Cwamu Omu Muringo Gw’obwengye

1, 2. Ku orikuba oine eby’okucwamu, noohurira ota?

BURI izooba nituba twine kucwamu aha bintu bingi. Noohurira ota waaba oine eky’okucwamu? Abamwe nibaba baine ekihika ky’okwecweramu ahari buri kimwe. Nibagira ngu baine obugabe kwecweramu, kandi nibagira ekiniga ondiijo yaayenda kubacweramu. Kwonka abamwe nibatiina kwecweramu aha bintu ebikuru. Abandi nibasherura obuhabuzi omu bitabo, n’aha bahi b’obwengye, kandi bashohoza na sente nyingi okutunga obuhabuzi obwo.

² N’obu ebintu ebimwe biraabe nibireebeka nk’ebi tutarikubaasa kwecweramu, nitumanya ngu hariho ebintu bingi ebi turikubaasa kwecweramu nk’oku turikwenda. (Gal. 6:5) Kwonka, tikugira ngu buri kimwe eki turikucwamu nikiba kihikire nari kiri eky’obwengye.

3. Ni buhabuzi ki obu twine aha bikwatiraine n’okucwamu, kwonka ahabw’enki obumwe nikiba kitoorobi?

³ Nk’abaheereza ba Yehova, nikitushemeza kumanya ngu naatuha obuhabuzi bwingi oburikukwata aha bintu ebikuru. Twagyendera aha buhabuzi obwo, nitucwamu omu muringo ogurikumushemeza kandi naitwe nitugasirwa. Kwonka, nihabaasa kubaho embeera ezimwe ezitarikugambwaho butunu omu Kigambo kya Ruhanga. Mbwenu shi omu mbeera nk’ezo, nitumanya tuta oku twine kucwamu? Nk’eky’okureeberaho, nitumanya ngu titushemereire kwiba. (Efe. 4:28) Kwonka shi niki ekirikutwarirwa omu kwiba? Mbwenu shi nikirugiirira aha muhendo gw’ekintu nari ekigyendererwa? Nitucwamu tuta abamwe baagira ngu tihariho buhabuzi obuhikire aha ku tushemereire kucwamu? Niki ekirikubaasa kutuhwera kucwamu gye?

TEERAHO KUGIRA EMITEEKATEEKYERE MIRUNGI

4. Obumwe nituheebwa buhabuzi ki aha bikwatiraine n’okucwamu?

⁴ Twaba twine kucwamu aha kintu ekiri kikuru, Omukristaayo mugyenzi waitu naabaasa kutugira ngu twine kucwamu omu muringo gw’obwengye. Buzima obwo n’obuhabuzi burungi. Baibuli neeturabura aha bikwatiraine n’okurahukiiriza kucwamu eti: “Weena orahukiiriza, ayereetera obukyene.” (Enf. 21:5) Nikimanyisa ki okucwamu omu muringo gw’obwengye? Mbwenu shi nikimanyisa ngu otware obwire oteekateekye obaase kucwamu gye? Ebi byona ni bikuru omu kucwamu gye, kwonka okucwamu omu muringo gw’obwengye nikikira ahari ekyo.​—Rom. 12:3; 1 Pet. 4:7.

5. Ahabw’enki obumwe nitucwamu ebitahikire?

⁵ Twena obumwe nitukora enshobe omu bi turikucwamu. Ahabw’enki kiri kityo? N’ahabw’okugira ngu twena tukazaarwa twine ekibi kandi tutahikiriire omu mubiri n’omu biteekateeko. (Zab. 51:5; Rom. 3:23) Kandi baingi omuriitwe, tukaba turi bamwe ahari abo ‘abahumiibwe’ Sitaane, kandi tukaba tutarikumanya Yehova n’emitindo ye ey’okuhikiirira. (2 Kor. 4:4; Tit. 3:3) N’ahabw’ekyo, twacwamu kurugiirira aha ki turikuteekateeka ngu nikyo kirungi kandi ekihikire, nitubaasa kuba nitwebeiha n’obu twakuba twakiteekateekaho munonga.​—Enf. 14:12.

6. Niki ekirikubaasa kutuhwera kugira emiteekateekyere mirungi?

⁶ N’obu turaabe tutahikiriire omu mubiri n’omu biteekateeko, Yehova Tataitwe ow’omu iguru we ahikiriire omuri buri kimwe. (Bir. 32:4) Naatubaasisa kwerinda n’okugira emiteekateekyere mirungi. (Shoma 2 Timoseo 1:7.) Nk’Abakristaayo, nitwenda kuteekateeka kandi tukacwamu omu muringo gw’obwengye. Omu mwanya gw’okuhamira aha miteekateekyere yaitu n’enyehurira zaitu twine kutooreza Yehova omu miteekateekyere, enyehurira n’oku arikutwaza.

