Okuheereza Yehova Otakahwaire Maani

1, 2. (a) Ni buhabuzi ki obu Ruhanga yaahweraire Sulemaani kuhandiikira eminyeeto? (b) Ahabw’enki obuhabuzi bwa Sulemaani burikukwata n’aha Bakristaayo abari omu myaka 50 n’okukiraho?

OMUGABE SULEMAANI akahwerwa Ruhanga kuhandiikira abaana bato ebigambo ebi: Ogume oijukye Omuhangi waawe omu biro by’obutsigazi bwawe, ebiro bibi bitakaizire.” Mbwenu shi “ebiro bibi” ebi nibiiha? Ebigambo ebi nibikwata aha myaka ya bukuru. Sulemaani akakoresa ebigambo by’enfumu kushoboorora oburemeezi obu abakaikwire baine, nk’okutetema emikono, okutetema amaguru, okukuuka amaino, okutahweza gye, okutahurira gye, okugira enju, n’okwinama omugongo. Tihaine oshemereire kutegyereza akabanza kuhika omu myaka nk’egi reero akabona kuheereza Yehova.​—Shoma Omubuurizi 12:1-5.

² Abakristaayo baingi abari omu myaka ya 50 nibaba bakiine amaani. Nibabaasa kuba baine enju, kwonka batari mu mbeera nk’ei Sulemaani yaagambireho. Mbwenu shi nibabaasa kugasirwa omu buhabuzi obu oburikuheebwa abato oburikugira ngu, “ogume oijukye Omuhangi waawe”? Obuhabuzi obwo nibumanyisa ki?

3. Okwijuka Omuhangi waitu nikitwariramu ki?

³ N’obu turaabe tutwire nituheereza Yehova kumara emyaka mingi, ni kirungi kugira obwire bw’okuteekateeka aha muhangi waitu. Amagara n’ekiconco ky’omutaano. Titurikubaasa kwetegyereza oku ebintu bihangirwe tukakuhezayo. Ebintu bingi ebi Yehova yaahangire nibitubaasisa kugira okushemererwa omu miringo mingi. Twateekateeka aha bihangirwe bya Yehova, nikituhwera kwongyera kusiima rukundo ye, obwengye bwe, n’amaani ge. (Zab. 143:5) Kwonka okwijuka Omuhangi waitu nikitwariramu n’okuteekateeka aha bi arikutwenza. Okuteekateeka aha Muhangi nikutuhwera kwongyera kworeka ngu nitumusiima turikumuheereza nk’oku kirikubaasika twaba tukihuriire.​—Mub. 12:13.

OMUGISHA GW’OMUTAANO OMU MYAKA YA BUKURU

4. Abakristaayo abamazire emyaka mingi barikuheereza Yehova nibabaasa kwebuuza kibuuzo ki, kandi n’ahabw’enki?

⁴ Ku oraabe okuzire kandi omazire obwire buraingwa orikuheereza Yehova, noobaasa kwebuuza ekibuuzo eki, ‘Hati ninyija kukora ki obu nkiine amaani?’ Nk’Omukristaayo omazire obwire bwingi orikuheereza, oine emigisha ei abandi bataine. Noobaasa kwegyesa abato ebi oyegire omu myaka ei omazire orikuheereza Yehova. Noobaasa kugumya abandi orikubagambira ebirungi ebi otungire orikuheereza Yehova. Omugabe Daudi akashaba ngu abaase kukikora. Akahandiika ati: “Ai Ruhanga, okanyegyesa okwiha omu buto bwangye. . . . N’obu ndikura naamera enju, ai Ruhanga, otarintsigaho, okuhitsya obu ndimanyisa amaani gaawe ab’obusingye bwona oburikurataho.”​—Zab. 71:17, 18.

