“Muri Baakareebi b’Okuhamya Ebyangye”

1, 2. (a) Nikimanyisa ki okuba kareebi nari omujurizi, kandi ab’eby’amakuru baremirwe bata? (b) Ahabw’enki Yehova atarikwihirira aha by’amakuru kugira eki yaakora?

NIKIMANYISA ki okuba kareebi nari omujurizi? Kashoboorozi emwe neegira eti: “N’omuntu orikureeba ekyabaho kandi akigamba nk’oku kyabaireho.” Nk’eky’okureeberaho, orupapura orurikwetwa The Witness omu rurembo Pietermaritzburg, omuri South Africa, rutwire niruteerwa kumara emyaka erikurenga 160. Eiziina eryo nirihikaana n’ekigyendererwa ky’orupapura orwo ahabw’okugira ngu nirugamba aha birikubaho omu nsi omu muringo guhikire. Owaatandikireho orupapura orwo akaraganisa ngu nirwija kuguma nirugamba “amazima, amazima goona, kandi hatariho kindi kureka amazima.”

² Kwonka eky’obusaasi, ab’eby’amakuru omu nsi yoona batwire nibeehuzya nari nibahindura amazima agarikukwata aha byafaayo by’omuntu. Egi niyo nshonga ahabw’enki Ruhanga ow’obushoboorozi bwona arikurabira omuri nabi Ezekieli akagira ati: “Amahanga garyamanya ku ndi MUKAMA.” (Ezk. 39:7) Kwonka Ruhanga ow’Obushoboorozi Bwona tarikwihirira aha by’amakuru kugira eki yaakora. Aine Abajurizi abarikuhika obukaikuru munaana abarikugambira abantu b’amahanga ebirikumukwataho n’oku yaabaire naakoragana n’abantu ira n’omu bunaku obu. Abajurizi nari baakareebi aba nibagamba n’aha birungi ebi Ruhanga araakorere abantu omu biro by’omumaisho. Ahabw’okugira ngu nituta omutima aha murimo gw’okubuurira, nituhikiiriza amakuru g’eiziina ryaitu eri Ruhanga atuhaire nk’oku kirikworekwa omu Isaaya 43:10, aharikugira hati: “MUKAMA naagira ati: Imwe n’omuheereza wangye ou naatooraine, muri baakareebi b’okuhamya ebyangye.”

3, 4. (a) Abeegi ba Baibuli bakatunga ryari eiziina risya, kandi bakatwara bata eiziina eryo? (Reeba ekishushani aha kutandika.) (b) Ni bibuuzo ki ebi turikuza kushwijuma?

³ Ka n’omugisha kwetererwa eiziina rya Ruhanga Yehova, “Mukama otahwaho,” orikutugira ati: “Eryo niryo iziina ryangye ebiro byona, kandi okwo nikwo nshemereire kwijukwa obusingye bwona”! (1 Tim. 1:17; Kur. 3:15; gyeragyeranisa Omubuurizi 2:16.) Omu gwa 1931, Abeegi ba Baibuli nibwo baatandika kukoresa eiziina Abajurizi ba Yehova. Bwanyima y’ekyo, amabaruha mingi agarikworeka okusiima gakashohorezibwa omu munaara gw’omurinzi. Ekibiina kimwe kuruga omuri Canada kikahandiika kiti: “Amakuru marungi agu tutungire ngu hati turi Abajurizi ba Yehova gaatushemeize, kandi kyongyeire kuhamya okumariirira kwaitu kukora ebirikuhikaana n’eiziina eryo.”

⁴ Noobaasa ota kworeka ngu noosiima omugisha gw’okwetererwa eiziina rya Ruhanga? Ahabw’enki Yehova naatweta Abajurizi be nk’oku turikushoma omu Isaaya?

ABAJURIZI BA RUHANGA OMU BWIRE BWA IRA

5, 6. (a) Abazaire Abaisraeli bakaba baine kuba abajurizi ba Yehova mu muringo ki? (b) Bakaragiirwa kukora ki ekindi, kandi ahabw’enki abazaire obunaku obu n’abo baine kukikora?

