Oku Turikubaasa Kuguma Twine Omutima gw’Okwefeerereza

1. Ni ky’okureeberaho ki eky’okwefeerereza eki Yesu yaataireho?

OBU Yesu yaabaire ari omu nsi, akataho eky’okureeberaho kirungi eky’okwefeerereza. Akaba akora ebi Ruhanga akunda omu mwanya gw’okwebembeza ebye. (Yoh. 5:30) Ahabw’okuguma ari omwesigwa kuhitsya obu yaafeera aha muti, akooreka ngu okwefeerereza kwe tikwine bugarukiro.​—Fil. 2:8.

2. Nitubaasa kworeka tuta omutima gw’okwefeerereza, kandi ahabw’enki twine kukikora?

² Naitwe abakuratsi ba Yesu, twine kugira omutima gw’okwefeerereza. Nikimanyisa ki okugira omutima gw’okwefeerereza? Omu bugufu, nikimanyisa okuba oyeteekateekire kuhwera abandi omu mwanya gw’okuta omutima aha bi orikukunda. Eki nikimanyisa ngu okwefeerereza nikutaana n’okweyendeza. (Mat. 16:24) Omutima gw’okwefeerereza nigutuhwera kwebembeza eby’abandi omu mwanya gw’okwebembeza ebyaitu. (Fil. 2:3, 4) Kandi Yesu akeegyesa ngu okugira omutima gw’okwefeerereza ni kikuru omu kuramya kwaitu. Mu muringo ki? Rukundo y’Ekikristaayo, niyo eshemereire kutuhiga kugira omutima gw’okwefeerereza kandi rukundo niko kamanyiso kakuru akarikworeka ngu turi abeegi ba Yesu. (Yoh. 13:34, 35) Kandi teekateeka aha migisha ei turikutunga ahabw’okugira ngu turi bamwe aha b’eishe-emwe abaine obumwe omu nsi yoona abarikworeka omutima gw’okwefeerereza.

3. Niki ekirikubaasa kuturemesa kugira omutima gw’okwefeerereza?

³ Kwonka, twine omuzigu orikuteeraho kuturemesa kugira omutima gw’okwefeerereza. Omuzigu ogwo, n’omuze gw’okweyendeza. Ijuka oku Adamu na Haawa baayorekire omutima gw’okweyendeza. Haawa akagira omutima gw’okweyendeza arikwenda kuba nka Ruhanga. Kandi Adamu akooreka ngu aine omutima gw’okweyendeza arikuteeraho kushemeza omukazi we. (Kut. 3:5, 6) Omuregi ku yaaherize kwiha Adamu na Haawa aha kuramya okw’amazima, akagumizamu kureetera abantu kugira omutima gw’okweyendeza. Akakoresa omuringo nigwo gumwe arikuteeraho kureetera Yesu kwohibwa. (Mat. 4:1-9) Obunaku obu, Sitaane ahabiise abantu arikubareetera kworeka omutwarize gw’okweyendeza omu miringo mingi. Twine kwegyendesereza ahabw’okuba naitwe nitubaasa kugira omuze gw’okweyendeza.​—Efe. 2:2.

4. (a) Mbwenu shi obunaku obu nitubaasa kweihiramu kimwe okweyendeza? Shoboorora. (b) Nituza kushwijuma bibuuzo ki?

⁴ Okweyendeza nikubaasa kugyeragyeranisibwa n’omucereenyo ogurikuza aha kyoma. Ekyoma kyaraara omu murombe nari aheeru, nikitandika kucereenya. Nihabaho oburemeezi waareka omucereenyo gukaguma aha kyoma, kikatandika kukokooka nari kikarekyera aho kukora. Nikyo kimwe, hati titurikubaasa kweihiramu kimwe okutahikiirira n’okweyendeza, kwonka twine kumanya akabi akarikubaasa kurugamu, kandi tukateeraho kuguma nitusingura omuze gw’okweyendeza. (1 Kor. 9:26, 27) Nitubaasa kumanya tuta ngu twine omutima gw’okweyendeza? Kandi nitubaasa kwongyera tuta kuteeraho kugira omutima gw’okwefeerereza?