5. Abakristaayo abakuzire nibabaasa kumanyisa bata abandi ebi beegire omu bwire obu bamazire barikuheereza Yehova?

⁵ Ebi oyegire omu myaka yoona ei omazire nooheereza Yehova noobaasa ota kubimanyisa abandi? Noobaasa kutaayaayisa abato abarikuheereza Yehova obamanyise ebirungi ebi otungire omu kuheereza Yehova. Noobaasa kubashaba kubuuriraho nabo kandi okabooreka okushemererwa oku orikutunga omu kubuurira. Elihu owa ira akagira ati: “Ka hagambe abaine ebiro bingi, abamazire emyaka mingi babe nibo baayegyesa obwengye.” (Yob. 32:7) Entumwa Paulo akahiga Abakristaayo abakazi abakuzire kuhiga abandi barikubateeraho eky’okureeberaho kirungi. Akahandiika ati: “Abakaikuru . . . beegyese ebirungi.”​—Tit. 2:3.

NOOBAASA KUHWERA ABANDI

6. Ahabw’enki Abakristaayo abakuzire omu myaka barikwetengyesa omu kibiina?

⁶ Ku oraabe ori Omukristaayo omazire obwire orikuheereza, oine bingi ebirikukubaasisa kuhwera abandi. Teekateeka aha bi orikumanya hati n’ebi waabaire noomanya emyaka 30 nari 40 enyima. Noobaasa kugyendera aha misingye ya Baibuli omu mbeera zitari zimwe na zimwe. Noobaasa kuhika abantu aha mutima orikubeegyesa amazima ga Baibuli. Ku oraabe ori omureeberezi, noomanya kuhwera abandi abarikuba bahabire. (Gal. 6:1) Noobaasa kuba waayegire oku orikubaasa kureeberera emirimo y’ekibiina, enteerane empango, nari omurimo gw’okwombeka Ebyombeko by’Obukama. Noobaasa kuba noomanya kuhiga abashaho kukoresa emiringo y’obujanjabi etarimu kukoresa eshagama. Noobaasa kuba ori musya omu mazima, kwonka oine bingi ebi orikumanya ahabw’okugira ngu ori mukuru omu myaka. Nk’eky’okureeberaho, ku oraabe oine abaana, noomanya bingi aha bikwatiraine n’okubareeberera. Abakristaayo abakuzire omu myaka, nibahwera munonga omu kugumya abaheereza ba Yehova bagyenzi baabo, barikubeegyesa, kubahabura, n’okubahiga.​—Shoma Yobu 12:12.

7. Abakristaayo abakuzire nibabaasa kutendeka bata abo abakiri bato?

⁷ Ni mu miringo ki endiijo ei orikubaasa kuhweramu abandi? Noobaasa kworeka abato oku barikubaasa kutandika kwegyesa abantu Baibuli. Ku oraabe ori munyaanyazi-itwe okuzire, noobaasa kuhwera baanyina abaana kumanya oku barikubaasa kureeberera abaana baabo, kandi bakeefaho n’omu by’omwoyo? Ku oraabe ori ow’eishe-emwe, noobaasa kwegyesa ab’eishe-emwe abato oku barikubaasa kuha embazo baine omuhimbo n’okuba abeegyesa barungi b’amakuru marungi. Noobaasa kubeegyesa kutaayaayira ab’eishe-emwe abakaikwire kubagaruramu amaani omu by’omwoyo. N’obu oraabe otakiine maani nk’agu waabaire oine omu kubanza, oine omugisha gw’okutendeka abato. Ekigambo kya Ruhanga nikigira kiti: “Ekitiinisa ky’abatsigazi n’amaani gaabo, kandi oburungi bw’abagurusi n’enju zaabo.”​—Enf. 20:29.

