Cwamu Ebirikuhaisa Ruhanga Ekitiinisa
“Omwerinzi ayetegyereza ahu arikuraba.”—Enf. 14:15.
1, 2. (a) Ni eki twine kuteekateeka omuri byona ebi turikucwamu? (b) Nituza kuswhijuma kibuuzo ki?
NITUKIRA kukikora buri izooba. Kaingi niharugamu oburemeezi bwa kaire kakye. Kwonka obumwe, nikukwata munonga aha magara gaitu. Nitugamba ahari ki? Okucwamu. Omuri byona ebi turikucwamu, bikye nari bihango ekigyendererwa kyaitu ekikuru n’okuhaisa Ruhanga ekitiinisa.—Shoma 1 Abakorinso 10:31.
2 Nikikworobera kucwamu, nari nikikugumira? Twaba nitwenda kutunguuka omu by’omwoyo, twine kwega kutaanisa ekihikire n’ekigwire reero tukacwamu ebirikuhikaana n’ebiturikwikiriza beitu bitari by’ondiijo muntu. (Rom. 12:1, 2; Heb. 5:14) Ni nshonga ki ezindi ezishemereire kutuhiga kwega kucwamu gye? Ahabw’enki obumwe nikiba kigumire kuta omu nkora ebi tucwiremu? Kandi nitubaasa kukora ki kuhamya ngu twacwamu omu muringo ogurikuhaisa Ruhanga ekitiinisa?
Ahabw’enki Twine Kucwamu?
3. Ni eki tutaine kwikiriza kutaahataaha omu kucwamu kwaitu?
3 Twaremwa kucwamu aha mitindo ya Baibuli, abu turikushoma nabo nari abu turikukora nabo nibabaasa kuhendera barikugira ngu titurikuhamiza kimwe ebi turikwikiriza kandi ngu kyorobi kutuhabisa. Nibabaasa kubeiha, nari kwiba reero bateereho kutubeihabeiha ‘kukuratira baingi’ kubegaitaho nari kubahwera omu bikorwa by’abo. (Kur. 23:2) Kwonka, omuntu orikumanya kucwamu omu muringo ogurikuhaisa Ruhanga ekitiinisa tarikwija kwikiriza okutiina nari okwenda kusiimwa abandi kumureetera kutwaza omu muringo ogurikuhakanisa omuntu we ow’omunda otendekirwe Baibuli.—Rom. 13:5.
4. Ahabw’enki abamwe nibabaasa kwenda kutucweramu?
4 Ti boona abarikwenda kutucweramu ngu nibenda kutukora kubi. Banywani baitu, abaine ebigyendererwa birungi nibabaasa kutuhiga kugyendera aha buhabuzi bwabo. Twaba nitutuura hare n’eka yaitu, abanyabuzaare baitu nibaba nibatwendeza okuba gye, n’ahabw’ekyo nibabaasa kwenda kwejumba omu kucwamu kukuru kwona oku turikukora. Nk’eky’okureeberaho, ka tugambe aha bujanjabi. Baibuli neezibira okukoresa kubi eshagama. (Byak. 15:28, 29) Kwonka enshonga ezindi ez’obujanjabi tizirikugambwaho butunu mu Baibuli, n’ahabw’ekyo buri omwe naaba aine kwecweramu obujanjabi obu araikirize nari akanga.a Abakundwa baitu nibabaasa kuba baine emiteekateekyere etarikushushana aha nshonga ezi. Kwonka, baaba nibacwamu aha nshonga ezo, buri Mukristaayo oyehaireyo aine kwekorera “omutwaro gwe” gw’obujunaanizibwa. (Gal. 6:4, 5) Ekigyendererwa kyaitu ekikuru n’okuguma twine omutima ogutarikweshinja omu maisho ga Ruhanga, beitu batari bantu.—1 Tim. 1:5.