7, 8. Ha eky’okureeberaho ekirikworeka oku omuntu arikubaasa kucwamu gye n’obu yaakuba naagyemeserezibwa.

⁷ Teekateeka aha ky’okureeberaho eki. Omu bicweka ebimwe abafuruki ku barikuheza kuzaara abaana, nibaboherereza abanyabuzaare baabo ngu bagume nabo reero kibabaasise kuguma aha murimo nibakora sente.a Omukazi owaabaire naatuura omu ihanga erindi, obu yaazaara omwana w’omwojo, akaba naayega Baibuli n’Abajurizi ba Yehova kandi arikukora empindahinduka. Banywani be n’abanyabuzaare bakatandika kumugyemesereza hamwe n’omushaija we ngu batware omwana waabo omu bazaire b’omushaija. Kwonka omu kwega Baibuli kwe, akaba yaayetegyereize ngu nk’omuzaire aine obujunaanizibwa bw’okureeberera omwana we. (Zab. 127:3; Efe. 6:4) Mbwenu shi akaba aine kukuratira eki baingi baabaire nibareeba nk’ekihikire? Nari shi akaba aine kukuratira eki yaabaire naayega omu Baibuli, ekyabaire nikibaasa kumureetera kugira oburemeezi bw’eby’entaasya n’okujumwa abantu? Mbwenu shi okaba noija kukora ki, ku waabaire oriiwe?

⁸ Omukazi ogwo oburemeezi bwe akabugambira Yehova kandi yaamushaba kumuha obuhabuzi. Akagambira n’ogwo owaabaire naamwegyesa Baibuli n’abandi omu kibiina aha buremeezi bwe, kyamuhwera kumanya emiteekateekyere ya Yehova erikukwata aha nshonga egyo. Akeetegyereza n’oburemeezi obu abaana bato barikubaasa kutunga baaba batari n’abazaire baabo. Bwanyima y’okushwijuma enshonga ezo zoona arikuhwerwa Ebyahandiikirwe, akacwamu kuguma n’omwana we. Iba ku yaarebire oku abari omu kibiina barikubaha obuhwezi n’oku omwana arikukura aine amagara marungi, akaikiriza kwega Baibuli yaatandika kwija n’omu nteerane.

9, 10. Nikimanyisa ki okugira emiteekateekyere ehikire, kandi nitubaasa kugigira tuta?

⁹ Eki n’eky’okureeberaho kimwe ekirikworeka ngu okugira emiteekateekyere ehikire tikirikumanyisa okukuratira ebi turikuteekateeka ngu bihikire nari ebi abandi barikuteekateeka ngu bihikire. Omutima n’ebiteekateeko byaitu ebitahikiriire nibibaasa kugyeragyeranisibwa n’eshaaha eri enyima nari omu maisho. Twakuratira eshaaha nk’egyo nitubaasa kutunga oburemeezi bw’amaani. (Yer. 17:9) Twine kushwijuma ebiri omu mutima gwaitu n’ebiteekateeko byaitu, turikubihikaanisa n’emitindo ya Ruhanga ehikiriire.​—Shoma Isaaya 55:8, 9.

¹⁰ Baibuli neetwehanaangiriza eti: “Yesigye MUKAMA n’omutima gwawe gwona, orekye kwegamira okwetegyereza kwawe ahabwawe; omwemere omu mitwarize yaawe yoona, nawe aryaguma naatebeekanisa emihanda yaawe yoona.” (Enf. 3:5, 6) Yetegyereze ebigambo ‘Yesigye Yehova n’omutima gwawe gwona.’ N’ebirikukurataho “orekye kwegamira okwetegyereza kwawe ahabwawe.” Nibyoreka ngu niwe wenka oine emiteekateekyere ehikire. N’ahabw’ekyo twaba twine eky’okucwamu, tushemereire kushwijuma Baibuli kureeba emiteekateekyere ya Ruhanga aha nshonga egyo, reero tukacwamu turikwihirira aha bigirimu. Okugira emiteekateekyere ehikire nikimanyisa okutooreza emiteekateekyere ya Yehova.