KORESA BAIBULI KUREEBA KU ORAABE OINE OKWEYENDEZA

5. (a) Baibuli eri nk’endeeberwamu mu muringo ki? (Reeba ekishushani aha kutandika.) (b) Twaba nitweshwijuma kureeba ku turaabe twine okweyendeza, twine kwetantara ki?

⁵ Nk’oku turikubaasa kukoresa endeeberwamu kushwijuma endeebeka yaitu y’aha mubiri, nikwo turikubaasa kukoresa Baibuli kushwijuma omutima gwaitu kandi tukaihamu obumogo bwona obu turikubaasa kushangamu. (Shoma Yakobo 1:22-25.) Kwonka, endeeberwamu neija kutuhwera omu ndeebeka yaitu twagikoresa gye. Nk’eky’okureeberaho, waayereeba omu ndeeberwamu orikurahukiiriza, noobaasa kutareeba akantu kakye akakuriho kwonka kandi akari kakuru. Nari waayemerera kubi omu ndeeberwamu, noobaasa kushusha oti omuntu ou waareeba tiiwe. Nikyo kimwe, kubaasa kukoresa Baibuli kureeba obweremwa obu twine nk’okweyendeza, twine kukora ekirikukira aha kugishoma bushoma nari kugikoresa kureeba obweremwa bw’abandi.

6. ‘Nitwezirikira’ tuta ebiragiro ebihikire?

⁶ Nk’eky’okureeberaho, nitubaasa kuba nitushoma Ekigambo kya Ruhanga butoosha, nari buri izooba, kwonka oshangye ngu titurikureeba okweyendeza okurikubaasa kuba kuturimu. Ekyo nikibaasika kita? Teekateeka ahari eki: Omu ky’okureeberaho kya Yakobo eky’endeeberwamu, oburemeezi bw’omuntu ogwo tikugira ngu tarayereebire gye omu ndeeberwamu. Yakobo akahandiika ngu omuntu ‘naayereebera omu ndeeberwamu.’ Ekigambo ky’Orugriika eki Yakobo yaakoreise aha, nikimanyisa okweshwijuma n’obwegyendesereza. Mbwenu shi omuntu ogwo akaba aine buremeezi ki? Yakobo naayongyera agira ati: ‘Ku arikugyenda, ahonaaho ayebwa oku arikushusha.’ Ekirikumanyisa ngu ku arikuheza kwereeba omu ndeeberwamu tarikweboneza. Omu mwanya gw’ekyo, omuntu orikwenda kuba omusinguzi ‘naayetegyereza ebiragiro ebihikire’ kandi agumizamu ‘arikwezirika’ kubyorobera. Omu mwanya gw’okwehuzya ebiragiro bya Ruhanga ebihikire, naayezirikira enyegyesa za Baibuli. Yesu akagamba aha nshonga niyo emwe obu yaagira ati: “Ku muraahamire aha kigambo kyangye, nimuba muri abeegi bangye buzima.”​—Yoh. 8:31.

7. Nitubaasa kweshwijuma tuta kumanya ku turaabe twine omuze gw’okweyendeza?

⁷ N’ahabw’ekyo, kubaasa kweihamu okweyendeza twine kubanza kushoma gye Ekigambo kya Ruhanga. Ekyo nikibaasa kukuhwera kumanya ahu oine kukora empindahinduka. Kwonka oine kukora ekirikukira ahari ekyo. Yeyongyere kukora okucondooza. Waagira eki waashoma omu Baibuli, yeshushanirize ngu okaba oriho, kandi oyebuuze oti: ‘Nkatwarize nta omu mbeera egi? Nkabaasize kutwaza omu muringo oguhikire?’ Ekirikukira obukuru, teekateeka aha bi orikushoma, kandi obigyendereho. (Mat. 7:24, 25) Ka tureebe oku ebyahikire aha Mugabe Saulo n’entumwa Petero birikubaasa kutuhwera kuguma twine omutima gw’okwefeerereza.