OKUHEEREZA AHU ABABUURIZI BARIKWETENGWA MUNONGA

8. Niki eki entumwa Paulo yaakozire omu myaka ye ya bukuru?

⁸ Entumwa Paulo akaguma ari omweziriki arikuheereza Ruhanga n’obu yaahikire omu myaka ya bukuru. Ahu yaagiire kurugira omu kihome omuri Rooma nk’omu gwa 61, akaba aheereize munonga kandi ayemeire okuhiiganisibwa kwingi omu buheereza bwe nk’omumiisani. Akaba naabaasa kuguma naabuurira omu Rooma. (2 Kor. 11:23-27) Ab’eishe-emwe omuri Rooma bakaba nibakunda kuguma nawe arikubashagika. Kwonka Paulo akareeba ngu hariho ekyetengo ky’amaani eky’ababuurizi omu mahanga agandi. Ari hamwe na Timoseo na Tito, akagumizamu n’omurimo gwe gw’obumiisani, yaaza Efeso, yaarugayo yaaza Kureete kandi naabaasa n’okuba yaagiire Makedonia. (1 Tim. 1:3; Tit. 1:5) Titurikumanya yaaba yaagiire Spania, kwonka akaba atebeekaniise kuzayo.​—Rom. 15:24, 28.

9. Ni ryari obu Petero arikubaasa kuba yaagiire kuheereza ahu ababuurizi barikwetengwa munonga? (Reeba ekishushani aha kutandika.)

⁹ Entumwa Petero nawe naabaasa kuba yaabaire aine emyaka nka 50 obu yaaza ahu ababuurizi baabaire nibeetengwa munonga. Ahabw’enki turikugira tutyo? Petero ku araabe yaabaire naingana na Yesu obu yaabaire ari omu nsi, nikimanyisa ngu obu Petero yaabugana entumwa bagyenzi be omuri Yerusaalemu omu gwa 49, naabaasa kuba yaabaire aine emyaka nka 50. (Byak. 15:7) Bwanyima y’oruteerane orwo, Petero akaza kutuura omuri Babulooni, kubaasa kubuurira Abayudaaya baingi abaabaire bari omu mwanya ogwo. (Gal. 2:9) Akaba naatuura okwo obu Ruhanga yaamuhwera kuhandiika ebaruha y’okubanza nk’omu gwa 62. (1 Pet. 5:13) Okutuura omu mwanya ogundi tikyorobi, kwonka Petero taraikiriize emyaka ye ya bukuru kumuremesa kuheereza Yehova ashemereirwe.

10, 11. Ha eky’okureeberaho eky’omuntu omwe owaabaire akuzire owaagiire kuheereza ahu ababuurizi barikwetengwa munonga.

¹⁰ Obunaku obu, Abakristaayo abaine emyaka nka 50 n’okukiraho, obumwe embeera zaaba niziba nizibabaasisa kuheereza Yehova omu miringo misya. Abamwe nibaza ahu ababuurizi barikwetengwa munonga. Nk’eky’okureeberaho, Robert akahandiika ati: “Nyowe n’omukazi wangye tukaba turi omu myaka nka 50 obu twamanya ngu hariho bingi ebi turikubaasa kukora. Omwana omwe ou twabaire twine akaba atakituura naitwe, kandi haine obuhunguzi bukye obu twabaire tutungire. Nkabariiria naareeba ngu twaguza enju yaitu esente ezirikurugamu nizimara kushashura eibanja eri twabaire twine kandi zitureeberere kuhitsya obu naakutandikire kushashurwa akasiimo ahabw’okuhuumura aha murimo. Nkahurira ngu omuri Bolivia abantu abarikwenda kwega Baibuli ni baingi kandi enshohoza y’okutuurayo ninkye. Nkacwamu kuzayo. Okumanyiira embeera y’omwanya musya kukaba kutoorobi. Buri kintu kikaba nikitaana aha ki naabaire mmanyiriire omu America ey’obukiizi-bwa-bumosho. Okuteeraho kwaitu kukarugamu ebirungi bingi.”

¹¹ Robert naayongyera agira ati: “Obwire obwingi nituba nitukora emirimo y’ekibiina. Abantu baingi abu twayegire nabo Baibuli bakabatizibwa. Eka emwe ei twayegire nayo baine ebintu bikye eby’okwebaisaho kandi nibatuura hare omu kyaro. Kwonka ab’eka egyo buri saabiiti nibaija omu nteerane omu tauni. Teekateeka aha kushemererwa oku twine ahabw’okureeba ab’eka egyo nibatunguuka omu by’omwoyo kandi n’omwojo omukuru arikuba payoniya.”