5. Nitubaasa kwetantara tuta kushiisha okwikiriza kwaitu?
5 Okweziringa kucwamu nikubaasa kutureetera akabi k’amaani. Entumwa Yakobo akahandiika ngu omuntu otarikucwamu ‘omu mihanda ye taine ahu ahamiire.’ (Yak. 1:8) Omuntu oritwarwatwarwa ebiteekateeko by’abantu ebitarikushushana, naabaasa kugyeragyeranisibwa n’eryato erihabire aha nyanja y’omuyaga mwingi. Buzima kyorobi munonga okwikiriza kw’omuntu nk’ogwo kusiisikara reero akeekwatsa abandi! (1 Tim. 1:19) HNitubaasa kwetantara tuta akabi ako? Twine ‘kuhamibwa omu kwikiriza.” (Shoma Abakolosai 2:6, 7.) Kubaasa kuhamibwa, twine kwega kucwamu omu muringo ogurikworeka okwikiriza kwaitu omu kigambo kya Ruhanga. (2 Tim. 3:14-17) Kwonka shi, niki ekirikubaasa kuturemesa kucwamu gye?
Ekirikureetera Okucwamu Kuguma
6. Okutiina nikutukwataho kuta?
6 Obwoba nibubaasa kutureetera kutiina ngu nitubaasa kucwamu ekigwire, kuremwa, nari kuhemuka omu maisho g’abandi. Ekyo nikyetegyerezibwa. Tihaine orikwenda kucwamu omu muringo mubi, ogurikureetaho oburemeezi nari okuhemuka. N’obu kiraabe kiri kityo, rukundo ei twiniire Ruhanga n’Ekigambo kye neetuhwera kusingura okutiina kwaitu. Mu miringo ki? Rukundo egyo neija kutuhiga obutoosha kwehanuuza omu Kigambo kye n’ebindi bitabo ebirikwegamira ahari Baibuli tutakacwiremu aha nshonga nkuru. Obwo nibwo turaabaase kutuubya aha kukora enshobe. Ahabw’enki? Ahabw’okuba Baibuli neebaasa “kuhaisa otaine bwengye okwerinda, n’omutsigazi okumuha okumanya obwerinzi.”—Enf. 1:4.
7. Omugabe Daudi nitubaasa kumwegyeraho ki?
7 Mbwenu shi butoosha nituza kuba nitucwamu gye? Ngaaha. Twena nitukora enshobe. (Rom. 3:23) Omugabe Daudi, akaba ari omushaija omunyabwengye kandi omwesigwa. Kwonka, obumwe akacwamu kubi kyamureetera yaabonabona hamwe n’abandi. (2 Sam. 12:9-12) N’obu kiraabe kyabaire kiri kityo, Daudi taraikiriize enshobe ze kumuremesa kucwamu ebi Ruhanga arikusiima. (1 Bag. 15:4, 5) Nitubaasa kucwamu gye n’obu twakuba twakozire enshobe enyima, nka Daudi, nitwijuka ngu Yehova naija kwehuzya enshobe zaitu reero atusaasire ebibi byaitu. Naija kugumizamu naashagika abarikumukunda kandi bakamworobera.—Zab. 51:1-4, 7-10.
8. Nitubaasa kwegyera ki aha bi entumwa Paulo yaagambire aha bushwere?
8 Nitubaasa kutuubya okwerarikirira oku twine ahabw’okucwamu. Tuta shi? Turikwijuka ngu butoosha nihaba hariho emiringo mingi y’okucwamu gye. Yetegyereze omuringo ogu Paulo yaagambire aha nshonga y’obushwere. Arikuhwerwa omwoyo gurikwera akahandiika ati: ‘Omuntu weena ku araateekateekye ngu tarikutwaza gye ahabw’okutaza omu bushwere, kandi akuzire ekirikumara, akore eki arikusiima, ataahe omu bushwere, naaba atasiisire. N’ahabw’ekyo orikutaaha omu bushwere naaba akozire gye; kwonka orikureka kubutaahamu, naaba akozire gye munonga.’ (1 Kor. 7:36-38) Paulo akaba naashagika okutaza omu bushwere, kwonka tikyo kihikire kyonka ekyabaire nikibaasa kukorwa.