TENDEKA OKUBAASA KWAWE OKW’OKWETEGYEREZA

11. Niki ekirikubaasa kutuhwera kucwamu gye?

¹¹ Okwega kucwamu gye tikyorobi. Nikibaasa kuguma na munonga ahari abo abakiri basya omu mazima n’abo abarikutandika kukora empindahinduka omu by’omwoyo. Kwonka abantu nk’abo abu Baibuli erikweta abaana, nibabaasa kutunguuka omu by’omwoyo. Teekateeka aha mwana orikwega kugyenda gye. Ekirikubaasa kumuhwera kusingura n’okuteeraho kugyenda kandi akagumizamu naakikora. Nikyo kimwe n’abo abakiri bato omu by’omwoyo baaba baine eby’okucwamu. Yetegyereze ngu entumwa Paulo akagira ngu abakuru “okubaasa kwabo okw’okwetegyereza kutendekirwe kutaanisa ekibi n’ekirungi kurabira omu kukukoresa.” Ebigambo “kurabira omu kukukoresa” na “kutendekirwe” byona nibyoreka ngu twine kugumizamu nituteeraho, kandi ekyo abasya nikyo baine kukora.​—Shoma Abaheburaayo 5:13, 14, NW.

12. Nitubaasa kwega tuta kucwamu omu muringo oguhikire?

¹² Nk’oku twaba twareebire, buri izooba nituba twine kucwamu aha bintu ebihango n’ebikye. Kurugiirira aha kucondooza okumwe, abantu abarikurenga ebicweka 40 ahari igana tibarikubanza kuteekateeka aha bi barikuza kucwamu, kureka nibacwamu barikwihirira aha bi batwire nibakora. Nk’eky’okureeberaho, buri kasheeshe nooba oine kucwamu emyenda ei oraajware. Eki noobaasa kukireeba nk’ekintu kikye, kandi noobaasa kucwamu otabandize kukiteekateekaho, na munonga waaba ori aha bwira. Kwonka ni kikuru kubanza waakiteekateekaho, okareeba yaaba ebi waajwara nibyo bishemereire abaheereza ba Yehova. (2 Kor. 6:3, 4) Waaba noogura emyenda, noobaasa kuteekateeka aha mishono. Kwonka shi nooteekateeka aha ku erikukureebekyesa nari esente ezi erikugurwa? Waacwamu omu muringo oguhikire omu bintu nk’ebyo, nooba oriyo nootendeka okubaasa kwawe okw’okwetegyereza, ekirikubaasa kukuhwera kucwamu gye omu bintu ebihango.​—Luk. 16:10; 1 Kor. 10:31.

GIRA EKYETENGO KY’OKUKORA EKIHIKIRE

13. Niki ekirikubaasa kutuhwera kuhikiiriza eki twacwamu kukora?

¹³ N’obu twakucwamu omu muringo oguhikire, nabwo nikiba kitoorobi kukora eki twacwamu. Nk’eky’okureeberaho, omuntu naabaasa kuba naayenda kucwa okureetsa, kwonka atarikufayo munonga kukucwa. Twine kumariirira kuhamira aha ki twacwamu kukora. Niki ekirikubaasa kutuhwera kumariirira n’okuhamira aha ki twacwamu kukora? Twine kushaba Yehova kutuhwera.​—Shoma Abafilipi 2:13.

14. Niki ekyahwereire Paulo kutunga amaani g’okukora eki yaabaire naamanya ngu kihikire?

¹⁴ Paulo akaba naamanya ngu tikyorobi kukora ekihikire. Akagira ati: “Nkunda kukora ekirungi, kwonka okukikora kundema.” Akaba naamanya eki aine kukora, kwonka obumwe haine ekyabaire kimuremesa kukikora. Akongyera yaagira ati: “Omu mutima gwangye nsiima ebiragiro bya Ruhanga; kwonka omu ngingo zangye nshangamu ekindi kiragiro ekirwanisa ekiragiro eky’omu bwengye bwangye, kimpindura omuhuuku w’ebiragiro by’ekibi ebiri omu ngingo zangye.” Mbwenu shi akaba ataine matsiko goona? Ngaaha. Ahakuba akagira ati: “Ruhanga asiimwe, ahabwa Yesu Kristo Mukama waitu.” (Rom. 7:18, 22-25) Ahandi akahandiika ati: “Amaani agarikukirira kimwe n’aga Ruhanga.”​—2 Kor. 4:7.