OKUHEEREZA OMU KICWEKA AHU BARIKUGAMBA ORURIMI ORUNDI

12, 13. Ha eky’okureeberaho ky’Omukristaayo owaatandikire kuheereza Yehova omu muringo musya bwanyima y’okuhuumura aha murimo.

¹² Ebibiina na zaaguruupu ahu barikukoresa orurimi orundi nibabaasa kugasirwa munonga omu by’okureeberaho by’ab’eishe-emwe abakuzire omu myaka. Kandi ebicweka nk’ebyo nibiba biri birungi by’okubuuriramu. Nk’eky’okureeberaho, Brian akahandiika ati: “Nyowe n’omukazi wangye tukatunga obusingye ku twahikize emyaka 65 ey’okuhuumuriraho emirimo omuri Bungyereza. Mutabani waitu na muhara waitu bakaba batakituura naitwe, kandi kikaba kigumire kutunga abantu b’okwegyesa Baibuli. Bwanyima nkabugana omushaija kuruga China owaabaire aizire kukora okucondooza aha yunivasite eri omu kicweka kyaitu. Akaikiriza kwija omu ruteerane rwaitu, kandi naatandika kumwegyesa Baibuli. Bwanyima ya saabiiti nkye, akatandika kwija na mutaahi we Omuchaina. Bwanyima ya saabiiti ibiri, akaija n’owa kashatu bwanyima yaareeta owa kaana.

¹³ “Ku yaareetsire owa kataano nawe akashaba kwegyesibwa Baibuli, nkateekateeka nti: Ahabw’okugira ngu nyine emyaka 65 tikirikumanyisa ngu nyine kuhuumura nkarekyera aho kuheereza Yehova. N’ahabw’ekyo, nkabuuza omukazi wangye ou naabaire ninkiza emyaka ebiri, ku araabe yaabaire naayenda kwega Oruchaina. Tukaguma nitukoresa ebiri omu maraka kurwega. Ebi bikabaho emyaka ikumi ehingwire. Okubuurira omu kicweka ahu barikugamba orurimi orundi, kikatureetera kwehurira nk’abari bato. Omu myaka egyo yoona, nyegyeise Abachaina 112! Baingi aharibo nibaija omu nteerane. Omwe aharibo naaheereza hamwe naitwe nka payoniya.”

SHEMERERWA AHABW’EKI ORIKUBAASA OKUKORA

14. Niki ekirikubaasa kureetera Abakristaayo abakuzire kushemererwa, kandi eky’okureeberaho kya Paulo nikibaasa kubahwera kita?

¹⁴ N’obu Abakristaayo baingi abari omu myaka 50 barikubaasa kukora bingi omu kuheereza Yehova, ti boona ngu nibabaasa kukikora. Abamwe baine amagara mabi, abamwe nibareeberera abazaire baabo abakaikwire nari nibaba baine abaana abu barikureeberera. Nikibaasa kukushemeza kukimanya ngu Yehova naasiima okuteeraho kwawe kumuheereza. N’ahabw’ekyo, omu mwanya gw’okugira amaganya ahabw’eki otarikubaasa kukora, shemererwa ahabw’ebi orikubaasa kukora. Yetegyereze eky’okureeberaho kya Paulo. Obumwe akamara emyaka mingi akomirwe atarikubaasa kugumizamu n’omurimo gwe gw’obumiisani. Kwonka abantu ku baabaire bamutaayaayira, akaba abagambira ebirikukwata aha Byahandiikirwe kandi abahamya omu kwikiriza.​—Byak. 28:16, 30, 31.

15. Ahabw’enki Abakristaayo abakaikwire n’ab’omuhendo munonga?

¹⁵ Yehova kandi naasiima ebi abakaikwire barikubaasa kukora kumuheereza. N’obu Sulemaani araabe yaagambire aha buremeezi obu abakaikwire barikuba baine, kworeka ngu omu myaka egyo nikiba kitoorobi kuheereza Yehova, Baibuli neeyoreka ngu eki barikukora Yehova naakitwara nka kikuru. (Luk. 21:2-4) Ebibiina nibisiima munonga eky’okureeberaho kyabo ahabw’okuguma bari abeesigwa omu kuheereza Yehova.