EKI TURIKWEGYERA AHA KY’OKUREEBERAHO KIBI KYA SAULO

8. Saulo obu yaatandika kuba Omugabe akaba aine mutwarize ki, kandi ekyo akakyoreka ata?

⁸ Omugabe Saulo nitumwegyeraho ngu okweyendeza nikubaasa kushiisha omutwarize murungi ogw’okwefeerereza. Saulo obu yaatandika kuba omugabe akaba ari omucureezi. (1 Sam. 9:21) Akanga kufubira Abaisraeli abaabaire nibagamba kubi aha bugabe bwe, n’obu araabe yaabaire naabaasa kwekwatsa ngu naakoresa obushoboorozi bwe nk’Omugabe otoorainwe Ruhanga. (1 Sam. 10:27) Omugabe Saulo akaikiriza obuhabuzi bw’omwoyo gwa Ruhanga arikwebembera Abaisraeli obu baabaire nibarwana n’Abaamoni. Bwanyima akaba omucureezi yaayoreka ngu obusinguzi n’obwa Yehova.​—1 Sam. 11:6, 11-13.

9. Ni mu muringo ki ogu Saulo yaagiziremu okweyendeza?

⁹ Kwonka bwanyima, Saulo akagira omutwarize gw’okweyendeza n’amaryo nk’oku ekyoma kirikugira omucereenyo. Obu yaasingura Abaameleki omu kurwana, akeebembeza ebi arikwetenga omu mwanya gw’okworobera Yehova. Saulo ahabw’omururu akatwara omunyago omu mwanya gw’okugucwekyereza nk’oku Ruhanga yaabaire aragiire. Kandi ahabw’amaryo, Saulo akombeka ekiijutsyo. (1 Sam. 15:3, 9, 12) Nabi Samueli ku yaagambiire Saulo ngu eki yaakora tikyashemeza Yehova, Saulo akateeraho kwehorereza arikuta omutima aha kimwe aha biragiro bya Ruhanga eki yaayorobera kandi yaakwatsa abandi orubanja ahabw’enshobe ze. (1 Sam. 15:16-21) Kandi, amaryo gakareetera Saulo kuta omutima aha iziina rye omu mwanya gw’okufayo aha mukago gwe na Ruhanga. (1 Sam. 15:30) Nitubaasa kukoresa tuta eky’okureeberaho kya Saulo nk’endeeberwamu kutuhwera kugira omutima gw’okwefeerereza?

10, 11. (a) Eky’okureeberaho kya Saulo nikitwegyesa ki aha bikwatiraine n’okuguma twine omutima gw’okwefeerereza? (b) Nitubaasa kwetantara tuta eky’okureeberaho kibi kya Saulo?

¹⁰ Eky’okubanza eki turikwegyera ahari Saulo n’okugira ngu titwine kweikiririzamu munonga. Omutima gw’okwefeerereza tigurikwereeta gwonka, n’ahabw’ekyo twine kuguma nituteeraho munonga kugugira. (1 Tim. 4:10) Ijuka ngu Saulo akakora ebirikusiimwa Ruhanga kumara obwire bukye, kwonka tarayeihiremu kweyendeza oku yaabaire atandikire kugira. Bwanyima Yehova akanga Saulo ahabw’okumugomera.

¹¹ Ekya kabiri, titushemereire kuta omutima aha bi turikukora gye byonka, tukeebwa ebyo ebi twine kwongyeramu amaani. Eki nikiba kiri nk’okukoresa endeeberwamu kureeba omwenda musya ogu ojwaire kwonka otarikufayo kureeba ku oraabe oshemeire aha maisho. N’obu twakuba tutagizire maryo nka Saulo, twine kuteeraho kwetantara ekintu kyona ekirikubaasa kutureetera kutwaza nkawe. Twaheebwa obuhabuzi, ka tuteereho kuteehorereza ahabw’ebikorwa byaitu turikuteekateeka ngu enshobe yaitu ninkye, nari kuta orubanja aha bandi. Omu mwanya gw’okuba nka Saulo, nituba twine kwikiriza obuhabuzi.​—Shoma Zaaburi 141:5.