9. Mbwenu shi twine kuteekateeka aha ku abandi barikureeba eki turikucwamu? Shoboorora.
9 Mbwenu shi tushemereire kufayo aha ku abandi barikureeba okucwamu kwaitu? Omu muringo oguringaniire. Yetegyereze eki Paulo yaagambire aha kurya eby’okurya ebirikubaasa kuba byabaire nibitambirwa ebishushani. Akagira ngu okurya eby’okurya ebyo kikaba kitagwire, kwonka kikaba nikibaasa kuba eky’akabi aha muntu owaabaire aine omuntu ow’omunda otahami. Mbwenu Paulo akamariirira kukora ki? ‘N’ahabw’ekyo eby’okurya ku biraabe nibigwisa ow’eishe-emwe, tindikwija kurya enyama ebiro byona, ngu ndekye kugwisa ow’eishe-emwe.’ (1 Kor. 8:4-13) Naitwe twine kuteekateeka aha ku okucwamu kwaitu kuraakwate aha muntu w’omunda ow’abandi. Kwonka, ekikuru munonga n’oku okucwamu kwaitu kuraakwate aha mukago gwaitu na Yehova. (Shoma Abarooma 14:1-4.) Ni misingye ki ya Baibuli eraatuhwere kucwamu ebirikuhaisa Ruhanga ekitiinisa?
Ebintu Mukaaga Ebirikuhwera omu Kucwamu Gye
10, 11. (a) Nitubaasa kwetantara tuta omweragiro omu ka? (b) Abareeberezi baint kwijuka ki baaba nibacwamu ebirikukwata aha kibiina?
10 Yetantare okugira amaryo. Tutakacwiremu ky’okukora, twine kwebuuza, ‘Niinye nshemereire kucwamu omu nshonga egi?’ Omugabe Sulemaani akahandiika ati: “Amaryo gakuratwa okuhemuka, kwonka obwengye bugirwa abacureezi.’—Enf. 11:2.
11 Abazaire nibabaasa kuha abaana baabo obugabe bw’okugira ebi baayecweramu, kwonka abaana tibaine kwereeba nk’abaine obushoboorozi obwo. (Kol. 3:20) Abakazi n’abazaire abakazi baine obujunaanizibwa buringaniire omu ka kwonka baine kuha ekitiinisa obushoboorozi bwa baibabo. (Enf. 1:8; 31:10-18; Efe. 5:23) Nikyo kimwe, abashaija nabo baine kwijuka ngu obushoboorozi bwabo bwine obugarukiro kandi ngu bari ahansi ya Yesu. (1 Kor. 11:3) Abareeberezi nibacwamu ebirikukwata aha kibiina kyona. Kwonka, nibateeraho “okutarenga ha [Bihandiikirwe]” omu Kigambo kya Ruhanga. (1 Kor. 4:6) Kandi nibagyendera aha buhabuzi obu barikuheebwa omwambari omwesigwa. (Mat. 24:45-47) Nitubaasa kwetantara okwerarikirira n’amaganya twamanya obugarukiro bwaitu tukacwamu ebyo byonka ebi tuhairwe orusa kucwamu.
12. (a) Ahabw’enki twine kucondooza? (b) Shoboorora oku omuntu arikubaasa kucondooza?
12 Condooza. Sulemaani akahandiika ati: “Ebi omweziriki ateekateeka kukora tibibura kureeta mweru, kwonka weena orahukiiriza, ayereetera obukyene.” (Enf. 21:5) Nk’eky’okureeberaho, nooyenda kucwamu aha bikwatiraine na bizinesi yaawe? Otaikiriza enyehurira zaawe kukutegyeka. Sherura byona ebirikukwata aha nshonga egyo, shaba obwengye abahikirweho embeera egyo, kandi oshwijume eki emisingye ya Baibuli erikugamba. (Enf. 20:18) Kubaasa kutebeekanisa gye ebi wa condooza, bihandiikye omu miringo ebiri—ebirungi, n’oburemeezi. Otakacwiremu, “bariirira ebirikutwarirwamu.” (Luk. 14:28) Teekateeka aha ku okucwamu kwawe kuraakwate aha nyentsya yaawe n’aha by’omwoyo byawe. Nikitwara obwire n’amaani kucoondoza. Kwonka waakora otyo, noija kwetantara kuramukiriiza kucwamu omu muringo gw’obushema.’ (Luk. 14:28) Kubaasa kutebeekanisa gye ebi wa condooza, bihandiikye omu miringo ebiri—ebirungi, n’oburemeezi. Otakacwiremu, “bariirira ebirikutwarirwamu.” (Luk. 14:28) Teekateeka aha ku okucwamu kwawe kuraakwate aha nyentsya yaawe n’aha by’omwoyo byawe. Nikitwara obwire n’amaani kucoondoza. Kwonka waakora otyo, noija kwetantara kurahukiriiza kucwamu omu muringo gw’obushema.
