Okumanya Ruhanga Nikikugasira Kita?

Buri kicweka ekiri omu magaziini egi nikituhwera kugarukamu ekibuuzo eki: Ruhanga n’Oha? Ekimwe nikyoreka ngu eiziina rya Ruhanga eririkugambwaho omu Baibuli ni Yehova, ekindi nikyoreka ngu omutwarize gwe omukuru ni rukundo. Ekindi nikyoreka ebi yaaherize kukora n’ebi ari haihi kukorera abantu be boona. N’obu haraabe hakiriyo bingi eby’okwega ahari Ruhanga, noobaasa kwebuuza oku orikugasirwa waayongyera kumwegaho.

Yehova naaraganisa ngu waaguma ‘noomusherura, noija kumubona.’ (1 Obusingye 28:9) Teekateeka aha mugisha ogu orikwija kutunga waagumizamu noosherura Yehova okamumanya, kandi okaba munywani we! (Zaaburi 25:14) Okugira omukago nk’ogwo nikikugasira kita?

Okushemererwa okwabuzima. Yehova naayetwa Ruhanga ow’okushemererwa. (1 Timoseo 1:11) Okumwirira haihi n’okugira emitwarize nk’eye nikiija kukureetera kugira okushemererwa okwabuzima, kandi ogire enyehurira nungi, ebiteekateeko birungi, n’amagara marungi. (Zaaburi 33:12) Kandi noija n’okugira okushemererwa, waayetantara emitwarize mibi, reero okagira emicwe mirungi, kandi okongyera kukwatanisa gye n’abandi. Noija kwikirizana n’ebi omuhandiiki wa Zaaburi yaagambire obu yaagira ati: “Ekirungi ahariinye n’okwirira haihi Ruhanga.”​—Zaaburi 73:28.

Okutufaho n’okutureeberera. Yehova akaraganisa abaheereza be ati: “Ndyakuha obwengye, nkutaireho eriisho.” (Zaaburi 32:8) Ekyo nikimanyisa ngu Yehova naafayo aha baheereza be, kandi naareeberera buri muntu okwe kuhikaana n’ebyetengo bye. (Zaaburi 139:1, 2) Waagira omukago murungi na Yehova, noija kumanya ngu butoosha naaba ayeteekateekire kukuhwera.

Ebiro birungi by’omumaisho. Yehova Ruhanga naakuha omugisha gw’okwija kutunga ebiro birungi by’omumaisho kwongyera aha kushemererwa n’okumarwa ebi oine hati. (Isaaya 48:17, 18) Baibuli neegira eti: “Aga nigo magara agatahwaho, okumanya Iwe Ruhanga omwe ow’amazima, n’Ogwo ou waatumire Yesu Kristo.” (Yohaana 17:3) Omu biro ebi ebigumire, amatsiko agu Ruhanga arikutuha nigabaasa kukora nk’ekitsibo ekirikutuhwera kuguma ‘tuhamire kandi tutarikunyiganyigibwa.’​—Abaheburaayo 6:19.

Ezi ni zimwe aha nshonga ezirikutureetera kwongyera kumanya gye Ruhanga n’okugira omukago murungi nawe. Noobaasa kugamba n’omwe aha Bajurizi ba Yehova nari oze aha jw.org/nyn kumanya ebirikukiraho.