12. Omutima gw’okwefeerereza nigubaasa kutuhwera guta twaba tukozire ekibi ky’amaani?

¹² Kwonka shi ku twakukora ekibi ky’amaani? Saulo akaba naayenda kurinda eiziina rye, kandi eki kikamuremesa kugaruraho omukago gwe na Yehova. Omu mwanya gw’ekyo, omutima gw’okwefeerereza nigubaasa kutuhwera kwehuzya okuhemuka reero tushabe obuhwezi. (Enf. 28:13; Yak. 5:14-16) Nk’eky’okureeberaho, ow’eishe-emwe omwe akatandika kureeba ebirikwitsya enshoni aine emyaka 12, kandi eki akaba naakikora bwesherekye kumara emyaka erikurenga ahari ikumi. Naagira ati: “Kikaba kingumiire munonga kugambira omukazi wangye n’abareeberezi eki naabaire ninkora. Kwonka hati obu naaherize kukigamba, nimpurira nk’oihirweho ekintu kirikuremeera munonga aha mabega gangye. Bamwe ahari banywani bangye kikabatangaaza munonga, ku naarekyeire aho kuheereza nk’omuheereza omu kibiina, okaba nooshusha oti mbareebize. Kwonka hati nimmanya ngu Yehova naasiima obuheereza bwangye kukira obu naabaire nindeeba ebirikwitsa enshoni, kandi oku Yehova arikundeeba nikyo kirikukira obukuru.”

PETERO AKASINGURA OKWEYENDEZA

13, 14. Petero akooreka ata ngu aine okweyendeza?

¹³ Entumwa Petero akooreka omutima gw’okwefeerereza obu yaabaire naakitendekwa Yesu. (Luk. 5:3-11) Kwonka, akaba aine kweihamu omutima gw’okweyendeza. Nk’eky’okureeberaho, Petero akaguubwa kubi obu entumwa Yakobo na Yohaana bashaba Yesu kubaha omwanya gw’ahaiguru omu Bukama bwa Ruhanga. Noobaasa kushanga ngu Petero akateekateeka ngu ashemereire kutunga omwanya ogwo ahabw’okugira ngu Yesu akaba yaamugambiire ngu naija kutunga obujunaanizibwa bw’omutaano. (Mat. 16:18, 19) Yesu akarabura Yakobo, Yohaana, Petero, n’entumwa ezindi kutagira omutima gw’okweyendeza nari kwetwara nk’abarikukira ab’eishe-emwe abandi.​—Mak. 10:35-45.

¹⁴ Na bwanyima ya Yesu kuteeraho kutereeza emiteekateekyere ya Petero, nabwo Petero akooreka ngu akiine okweyendeza. Obu Yesu yaagambira entumwa ngu bakaba nibaija kumuhungaho, Petero akeetunguura arikugira ngu we wenka akaba naija kuguma ari omwesigwa. (Mat. 26:31-33) Akaba atashemereire kwetunguura ahakuba aha kiro ekyo kyenyine akaremwa kworeka omutima gw’okwefeerereza. Petero akateeraho kurinda amagara ge, yaacwamu okwehakana Yesu emirundi eshatu.​—Mat. 26:69-75.

15. Ahabw’enki eky’okureeberaho kya Petero kirikutugaruramu amaani?

¹⁵ N’obu Petero araabe yaabaire aine obweremwa, eky’okureeberaho kye nikitugaruramu amaani. Ahabw’okuteeraho kwe hamwe n’obuhwezi bw’omwoyo gurikwera, akabaasa kusingura okweyendeza. Bwanyima akooreka ngu n’omwerinzi kandi ngu aine omutima gw’okwefeerereza. (Gal. 5:22, 23) Akagumira okugyezibwa okwabaire kuri okw’amaani okukira okw’okubanza oku yaaremirwe kusingura. Akooreka ngu n’omucureezi kurugiirira aha ku yaatwarize obu Paulo yaamuhanira omu maisho g’abantu baingi. (Gal. 2:11-14) Bwanyima ya Petero kuhanwa Paulo, tarabiikire nziika arikuteekateeka ngu Paulo asiisire eiziina rye. Petero akagumizamu naakunda Paulo. (2 Pet. 3:15) Eky’okureeberaho kya Petero nikibaasa kutuhwera kugira omutima gw’okwefeerereza.

