe. Omutegyeki akateeraho kwanga, kwonka bwanyima akaikiriza okugyemeserezibwa kw’abantu, yaayanga kwikiriza kwekorera omutwaro gwe. Akanaaba engaro ze, yaagira ati: “Tiinyine rubanja ahabw’eshagama y’omuntu ogu ohikiriire.” Reero akahayo omushaija ogwo ngu aitwe. Eego, Pontio Pilaato omu mwanya gw’okwikiriza obujunaanizibwa bwe akacwamu aha nshonga erikukwata ahari Yesu Kristo, akaikiriza abandi kumucweramu. N’obu araabe yaanaabire engaro ze n’amaizi, akaba atarikubaasa kweihaho orubanja ahabw’okwita omushaija otaine mushango.—Matayo 27:11-26; Luka 23:13-25.
3. Ahabw’enki tutaine kwikiriza abandi kutucweramu?
3 Kandi shi iwe? Waaba oine kugira eki waacwamu, ori nk’Abaheburaayo bashatu, nari noikiriza abandi kukucweramu? Okucwamu ti kyorobi. Oshemereire kuba okuzire omu biteekateeko kubaasa kucwamu gye. Nk’eky’okureeberaho, abazaire baine kucweramu gye abaana baabo abakiri bato. Nitumanya ngu omu mbeera ezimwe ezigumire munonga nari haaba nihatwariramu ebintu bingi, nikiba kitoorobi kucwamu aha nshonga. Kwonka, obujunaanizibwa bw’okucwamu ti bw’amaani munonga nk’okwekorera omugugu agu abaine obushoboorozi baine kwekorera.. (Abagalatia 6:1, 2)Kureka, aha bikwatiraine n’omugugu ogwo, ‘buri omwe omuriitwe naija kwegambira, naayetonganira ahari Ruhanga.’(Abarooma 14:12) Baibuli neegira ngu ‘omuntu weena naija kwekorera [omugugu] gwe wenka.’ (Abagalatia 6:5) Mbwenu shi, nitubaasa kucwamu gye tuta? Eky’okubanza, twine kumanya obutahikiirira bwaitu, n’oku turikubaasa kubusingura.
Ekirikwetengyesa Ekikuru
4. N’eishomo ki erikuru eririkukwata aha kucwamu eri twine kwegyera aha bugomi bw’abantu b’okubanza?
4 Ira munonga, abantu babiri ab’okubanza bakacwamu omu muringo ogwareetsireho oburemeezi bw’amaani. Bakacwamu kurya ekijuma ky’omuti gw’okumanya ekirungi n’ekibi. (Okutandika 2:16, 17) Ahabw’enki baacwiremu batyo? Baibuli neegira eti: “Omukazi ku yaareebire omuti guri murungi kurya, nigushemeza amaisho, kandi nigwetengwa ahabw’okuha omuntu obwengye, yaacwa aha bijuma byagwo, yaarya, yaahaho na iba, nawe yaarya.” (Okutandika 3:6) Haawa akacwamu ahabw’okweyendeza. Kandi Adamu akamwegaitaho. N’ahabw’ekyo, ekibi n’okufa ‘bikabuga omu bantu boona.’ (Abarooma 5:12) Okushiisha kw’Adamu na Haawa nikutwegyesa eishomo rikuru aha bugarukiro bw’abantu. Twayanga kugyendera aha buhabuzi bwa Ruhanga, nitucwamu kubi.
5. Yehova atuhaire buhabuzi ki, kandi twine kukora ki kubaasa kubugasirwamu?
5 Nikishemeza kureeba ngu Yehova Ruhanga agumire naatuha obuhabuzi. Ebyahandiikirwe nibigira biti: ‘Kandi ku muritoora aha mukono gwa buryo nari aha gwa bumosho, amatu gaanyu nigaija kuguma nigahurira ekigambo nikibareetwa enyima nikigira kiti: “Ogu nigwo muhanda, mube nigwo mwahamya.” (Isaaya 30:21) Yehova naagamba naitwe kurabira omu Kigambo kye Baibuli. Twine kweyegyesa Ekigambo kye kubaasa kukyetegyereza tukatunga obwengye. Kubaasa kucwamu gye, twine ‘kurya eby’okurya ebigumire ebishemereire abakuru.’ Reero mporampora emitima yaitu neija kumanyiira kutaanisa ekirungi n’ekibi. (Abaheburaayo 5:14) Nitumanyiiza emitima yaitu turikugyendera aha bi turikwega omu Kigambo kya Ruhanga.