⁵ Buri Mwisraeli omu bunaku bwa Isaaya akaba ari ‘kareebi’ nari omujurizi wa Yehova, kandi eihanga ryona rikaba riri ‘omuheereza’ we. (Isa. 43:10) Omuringo gumwe ogu abazaire Abaisraeli baabaire bari Abajurizi n’okugira ngu bakaba beegyesa abaana baabo aha ku Ruhanga yaabaire akoragana na baishenkurubo. Nk’eky’okureeberaho, obu abantu baaragiirwa kukuza Okuhingurwaho buri mwaka, bakagambirwa bati: “Abaana baanyu ku baribabuuza bati: Ogu mugyenzo, ogu murikukora, nigumanyisa ki? Naimwe muryabagarukamu muti: N’ekitambo ky’Okuhinguraho kwa MUKAMA, ahakuba akahingura ahaiguru y’amaju g’Abaisraeli omuri Misri, obu yaita Abanyamisri, akakiza amaka gaitu.” (Kur. 12:26, 27) Abazaire nibabaasa kuba baashobooroire abaana baabo ngu Musa ku yaahikire ahari Faraho omurundi gw’okubanza kumushaba ngu arekure Abaisraeli kuza kuramya Yehova omu ihamba, Faraho akamugarukamu ati: “MUKAMA [Yehova] niwe oha, ou nyowe nshemereire kuhurira, nkarekura Abaisraeli bakagyenda?” (Kur. 5:2) Kandi nibabaasa kuba baabagambiire ngu bwanyima y’ebibonaboneso ikumi kuhika ahari Misri, n’Abaisraeli kukira eihe rya Misri aha Nyanja Erikutukura, abantu boona bakatunga eky’okugarukamu ky’ekibuuzo kya Faraho ekyo. Yehova akaba ari ow’amaani kandi na hati akiri ow’amaani. Kandi n’Abaisraeli bakamanya ngu Yehova ni Ruhanga ow’amazima, orikuhikiiriza ebi arikuraganisa.

⁶ Hatariho kubanganisa, Abaisraeli abaabaire nibasiima omugisha ogw’okwetererwa eiziina rya Ruhanga bakamanyisa abaana baabo n’abanyamahanga abaabaire nibatuura nabo ebi Yehova yaabakoreire. Kandi n’ekirikukira obukuru bakaragiirwa kwegyesa abaana baabo kworobera emisingye ya Ruhanga erikwera. Yehova akagira ati: “Mushemereire kuba abarikwera; ahakuba Nyowe MUKAMA Ruhanga waanyu ndi orikwera.” (Lev. 19:2; Bir. 6:6, 7) Eki ka n’eky’okureeberaho kirungi aha Bakristaayo bazaire ab’obunaku obu, abaine kutendeka abaana baabo omu by’okuhikiirira, kubaasa kubahwera kuhimbisa eiziina rya Ruhanga ery’omuhendo.​—Shoma Enfumu 1:8; Abaefeso 6:4.

7. (a) Abaisraeli ku baabaire baba abeesigwa ahari Ruhanga, amahanga agandi gakaba gakwatwaho gata? (b) Abarikwetererwa eiziina rya Ruhanga baine bujunaanizibwa ki?

⁷ Abaisraeli ku baabaire baba abeesigwa, eiziina rya Ruhanga rikaba rihimbisibwa. Bakaba bagambiirwe bati: “Amahanga goona ag’omu nsi garyareeba ku oyetereirwe eiziina rya MUKAMA, gakutiine.” (Bir. 28:10) Kwonka eky’obusaasi, ebyafaayo by’Abaisraeli okukira munonga nibyoreka ngu tibarabeire beesigwa. Emirundi mingi bakaba baramya ebishushani ebikozirwe abantu. Kandi, ahabw’okugira ngu bakaba nibaramya baaruhanga b’Abanyakanaani, bakatandika kuba enshaarizi, barikuhayo abaana baabo nk’ebitambo kandi barikwitsa abooro omwaga. Eki ka twine kukyegyeraho, tukateeraho kuba abarikwera turikutooreza Ogwo Orikukirayo kuba Orikwera, ou turikwetererwa eiziina rye!

“REEBA, NAAZA KUKORA EKINTU KISYA”

8. Isaaya akatunga bujunaanizibwa ki kuruga ahari Yehova kandi akatwaza ata?

⁸ Yehova akaba yaagambire aha kucungura Abaisraeli kuruga omu bukwatwa kandi nabo bakaba nibaija kukyereebera. (Isa. 43:19) Eshuura mukaaga ez’ekitabo kya Isaaya okukira nizikwata aha kurabura okwabaire nikuza kuhika ahari Yerusaalemu n’endembo ezaabaire zigyetoroire. Yehova orikubaasa kumanya ebiri omu mitima, akagambira Isaaya ngu agumizemu naarabura abantu n’obu baraabe baabaire batarikwija kuhurikiza. Isaaya eki kikamukwataho kandi yaayenda kumanya obwire obu ihanga rya Ruhanga ryabaire niriija kumara riri erigomi. Ruhanga akamugarukamu ata? “Okuhitsya obu endembo ziriba emishaka, hatakiine otwiremu, n’amaju hatakiine ogarimu, n’ensi ekabeera kimwe amatongo.”​—Shoma Isaaya 6:8-11.