13. (a) Nikuhamizibwa ki okuri omu Yakobo 1:5? Okushaba obwengye nikuhwera kuta?
13 Shaba Obwengye. Okucwamu kwaitu nikwija kuhaisa Ruhanga ekitiinisa twamwikiriza kutuhwera kukukora. Yakobo akahandiika ati: ‘Omuriimwe ku haraabe harimu obuzirwe obwengye, abushabe Ruhanga, oha boona n’omutima ogutarikwima, n’obu kwakuba okweshaanya, kandi naija kubuheebwa.” (Yak. 1:5) Okwikiriza ngu nitwenda obwengye bwa Ruhanga kubaasa kucwamu gye tikiine kutwitsa enshoni. (Enf. 3:5, 6) Ahakuba, okwesiga okwetegyereza kwaitu nikibaasa kutuhabisa. Twashaba obwengye kandi tukasherura emisingye omu kigambo kya Ruhanga, nituba nitwikiriza omwoyo ogurikwera kucaaka ebigyendererwa byaitu by’okwenda kugira eki twacwamur real motives for wanting to take a certain course of action.—Heb. 4:12; shoma Yakobo 1:22-25.
14. Ahabw’enki twine kwetantara okutimiimwa?
14 Cwamu. Otakacwiremu banza ocondooze kandi oshabe obwengye. Omunyabwengye naamara obwire ‘arikwetegyereza ahu arikuraba.’ (Enf. 14:15) Kwonka, otakayeziringa. Omuntu orikweziringa naayekwatsakwatsa ahabw’okutagira eki yaakora. (Enf. 22:13) Kwonka nabwo naaba yaacwamu kwikiriza abandi kumutegyeka.
15, 16. Niki ekirikutwarirwa omu kuta omu nkora ebi tucwiremu?
15 Ta omu nkora okucwamu kwawe. Amaani aguturikutamu kucwamu kurungi nigafa busha twaba tutataire omu nkora okucwamu okwo.Sulemaani akahandiika ati “Kyona eki orikwenda kukora n’emikono yaawe, okikore n’amaani.” (Mub. 9:10) Kubaasa kuba abasinguzi, twine kuba tumariirire kuhayo kyona ekirikwetengyesa kuta omu nkora okucwamu kwaitu. Nk’eky’okureeberaho, omubuurizi omu kibiina naabaasa kucwamu kuba payoniya. Mbwenu shi naija kuba omusinguzi? Eego, naija kusingura yaayetantara kumara obwire bwingi aha murimo gw’okwebaisaho, nari omu by’okweshemeza obu yaakubaire naakoresa omu kubuurira.
16 Butoosha, eby’okucwamu birungi nibiba bigumire kuta omu nkora. Ahabw’enki? Ahabw’okuba ‘ensi yoona eri omu butegyeki bw’Omubi.’ (1 Yoh. 5:19) Twine kufukaana “n’amahe g’emyoyo emibi ey’omu myanya y’omu iguru.” (Efe. 6:12) Entumwa Paulo na Yuda, baakoreka ngu boona abarikucwamu kuhaisa Ruhanga ekitiinisa nibaija kusingura okurwana okwo.—1 Tim. 6:12; Jud. 3.
