Ruhanga Naakwetegyereza?

EKI TURIKWEGYERA AHA BYAHANGIRWE

Teekateeka aha barongo abarikushushana abaine omukago ogurikukirayo. Nibaba baine enkoragana nungi. Nangwa n’abarongo abamwe “nibeetegyerezana gye kugira ngu mugyenzi we yaagira eki yaamugambira naakyetegyereza n’obu yaakuba atamushobooroire,” nikwo Nancy Segal arikugira, orikukurira eirwariro ry’okucondooza aha barongo, kandi nawe ori omurongo. Omukazi omwe akashoboorora aha mukago gwe n’omurongo orikumushusha ou yaazairwe nawe ati: “Buri omwe ahariitwe naamanya ebirikukwata ahari mugyenzi we.”

Niki ekirikubareetera kwetegyerezana bati? Okucondooza nikworeka ngu n’obu baraabe nibakurira omu mbeera emwe n’omunda emwe, enshonga nkuru n’okugira ngu nibaba baine obutafaari bw’akarande oburikushushana.

TEEKATEEKA AHARI EKI: Ogwo owaatuhangire buzima naamanya gye buri omwe ahariitwe kukira ondiijo muntu weena. Daudi omuhandiiki wa Zaaburi akagira ati: “Okanteeranira omu nda ya maawe. Ekyemerero kyangye tikirakusherekirwe, obu naabaire nimpangirwa omu mubonano. . . . Amaisho gaawe gakaba gandeebera omunda, nkiri amaizi; omu kitabo kyawe hahandiikirwemu” ebicweka byangye byona. (Zaaburi 139:13, 15, 16) Ruhanga wenka niwe arikwetegyereza gye obutafaari bw’akarande obu twine n’ebi turikurabamu ebirikutureetera kugira emitwarize ei twine. Ahabw’okugira ngu Ruhanga naamanya gye ebirikutukwataho n’obuhangwa bwaitu, nikituhamiza ngu naatwetegyereza gye omu bwijwire.

BAIBULI NEEYEGYESA NGU RUHANGA NAATWETEGYEREZA

Daudi akashaba ati: “Ai Mukama, okancaaka, wammanya. Noomanya emishutamire yangye, n’emyimukire yangye, omanyiire hare ebiteekateeko byangye. Ahakuba orurimi rwangye ku ruba rutakashohoize kigambo, reeba Mukama iwe oba waakimanyiire kimwe.” (Zaaburi 139:1, 2, 4) Yehova naamanya enyehurira zaitu kandi naamanya “enaama zoona n’ebiteekateeko byona.” (1 Obusingye 28:9; 1 Samueli 16:6, 7) Emishororongo egi neeyoreka ki ahari Ruhanga?

N’obu turaabe tutarikubaasa kugambira Ruhanga byona ebi turikuteekateeka n’enyehurira zaitu twaba nitushaba, naareeba ebi turikukora, kandi naayetegyereza n’enshonga ahabw’enki nitubikora. Naayetegyereza n’ebirungi ebi turikuba nitwenda kukora, n’obu obweremwa bwaitu buraabe nibuturemesa kukora ebi turikwenda. Buzima, ahabw’okugira ngu Ruhanga niwe yaatuhangire twine rukundo, naaba aine ekihika ky’okureeba ebiteekateeko n’ebigyendererwa byaitu ebya rukundo, kandi naatwetegyereza.​—1 Yohaana 4:7-10.

Ebyahandiikirwe nibituhamiza biti:

• “Ahakuba amaisho ga Mukama agata aha bahikiriire, n’amatu ge agatega okushaba kwabo.”​—1 PETERO 3:12.

• Ruhanga naaraganisa ati: “Ndyakwegyesa, nkuhabure omuhanda ogu oritoora; ndyakuha obwengye, nkutaireho eriisho.”​—ZAABURI 32:8.

RUHANGA N’OMUNYAMBABAZI

Okumanya ngu Ruhanga naayetegyereza embeera n’enyehurira zaitu nikibaasa kutuhwera kwemera oburemeezi? Teekateeka aha kyahikire ahari Anna, owa Nigeria. Naashoboorora ati: “Nkaba niinyebuuza yaaba okuguma mpuriire kiine amakuru ahabw’oburemeezi obu naabaire nyine. Nkaba ndi efaakazi ndikureeberera muhara wangye, owaabaire ari omu irwariro aine endwara y’okugira amaizi maingi omu bwongo. Kandi naanye bakankyebera baashanga nyine ekookoro y’amabeere, reero baanshemeza, naatandika kutunga obujanjabi bw’okuremesa endwara egi kujanjaara. Kikaba kingumiire munonga nyowe na muhara wangye kujanjabirwa omu irwariro rimwe omu bwire bumwe.”

Niki ekyahwereire Anna kwemera embeera egi? “Nkateekateeka munonga aha byahandiikirwe nka Abafilipi 4:6, 7, aharikugira ngu ‘obusingye bwa Ruhanga oburengire okwetegyereza kw’omuntu weena, nibwija kuguma niburinda emitima yaanyu n’obwengye bwanyu.’ Ku naabaire nyijuka ekyahandiikirwe eki, nkaba mpurira omukago gwangye na Yehova gwahama, ndikumanya ngu naanyetegyereza gye kukira oku ndikwemanya. Kandi ab’eishe-emwe na banyaanyazi-itwe omu kibiina Ekikristaayo bakangumya munonga.

“N’obu ndaabe nkiine amagara mabi, embeera yangye n’eya muhara wangye zihindukireho zaaba nungi. Ahabw’okugira ngu Yehova ari aha rubaju rwaitu, twegire kutagira emiteekateekyere mibi twaba twine oburemeezi. Yakobo 5:11 nihatuhamiza hati: ‘Abagumisiriza tubeeta abahiiriirwe. Mukahurira aha kugumisiriza kwa Yobu, kandi mwareeba eki Mukama yaagyendereire, oku aine embabazi nyingi n’okusaasira.’ Yehova akeetegyereza gye embeera ya Yobu, naitwe naayetegyereza gye embeera ezi turikurabamu.