9. (a) Obunabi bwa Isaaya oburikukwata aha kucwekyerezibwa kwa Yerusaalemu bukahikiirira ryari? (b) Ni mbeera ki eziriho obunaku obu ezishemereire kutureetera kuguma nitureeba?

⁹ Isaaya akatunga obujunaanizibwa obu omu mwaka gw’aha muheru ogw’obutegyeki bw’Omugabe Uziya, nari nk’omu gwa 778 Yesu atakazairwe. Akagumizamu ari nabi kumara emyaka 46 na bwanyima y’omwaka 732 Yesu atakazairwe, omu butegyeki bw’Omugabe Hezekia. Kuruga omu gwa 732 kuhika omu gwa 607 obu Yerusaalemu rwacwekyerezibwa, hakahinguraho emyaka 125. N’ahabw’ekyo, abaheereza ba Yehova bakaraburwa bukiri kare aha kyabaire nikiza kuhika aha ihanga ryabo. Obunaku obu, Yehova naahwera bantu be kurabura abandi aha kiriyo nikiza kubaho omu bwire bw’omumaisho. Kumara emyaka 135 kuruga obu Watchtower yaatandika kushohozibwa, etwire neehiga abarikugishoma kuguma nibakimanya ngu obutegyeki bwa Sitaane buri haihi kucwekyerezibwa, reero Obutegyeki bwa Kristo obw’Emyaka Rukumi bukatandika kutegyeka.​—Kush. 20:1-3, 6.

10, 11. Abaisraeli abaabaire bari omuri Babulooni bakareeba bunabi ki obwa Isaaya burikuhikiirira?

¹⁰ Abayudaaya baingi abeesigwa abaikiriize kutwarwa Abababulooni nk’enkwatwa bakabaasa kuhonokaho, obu Yerusaalemu rwacwekyerezibwa. (Yer. 27:11, 12) Bwanyima y’emyaka 70, abaheereza ba Ruhanga bakareeba okuhikiirira kw’obunabi obu: “MUKAMA omucunguzi waanyu, orikwera wa Israeli naagira ati: Ahabwanyu ndyatuma Babulooni, nshuumye abaayo boona bari empungi.”​—Isa. 43:14.

¹¹ Kuhikaana n’obunabi obwo, hakabaho ekintu ekyatetemiise ensi omu Okitoba 539 Yesu atakazairwe. Abagabe ba Babulooni ku baabaire bariyo nibanywera viinyo omu bikopo ebi baabaire baihire omu hekalu Yerusaalemu, kandi barikuhimbisa baaruhanga baabo, amahe g’Abameedi n’Abaperesi gaahamba orurembo Babulooni. Omu gwa 538 nari 537 Yesu atakazairwe, Kuuro, owaacwekyereize Babulooni akaragiira Abayudaaya kugarukayo kwombeka hekalu omuri Yerusaalemu. Ebi byona bikagambwa Isaaya, otwariiremu n’ekiraganiso kya Yehova ngu akaba naija kureeberera kandi arinde abantu be abaayeteisize barikugaruka Yerusaalemu. Ruhanga arikugamba aha bantu abo akagira ati: “Abu naayehangiire, ngu bamanyise eby’okuhimbisibwa kwangye.” (Isa. 43:21; 44:26-28) Abayudaaya ku baagarukire Yerusaalemu bakombeka hekalu ya Yehova, bakareeba oku Yehova Ruhanga ow’amazima arikuhikiiriza ekigambo kye.

12, 13. (a) Ni baahi abandi abaatungire omugisha gw’okugaruraho okuramya okw’amazima hamwe n’Abaisraeli? (b) “Ab’omutwe muhango” baine kukora ki kushagika ‘Israeli ya Ruhanga,’ kandi baine matsiko ki?

¹² Abantu baingi abaabaire batari Baisraeli bakahinduka bamwe aha b’eihanga erisya eryo, kandi bwanyima Abanyamahanga baingi bakaikiriza enyikiriza z’Ekiyudaaya. (Ezr. 2:58, 64, 65; Est. 8:17) Obunaku obu, “omutwe muhango gw’abantu” nibo ‘ab’entaama ezindi’ eza Yesu, nibashagika Abakristaayo abashukirweho amajuta, abarikwetwa ‘Israeli ya Ruhanga.’ (Kush. 7:9, 10; Yoh. 10:16; Gal. 6:16) N’ab’omutwe muhango nabo nibeetwa Abajurizi ba Yehova.