6. Twine kukora ki omuntu waitu w’omunda kubaasa kukora gye?
6 Ekirikutuhwera kucwamu gye n’omuntu waitu w’omunda. Naatuhwera kucwamu aha nshonga, reero bwanyima ‘atushinja, nari atutonganira.’ (Abarooma 2:14, 15) Kwonka omuntu waitu w’omunda kubaasa kukora gye, twine kumanya gye ebiri omu Kigambo kya Ruhanga kandi tukakunda kugyendera aha bi turikwegamu. Omuntu w’omunda otatendekirwe omu muringo ogwo naabaasa kugyemeserezibwa kwikiriza emitwarize n’emize y’abantu abatwetooroire. Emiteekateekyere y’abantu abatwehinguririize nayo neebaasa kutuhabisa. Niki ekirikuhika aha muntu waitu w’omunda twaguma nitwehuzya emitindo ya Ruhanga n’obu twakuba nitweshinja? Mporampora, naarekyera aho kukora, aba nk’omubiri ‘ogusiriiziibwe ekyoma ekirikwotsya’ ogutakihurira busaasi. (1 Timoseo 4:2) Kwonka omuntu w’omunda otendekirwe Ekigambo kya Ruhanga naatuhwera kucwamu gye.
7. Ni kintu ki ekikuru ekirikwetengyesa omu kucwamu gye?
7 N’ahabw’ekyo kubaasa kuhikiiriza obujunaanizibwa bw’okucwamu gye, ni kikuru kumanya gye Ebyahandiikirwe kandi tukeega n’oku twine kubigyenderaho. Omu mwanya gw’okucweramu eryo aha nshonga, twine kutwara obwire tukabanza twasherura emisingye ya Ruhanga, reero tukateekateeka aha ku turikubaasa kugigyenderaho. N’obu twakuba twine kucwamu ahonaaho, nka Seduraaka, Mesaaki na Abedeneego, nitubaasa kucwamu gye twaba nitumanya gye Ekigambo kya Ruhanga kandi twine omuntu w’omunda otendekirwe gye. Kubaasa kwetegyereza oku okuteeraho kuba abakuzire omu by’omwoyo kirikutuhwera kucwamu gye, ka tureebe embeera z’emiringo ebiri.
Banywani Baitu ni Baahi?
8, 9. (a) Ni misingye ki erikubaasa kutuhwera kwetantara emikago mibi? (b) Okugira emikago mibi shi nikimanyisa okukwatanisa n’ab’emicwe mibi bonka? Shoboorora.
8 Entumwa Paulo akahandiika ati: “Mutabeihwabeihwa, ekigombe kibi kishiisha emicwe mirungi.” (1 Abakorinso 15:33) Yesu Kristo akagambira abeegi be ati: “Timuri b’ensi.” (Yohaana 15:19) Emisingye egi neetuhwera kumanya ngu twine kwetantara okumara obwire n’abashambani, abashuma, abasinzi n’abandi abari nk’abo. (1 Abakorinso 6:9, 10) Twayongyera kwega ebiri omu Baibuli, nitwegyereza ngu okumara obwire n’abantu nk’abu turikureeba omu vidiyo, aha tiivi, aha kompyuta nari okubashomaho omu bitabo n’eky’akabi. Nikyo kimwe n’okukwatanisa n’abantu aha Intaneeti abarikushereka eki bari.—Zaaburi 26:4.
9 Kandi shi okukwatanisa n’abantu abarikureebeka nk’abaine emicwe mirungi, kwonka batarikwikiririza omuri Ruhanga? Ebyahandiikirwe nibigira biti: ‘Ensi yoona eri omu butegyeki bw’omubi.’ (1 Yohaana 5:19) Nitwega ngu ekigombe kibi tikirikumanyisa abantu abaine emicwe mibi bonka. N’ahabw’ekyo nituteeraho kuhamya ngu banywani baitu n’abo bonka abarikukunda Yehova.
10. Niki ekirikutuhwera kucwamu gye twaba nitukoragana n’ab’ensi?
10 Titurikubaasa kwetaanisiza kimwe aha bantu boona abatarikuramya Yehova, kandi ekyo tikyo arikutugambira kukora. (Yohaana 17:15) Twaba turi omu kubuurira, aha ishomero, nari twaba turi aha mirimo yaitu nitubugana abantu abatarikuramya Yehova. Omukristaayo ori omu bushwere n’otari muheereza wa Yehova naabaasa kweshanga n’abantu b’ensi okukira Abakristaayo. Kwonka twaba tutendekirwe emisingye ya Baibuli, nitwetegyereza ngu okumara obwire n’abatarikuramya Yehova nikitaana aha kubahindura banywani baitu ab’aha mara. (Yakobo 4:4) N’ahabw’ekyo nitubaasa kucwamu gye aha bikwatiraine n’okuba n’abeegi abandi omu bwire bw’okwejumba omu by’emizaano nk’okuza kuzaana omupiira, okuzina, okuza aha bugyenyi, nari okuza kweshemeza n’abakozi bagyenzi baitu.