15. Ahabw’enki twine kumariirira kukora ekihikire?

¹⁵ Kubaasa kushemeza Ruhanga, twine kumariirira kukora ekihikire. Ijuka ebigambo bya Eliya ebi yaagambiire abaabaire nibaramya Baali n’eihanga rya Israeli erigomi aha rushozi Karumeeli ebi: “Muryahitsya hi n’okugira emitima ebiri? MUKAMA ku araabe ari Ruhanga, mumukuratire; nari Baali ku araabe ari Ruhanga, mube niwe mwakuratira.” (1 Bag. 18:21) Abaisraeli bakaba nibamanya eki bashemereire kukora kwonka bakaba baine “emitima ebiri.” Okutaana n’ekyo, enyimaho Yoshua akaba ataireho eky’okureeberaho kirungi obu yaagambira Abaisraeli ati: “Ku muraabe nimugira ngu ni kibi okuheereza MUKAMA, eri izooba mutoorane ou muraaheereze . . . kwonka nyowe n’eka yangye nitwija kuguma nituheereza MUKAMA.” (Yos. 24:15) Niki ekyarugire omu kumariirira kwe? Yoshua n’abo abagumire nawe, bakaheebwa omugisha gw’okutaaha omu Nsi Eyaaraganisiibwe, “ensi ey’amate n’obwoki.”​—Yos. 5:6.

WAACWAMU GYE NOIJA KUTUNGA EBIRUNGI

16, 17. Ha eky’okureeberaho kworeka ebirungi ebirikuruga omu kucwamu omu muringo ogurikuhikaana n’ebi Ruhanga akunda.

¹⁶ Teekateeka aha ky’okureeberaho eki. Ow’eishe-emwe oherize kubatizibwa aine omukazi kandi baine abaana bashatu. Eizooba rimwe, omwe aha barikukora n’ow’eishe-emwe ogwo amugambira ngu baze kukora omu kitongore ekirikushashura esente nyingi. Ow’eishe-emwe ateekateeka munonga aha nshonga egyo kandi ashaba Yehova. Omurimo ogu aine n’obu guraabe gutarikushashura esente nyingi, akagutoorana kugira ngu agume atungye obwire omu wiikenda kuza omu nteerane n’okwejumba omu kubuurira n’eka ye. Naamanya ngu naabaasa kutatunga obwire nk’obwo yaikiriza omurimo omusya. Mbwenu shi ku waabaire oriiwe okaba noija kukora ki?

¹⁷ Bwanyima y’okuteekateeka aha ku ekyo kiraashiishe omukago gwe na Yehova, ow’eishe-emwe ogwo acwamu kutaikiriza omurimo ogwo ogurikushashura esente nyingi. Noogira ngu akeefuuza ahabw’okucwamu atyo? Ngaaha buzima. Akamanya ngu ebirungi ebi araatungye hamwe n’eka ye baaba baine omukago murungi na Yehova, nibikira esente nyingi ezi yaakutungire. We n’omukazi we bakashemererwa munonga muhara waabo omukuru ow’emyaka ikumi ku yaabagambiire ngu naabakunda, ngu naakunda ab’eishe-emwe omu kibiina kandi naakunda munonga Yehova. Omwishiki ogwo akagira ngu naayenda kwehayo ahari Yehova kandi abatizibwe. Akagasirwa munonga omu ky’okureeberaho kya ishe eky’okwebembeza okuramya Yehova.

18. Ahabw’enki kiri kikuru kucwamu omu muringo gw’obwengye buri izooba?

¹⁸ Nk’oku Musa yaayebembeire Abaisraeli kubarabya omu ihamba, nikwo na Yesu Kristo atwire naayebembera abaheereza ba Yehova omu nsi ya Sitaane egi kumara emyaka mingi. Nk’oku Yoshua yaayebembeire Abaisraeli kubahitsya omu Nsi Eyaaraganisiibwe, nikwo na Yesu arikwija kwebembera abakuratsi be kubahitsya omu nsi ensya ey’okuhikiirira. (2 Pet. 3:13) N’ahabw’ekyo, obu turi haihi kuza omu nsi ensya, nikiba kitari ky’obwengye kugarukayo enyima aha miteekateekyere, n’emitwarize yaitu eya ira, emitindo, hamwe n’ebigyendererwa byaitu. Obu nibwo bwire kumanya ebi Ruhanga akunda kandi tukabikora. (Rom. 12:2; 2 Kor. 13:5) Ebi orikucwamu kukora buri izooba ka byorekye ngu ori omuntu oshemereire kutunga emigisha ya Ruhanga ey’ebiro byona.​—Shoma Abaheburaayo 10:38, 39.