¹³ Omu Myaka Rukumi ey’Obutegyeki bwa Kristo, ab’omutwe muhango nibaija kushemererwa munonga kushoboororera abaraazooke oku kyabaire kirikushemeza kuba omwe aha Bujurizi ba Yehova omu biro by’aha mperu. Kwonka ekyo nikiija kubaasika twaba nituteeraho kukora ebirikuhikaana n’eiziina ryaitu kandi tukateeraho kuguma turi abarikwera. N’obu twakuba nituteeraho munonga, buri izooba tushemereire kushaba okusaasirwa ahabw’okugira ngu nitubaasa kuba twaremwa kuba abarikwera, n’ahabw’okukimanya ngu turi abasiisi kandi obwo tuhairwe omugisha gw’amaani ogw’okwetererwa eiziina rya Ruhanga.​—Shoma 1 Yohaana 1:8, 9.

AMAKURU G’EIZIINA RYA RUHANGA

14. Eiziina Yehova riine makuru ki?

¹⁴ Twaba nitwenda kwongyera kusiima omugisha gw’okwetererwa eiziina rya Ruhanga, ni kikuru munonga kuteekateeka aha makuru g’eiziina eryo. Eiziina “Yehova” niriruga omu kigambo ky’Oruheburaayo ekiine amakuru g’okukora ekirikuvunuurwa nka kuba. N’ahabw’ekyo eiziina Yehova nirimanyisa ngu “Naahikiiriza kyona eki arikwenda.” Ekyo nikihikaana n’omurimo ogu Yehova yaakozire ogw’okuhanga buri kimwe omu nsi n’omu iguru kandi n’ahabw’okugira ngu naahikiiriza buri kimwe eki arikuraganisa. Kandi na hati naakigumizamu kuhikiiriza ebigyendererwa bye n’ebi arikwenda kandi tihariho kirikubaasa kumuremesa n’obu yaakuba Sitaane.

15. Yehova akooreka ata amakuru g’eiziina rye? (Reeba akabokisi “Eiziina Eriine Amakuru Maingi.”)

¹⁵ Yehova ku yaabaire naaha Musa obujunaanizibwa bw’okwiha abaheereza be Misri, akakoresa ekigambo ekirikushoboorora amakuru g’eiziina rye arikwegambo. Baibuli neegira eti: “Ruhanga yaagira Musa ati: Ndi MBAHO” nari, niinyija kuhinduka eki ndikwenda kuba kyona. Akongyeraho ati: “Oku nikwo origambira Abaisraeli, oti: MBAHO niwe abantumireho.” (Kur. 3:14) N’ahabw’ekyo, Yehova naahinduka kyona omu mbeera zoona, kubaasa kuba kyona ekirikwetengyesa kuhikiiriza ekigyendererwa kye. Aha Baisraeli abaabaireho abahuuku, akabaasa kuba omucunguzi, omurinzi, omwebembezi hamwe n’omureeberezi owaabahaire ebirikwetengyesa omu by’omubiri n’omu by’omwoyo.

OKWOREKA OKUSIIMA KWAITU

16, 17. (a) Nitubaasa kworeka tuta ngu nitusiima omugisha gw’okwetererwa eiziina rya Ruhanga? (b) Nitwija kushwijuma ki omu kicweka ekirikukurataho?

¹⁶ Obunaku obu, Yehova naagumizamu kukora ebirikuhikaana n’amakuru g’eiziina rye arikutuhazya omu by’omubiri n’eby’omwoyo. Kwonka amakuru g’eiziina rya Ruhanga tigarikugarukira aha ki arikucwamu kuba kyonka. Kureka, nikitwariramu n’ebyo ebi arikubaasisa kubaho aha bikwatiraine n’omurimo gw’Abajurizi be omu kuhikiiriza ekigyendererwa kye. Twateekateeka ahari ekyo, nikiija kutuhiga kuguma nitukora ebirikuhikaana n’eiziina eryo. Kåre ow’emyaka 84 otwire naabuurira omuri Norway kumara emyaka 70, naagira ati: “N’omugisha gw’amaani kuheereza Yehova, Omugabe w’ebiro n’ebiro, n’okuba omwe aha bantu abarikweterwa eiziina rye. N’omugisha gw’amaani kushoboorora amazima g’omu Baibuli kandi akareeba abantu bashemereirwe aha maisho ahabw’okwetegyereza. Nk’eky’okureeberaho, nikindeetera okumarwa naayegyesa abantu aha ku ekitambo kya Kristo kirikukora, n’oku barikubaasa kutunga amagara agatahwaho omu nsi nsya ey’obusingye.”

¹⁷ N’amazima ngu omu bicweka ebimwe kigumire kutunga abantu abarikwenda kwega ebirikukwata ahari Ruhanga. Kwonka nabwo, nka Kåre, nitutunga okushemererwa twabuurira omuntu akahurikiza kandi tukamwegyesa eiziina rya Ruhanga. Kwonka shi nikibaasika kita kuba Abajurizi ba Yehova kandi tukaba n’abajurizi ba Yesu? Ekibuuzo ekyo nikiija kugarukwamu omu kicweka ekirikukurataho.