Twaba Nitusherura Omurimo
11. Twine kubanza kuteekateeka ahari ki twaba nitucwamu aha bikwatiraine n’omurimo?
11 Okugyendera aha misingye ya Baibuli nikituhwera kucwamu gye twaba nituteeraho kuhikiiriza obujunaanizibwa bwaitu obw’okureeberera amaka gaitu. (1 Timoseo 5:8) Eky’okubanza twine kuteekateeka aha murimo, n’ebirikutwarirwamu omu kugukora. Kigwire okutoorana omurimo ogutarikuhikaana n’emisingye ya Baibuli. N’ahabw’ekyo Abakristaayo tibarikukora emirimo eine akakwate n’okuramya ebishushani, okwiba, okukoresa kubi eshagama, nari ekindi kintu kyona ekirikutaana n’emisingye ya Baibuli. Kandi titurikubaasa kubeiha nari kuryangatanisa abandi n’obu ou turikukorera yaakutugambira kukikora.—Ebyakozirwe 15:29; Okushuuruurwa 21:8.
12, 13. Oyihireho omurimo gwenyini, ni nshonga ezindi enkuru ezi twine kuteekateekaho?
12 Kandi shi omurimo gwaba gutarikuhenda emisingye ya Baibuli? Twayongyera kwega ebiri omu Baibuli nitwegyereza ngu hariho ebindi ebi twine kuteekateekaho. Nk’eky’okureeberaho, omurimo gwatureetera kwejumba omu bintu bigwire, nk’okwakiira abantu omu kitongore ky’okuteera zaara. Twine n’okuteekateeka ahu omushaara gurikuruga, n’omwanya ogu turikukoreramu. Nk’eky’okureeberaho, Omukristaayo orikwekoresa ashemereire kuteera erangi ekanisa emwe ya Kristendomu? Eki shi tikirikworeka ngu naashagika ediini y’ebishuba?—2 Abakorinso 6:14-16.
13 Kandi shi ou turikukorera eizooba rimwe yaikiriza omurimo gw’okuboneza omwanya gw’ediini y’ebishuba? Omu mbeera egi, nituba twine kuteekateeka aha nshonga ezindi nk’obushoboorozi obu twine aha murimo ogwo n’ebirikutwarirwa omu bi turaakore. Kandi shi ku twakuba nitukora omurimo ogundi nk’okutwara amabaruha omu kicweka kyona, otwariiremu n’emyanya erikukorerwamu ebihagaro? Mbwenu shi nituba tutarikugyendera aha musingye oguri omu Matayo 5:45? Kandi titushemereire kwebwa kuteekateeka aha ku omurimo ogwo guraakwate aha muntu waitu w’omunda bwanyima y’obwire. (Abaheburaayo 13:18) Eego, kubaasa kuhikiiriza obujunaanizibwa bwaitu turikucwamu aha nshonga ezirikukwata aha kureeberera eka yaitu twine kwetegyereza emisingye ya Ruhanga kandi tukatendeka omuntu waitu w’omunda.
‘Omwemere omu Mitwarize Yaawe Yoona’
14. Omu kucwamu ni bintu ki ebi twine kuteekateekaho?
14 Kandi shi twaba nitucwamu aha nshonga ezindi, nka yaaba nitwenda kutunga obwegyese obw’ahaiguru, nari yaaba nituza kwikiriza obujanjabi obumwe tukanga obundi? Twaba nitucwamu aha nshonga yoona, twine kuhamya ngu twamanya emisingye ya Baibuli erikukwata aha nshonga egyo, reero tukorese okwetegyereza kureeba oku turikubaasa kugyendera aha misingye egyo omu mbeera yaitu. Omugabe Sulemaani owaabaire aine obwengye bwingi akagira ati: “Yesigye [Yehova] n’omutima gwawe gwona, orekye kwegamira okwetegyereza kwawe ahabwawe, omwemere omu mitwarize yaawe yoona, nawe naija kuguma naatebeekanisa emihanda yaawe yoona.”—Enfumu 3:5, 6.
15. Nitwegyera ki aha Bakristaayo b’ekyasha ky’okubanza aha bikwatirane n’okucwamu?
15 Obwire obwingi, ebi turikucwamu nibikwata n’aha bandi, n’ahabw’ekyo twine kuteekateeka aha nshonga egyo. Nk’eky’okureeberaho, Abakristaayo omu kyasha ky’okubanza bakaba batakiine kworobera Ebiragiro bya Musa. Bakaba nibabaasa kucwamu kurya eby’okurya ebyabaire nibinugwa omu Biragiro bya Musa. Kwonka entumwa Paulo akabagambira aha birikukwata aha nyama y’enyamaishwa ehongyeirwe baaruhanga b’ebishuba ati: “Eby’okurya ku biraabe nibigwisa [kubi] ow’eishe-emwe, tindikwija kurya nyama ebiro byona, ngu ndekye kugwisa ow’eishe-emwe” kubi. (1 Abakorinso 8:11-13) Abakristaayo abo bakahigwa kufayo aha muntu w’omunda ow’abandi kugira ngu batabateeza entsibo. Ebi turikucwamu tibishemereire kuteeza abandi entsibo.—1 Abakorinso 10:29, 32.