16. Nitubaasa kworeka tuta ngu twine omutima gw’okwefeerereza omu mbeera ezigumire?

¹⁶ Teekateeka aha ku orikutwaza omu mbeera zigumire. Petero n’ezindi ntumwa ku zaatairwe omu kihome kandi zikateerwa ahabw’okubuurira, zikashemererwa “ahabw’okuheebwa ekitiinisa eky’okuhemurwa niziturwa eiziina rya Yesu.” (Byak. 5:41) Naiwe okuhiiganisibwa noobaasa kukutwara nk’omugisha gw’okutooreza Petero n’okukuratira eky’okureeberaho kya Yesu orikworeka omutima gw’okwefeerereza. (Shoma 1 Petero 2:20, 21.) Okugira emiteekateekyere nk’egi, nikibaasa kukuhwera na waahanwa abareeberezi omu kibiina. Tooreza Petero omu mwanya gw’okugira ekiniga.​—Mub. 7:9.

17, 18. (a) Nitubaasa kwebuuza ki aha bikwatiraine n’ebigyendererwa byaitu eby’omwoyo? (b) Nitubaasa kukora ki twayeshwijuma tukashanga ngu twine okweyendeza?

¹⁷ Noobaasa kugasirwa waatooreza Petero aha bikwatiraine n’ebigyendererwa by’omwoyo. Noobaasa kutaho ebigyendererwa omu muringo ogurikworeka ngu oine omutima gw’okwefeerereza. Kwonka, oine kwegyendesereza kureeba ngu tiwaataho ebigyendererwa ahabw’okwenda kwetunguura. N’ahabw’ekyo yebuuze oti: ‘Ahabw’enki ndikwenda kwongyera aha ku ndikuheereza Yehova? Mbwenu shi n’ahabw’okwenda kuhimbisibwa abandi nari kutunga obushoboorozi nk’obu Yakobo na Yohaana baabaire nibenda?’

¹⁸ Waayeshwijuma okashanga oine okweyendeza, shaba Yehova kukuhwera obaase kuhindura aha miteekateekyere yaawe n’enyehurira zaawe, reero oteereho kuta omutima aha kumuhimbisisa omu mwanya gw’okwehimbisa. (Zab. 86:11) Kandi noobaasa n’okutaho ebigyendererwa ebitaraakureetere kwetunguura. Nk’eky’okureeberaho, noobaasa kuteeraho kugira emitwarize ei turikugira ahabw’okuhwerwa omwoyo gurikwera ei orikureeba ngu tikirikukworobera kugira. Nari noobaasa kuba nootebeekanisiza gye enteerane kwonka oshangye otaine kihika ky’okwejumba omu kuboneza Ekyombeko ky’Obukama, noobaasa kutaho ekigyendererwa kugyendera aha buhabuzi oburi omu Abarooma 12:16.​—Kishome.

19. Nitubaasa kukora ki kugira ngu tutahwamu amaani twayeshwijuma turikukoresa Ekigambo kya Ruhanga?

¹⁹ Twayeshwijuma gye turikukoresa Ekigambo kya Ruhanga tukashanga ngu twine obweremwa, nk’okweyendeza, nitubaasa kuhwa amaani. Ekyo kyakuhikaho, teekateeka aha muntu omu ky’okureeberaho kya Yakobo. Tarikugira ngu omuntu ogwo naarahuka kwihaho oburemeezi obu aine nari ngu neihaho buri kamogo koona aku arikuba aine, kureka naagira ngu omuntu ogwo naagumizamu ‘arikwetegyereza ebiragiro ebihikire.’ (Yak. 1:25) Naaguma naijuka ebi areebire omu ndeeberwamu kandi agumizamu naakora empindahinduka. Buzima, guma oine emiteekateekyere mirungi kandi otagwera orubaju aha bikwatiraine n’obweremwa bwawe. (Shoma Omubuurizi 7:20.) Gumizamu nooyetegyereza ebiragiro ebihikiriire, kandi oteereho kuguma oine omutima gw’okwefeerereza. Yehova aine ekihika ky’okukuhwera, nk’oku atwire naahwera ab’eishe-emwe baingi n’obu baraabe batahikiriire, naabasiima kandi abaha emigisha.