16. Ni bintu ki ebi Anna owaabaire akaikwire ataraabaasize kukora, kwonka akakora ki kubaasa kuramya Ruhanga?

¹⁶ Baibuli neegamba aha mukaikuru orikwetwa Anna owaagumire ari omwesigwa arikuheereza Yehova omu myaka ye ya bukuru. Akaba ari omufaakazi w’emyaka 84 obu Yesu yaazaarwa. Naabaasa kuba ataragumireho kumara obwire buraingwa kubaasa kuba omukuratsi wa Yesu, kugira ngu abe omwe aha bashukirweho amajuta, nari kwejumba omu murimo gw’okubuurira amakuru marungi g’Obukama. Kwonka, Anna eki yaabaire naabaasa kukora, akaba naakunda kukikora. ‘Akaba ataruga omuri hekalu, aramya Ruhanga nyomushana na nyekiro.’ (Luk. 2:36, 37) Abanyamurwa ku baabaire baba nibootera obubaane omu hekalu omu kasheeshe n’omu mwabazyo, Anna akaba aba ari omu bantu baingi abaabaire baba barimu arikushaba, obundi okumara nk’ekicweka ky’eshaaha. Ku yaareebire Yesu akiri omwereere, “ab’omuri Yerusaalemu boona abaabaire bategyereza okucungurwa yaabagambira ebya Yesu.”​—Luk. 2:38.

17. Nitubaasa kuhwera tuta Abakristaayo abakaikwire n’abataine magara marungi kwejumba omu kuramya okw’amazima?

¹⁷ Obunaku obu, twine kuteeraho kuhwera Abakristaayo abakaikwire nari abataine magara marungi. Abamwe nibabaasa kuba nibenda kubaho omu nteerane eza butoosha hamwe n’empango, kwonka oshangye ngu tibarikubaasa kukikora obutoosha. Omu bicweka ebimwe, ebibiina nibitaho entebeekanisa kugira ngu abakaikwire bahurikize enteerane barikukoresa esimu. Kwonka omu bicweka ebimwe ekyo tikirikubaasika. N’obu Abakristaayo baakuba batarikubaasa kuza omu nteerane, nibabaasa kushagika okuramya okw’amazima. Nk’eky’okureeberaho, okushaba kwabo nikuhwera munonga aha kutunguuka kw’Ekibiina Ekikristaayo.​—Shoma Zaaburi 92:13, 14.

18, 19. (a) Abakristaayo abakaikwire nibabaasa kuhiga bata abandi? (b) N’oha orikubaasa kugyendera aha buhabuzi oburikugira ngu: “Ogume oijukye Omuhangi waawe”?

¹⁸ Abakristaayo abakaikwire baine omugisha gw’okugaruramu abandi amaani. Nk’eky’okureeberaho, Anna n’obu araabe yaabaire ari omwesigwa omu hekalu kumara emyaka egyo yoona, naabaasa kuba ataramanyire ngu eky’okureeberaho kye kikahwera abandi bwanyima y’emyaka mingi. Rukundo ye ei yaabaire ainiire Yehova ekahandiikwa omu Baibuli. Hatariho kubanganisa, abaheereza ba Yehova bagyenzi baawe nibaguma nibaijuka rukundo ei oiniire Yehova. Niyo nshonga ahabw’enki Ekigambo kya Ruhanga kirikugira kiti: “Omutwe gujwengize enju n’ekirunga ky’ekitiinisa, kandi kitungwa ahabw’okugyendera omu muhanda gw’okuhikiirira.”!​—Enf. 16:31.

¹⁹ Twena twine obugarukiro omu bi turikubaasa kukora omu kuheereza Yehova. Kwonka abo boona abakiine amaani baine kuguma nibaijuka ebigambo ebiri omu Baibuli ebi: “Ogume oijukye Omuhangi waawe  . . . ebiro bibi bitakaizire.”​—Mub. 12:1.