Sherura Obwengye bwa Ruhanga
16. Okushaba nikutuhwera kuta omu kucwamu?
16 Ekindi ekirikutuhwera kucwamu gye n’okushaba. Entumwa Yakobo akagira ati: ‘Omuriimwe ku haraabe harimu obuzirwe obwengye, abushabe Ruhanga, oha boona n’omutima ogutarikwima, n’obu kwakuba okweshaanya, kandi naija kubuheebwa.’ (Yakobo 1:5) Nitubaasa kushaba Yehova kutuha obwengye bw’okucwamu gye, twine obwesigye ngu naaza kubutuha. Twagambira Ruhanga ebirikutwerarikiriza kandi tukamushaba kutuha obwengye kumanya oku twine kutwaza, omwoyo gurikwera nigubaasa kutuhwera kwongyera kwetegyereza Ebyahandiikirwe ebi turikushoma kandi gutuhwere kureeba enshonga ezi tutarikubaasa kureeba ahabwaitu.
17. Abandi nibabaasa kutuhwera bata omu kucwamu?
17 Abandi nibabaasa kutuhwera twaba nitucwamu? Eego, Yehova atuhaire ab’eishe-emwe abakuzire omu by’omwoyo omu kibiina. (Abaefeso 4:11, 12) Nitubaasa kubeebuuzaho, na munonga twaba nitucwamu aha nshonga nkuru. Abakuzire omu by’omwoyo kandi abarabire omu mbeera zitari zimwe nibabaasa kutuhwera kumanya emisingye ya Baibuli endiijo erikubaasa kutuhwera kucwamu gye, kandi tukaguma nitwebembeza ebikuru (Abafilipi 1:9, 10) Kwonka hariho eki twine kwetantara. N’okuhamya ngu abandi tibaatucweramu. Obwo n’obujunaanizibwa bwaitu.
Ebirikurugamu shi Butoosha ni Birungi
18. Nitubaasa kugamba ki aha birikuruga omu kucwamu kurungi?
18 Mbwenu shi twacwamu turikwihirira aha misingye ya Baibuli kandi tutarikweshinja, butoosha ebirikurugamu ni birungi? Eego, bwanyima y’obwire. Obumwe omu kubanza ebirikurugamu nibibaasa kutureetera oburemeezi. Seduraaka, Mesaaki na Abedeneego bakaba nibamanya ngu okucwamu kwanga kuramya ekishushani kihango nikibaasa kubareetera kwitwa. (Danieli 3:16-19) N’entumwa ku baagambiire ab’Eishengyero ngu baine kworobera Ruhanga omu mwanya gw’abantu, bakabateera enkoni batakabarekwire. (Abyakozirwe 5:27-29, 40) Kandi ‘obunaku n’ebihikiirizi’ nibibaasa kukwata aha bi turikucwamu. (Omubuurizi 9:11) Twatunga oburemeezi aha bw’okucwamu gye, nitubaasa kugira obwesigye ngu Yehova naija kutuhwera kubwemera kandi ngu naija kutuha emigisha.—2 Abakorinso 4:7.
19. Nitubaasa kwekorera tuta omugugu gwaitu omu kucwamu?
19 N’ahabw’ekyo twaba nitucwamu, twine kusherura emisingye ya Baibuli kandi tukakoresa okwetegyereza kubaasa kugigyenderaho. Buzima nitusiima Yehova ahabw’obuhwezi obu arikutuha arikukoresa omwoyo gwe ogurikwera n’abakuzire omu by’omwoyo abari omu kibiina! Twine obuhwezi obwo, ka tumariirire kuhikiiriza obujunaanizibwa bwaitu turikucwamu gye.
Waayega ki?
• Ni kintu ki ekikuru ekirikwetengyesa kubaasa kucwamu gye?
• Okuba abakuzire omu by’omwoyo nikikwata kita aha banywani abu turikutoorana?
• Ni nshonga ki enkuru ezi twine kuteekateekaho twaba nitucwamu aha bikwatiraine n’emirimo?
• Twine ki ebirikubaasa kutuhwera omu kucwamu?
[Ekishushani]
Obugomi bw’Adamu na Haawa nibutwegyesa eishomo rikuru
[Ekishushani]
Otakacwairemu aha nshonga nkuru, sherura emisingye ya Ruhanga