17. Niki eki Yehova arikwenda ngu tukore, twaba nitwenda kucwamu?
17 Shwijuma okucwamu kwawe kandi ohindahinduremu kyayetengyesa. Tiburi kucwamu ngu nikugyenda gye. Twena nituhikwaho “obunaku n’ebihikiirizi. (Mub. 9:11) Kwonka nabwo, Yehova naayenda ngu tuhamire aha kucwamu kwaitu n’obu twakuhikwaho oburemeezi. Okwehayo ahari Yehova nari okukora endagaano y’obushwere n’okucwamu okutarikubaasa kuhinduka. Ruhanga naayenda ngu tuhamire aha kucwamu nk’okwo. (Shoma Zaaburi 15:1, 2, 4.) M.) Kwonka, okucwamu orikukira obwingi, ti kukuru munonga. Omuntu omunyabwengye naaguma naayeyijutsya okucwamu oku akozire. Tarikwikiriza amaryo n’omwetunguuro kumuremesa kuhinduramu okucwamu kwe nari kukushazamu. (Enf. 16:18) Ekikuru ahariwe n’okuhamya ngu ebi arikukora nibihaisa Ruhanga ekitiinisa.
Tendeka Abandi Kucwamu Ebirikuhaisa Ruhanga Ekitiinisa
18. Abazaire nibaasa kutendeka bata abaaana baabo aha bikwatiraine n’okucwamu?
18 Abazaire nibabaasa kukora kihango kuhwera abaana baabo kwega kucwamu ebirikuhaisa Yehova ekitiinisa. Eky’okureeberaho kirungi kya Yesu omwegyesa mukuru. (Luk.6:40) Kyaba nikyetengyesa, abazaire nibabaasa kugambira abaana baabo ebi bakozire kubaasa kucwamu gye. Nibabaasa n’okureka abaana baabo kwecweramu aha nshonga ezimwe, reero babasiime okucwamu kwabo kwarugamu ebirungi. Kandi shi, omwana ku yaakucwamu kubi? Omu kubanza omuzaire naabaasa kwenda kurinda omwana we akabi akarikurugamu. kwonka okukora ekyo obutoosha tikirikuhwera omwana. Nk’eky’okureeberaho, omuzaire naabaasa kwikiriza omwana we kutunga ekihandiiko ekirikumwikiriza kuvuga. Ka tugire ngu omwana yaahenda ekiragiro aha ruguuto reero bamutangisa esente. Omuzaire naabaasa kushashura esente ezo. Kwonka, omwana yaakora kubaasa kushashura esente ezo, nikiija kumuhwera kwega kuba ow’obujunaanizibwa.—Rom. 13:4.
19. Niki eki twine kwegyesa abeegi ba Baibuli, kandi nitubaasa kukikora tuta?
19 Yesu akagambira abeegi be kwegyesa abandi. (Mat. 28:20) Emwe aha nshonga nkuru ezi turikubaasa kwegyesa abeegi baitu n’oku barikubaasa kucwamu gye. Kubaasa kukora ekyo, twine kwetantara okubagambira eky’okukora. Ni kirungi itwe okubeegyesa okushwijuma emisingye ya Baibuli, reero bakeecweramu eki baraakore. Ahakuba, ‘buri omwe omuriitwe naija kwegambira, naayetonganira ahari Ruhanga.’(Rom. 14:12) N’ahabw’ekyo,twena twine enshonga ezirikutuhiga kucwamu ebirikuhaisa Ruhanga ekitiinisa.
[Obugambo obw’Ahansi]
a Kubaasa kushoborokyerwa enshonga egi, reeba ekicweka “Nintwara Nta Obucweka bw’Eshagama n’Obujanjabi Oburikutwariramu Okukoresa Eshagama Yangye?” omu Obuheereza Bwaitu obw’Obukama aka Novemba 2006, orupapura 3-6.
Noobaasa Kugarukamu Ota?
• Ahabw’enki twine kwega oku turikubaasa kucwamu?
• Okutiina nikubaasa kutukwataho kuta, kandi nitubaasa kukusingura tuta?
• Ni bintu ki mukaaga ebi twine kukora kubaasa kucwamu omuringo ogurikuhaisa Ruhanga ekitiinisa?
[Akabokusi/Ekishushani]
Ebintu Mukaaga Ebirikuhwera omu Kucwamu Gye
1 Yetantare okugira amaryo
2 Condooza
3 Shaba Ruhanga obwengye
4 Cwamu
5 Ta omu nkora okucwamu kwawe
6 Shwijuma kandi ohindahinduremu
[Ekishushani]
Omuntu orikubangaanisa ari nk’obwato obutaine akabaaho k’okubworeka ah’okutoora aha nyanja omu bwire bw’eihunga