Tooreza Kristo Orikworeka Ekitiinisa
1. Omutwe gw’oruteerane oruhango orw’ebiro bishatu orw’omwaka ogu gwine kakwate ki n’okuhaisa Yehova ekitiinisa?
1 Baibuli neeshoborora ahari Yehova, Omutegyeki wa Byona, ajwaire ekitiinisa n’obukuru. (Zab. 104:1) Yesu butoosha akaba agamba kandi atwaza omu muringo ogwabaire guhaisa Ishe n’entebeekanisa Ze ekitiinisa. (Yoh. 17:4) Buri omwe omuriitwe naija kugira omugisha gw’okutooreza Yesu n’okuhaisa Yehova ekitiinisa omu Nteerane Empango ez’Ebiro Bishatu eziine omutwe “Kuratira Kristo!”
2. Okubaho kwaitu ahari buri kicweka nikuhaisa Yehova kuta ekitiinisa?
2 Okuramya Okurikuhaisa Ekitiinisa: Nitubaasa kuhaisa Yehova ekitiinisa twatebeekanisa kubaho aha kiihuro ky’eby’omwoyo eki atutebeekanisiize. Waagambireho n’ou orikukorera kandi waaherize n’okwetebeekanisa kugira ngu obaase kuba omu ruteerane amazooba goona, otwariiremu n’Orwakataano? Waatebeekaniise kuhikayo kare kugira ngu otungye ah’okushutama kandi ngu oyejumbe omu kyeshongoro n’omu shaara ebirikwiguraho? Waatebeekaniise eki oraije kuriira hamwe n’ab’eishe-emwe bataahi baawe aha mwanya gw’oruteerane? Aha kutandika kwa buri kicweka, ceyamaani yaatushaba kushutama omu myanya yaitu ebyeshongoro bitakatandikire, tushemereire kureekyeraho kugaaniira reero tukashutama puroguramu etakatandikire.
3. Okutaho omutima kuhurikiza ebirikugambwa nikuhaisa kuta okuramya kwaitu ekitiinisa?
3 Okutaho omutima kuhurikiza ebirikugambwa nakyo nikihaisa Tataitwe ow’omu iguru ekitiinisa. Bwanyima y’okureeba ebyabaireho owaabo omu ruteerane rw’ebiro bishatu, omunyamakuru akahandiika ngu abaroreezi bakaatangaaziibwe “emicwe mirungi ey’abo abaabaire barurimu, oku baabaire nibahurikiza ebyabaire nibigambwa, boona bahunami, kandi orikukireeba ngu nibakunda eby’omwoyo.” Akagamba n’aha “mubaro gw’abaana ogutari gwa buriijo . . . , boona bacureire nangwa orikureeba bahamize nibasherura ebyahandiikirwe omuri Baibuli Erikwera.” Puroguramu yaaba neegyenda omu maisho, titushemereire kugaaniira, kwohereza obutumwa aha simu nari okugyendagyenda. Eminyeeto eshemereire kuba eshutami n’abazaire baayo kugira ngu abazaire babahwere kugasirwa ebirikugambwa. (Bir. 31:12; Enf. 29:15) Okuteeraho okwo nikworeka ngu nibaha abandi ekitiinisa kandi ngu nibasiima eby’okurya eby’omwoyo ebirikugaburwa.
4. Ahabw’enki tushemereire kureebeka gye twaba turi aha ruteerane orw’ebiro bishatu?
4 Endebeeka Erikuhaisa Ekitiinisa: Baingi bakasiima ebi baijutsiibwe omu rubazo “Yoreka Ekitiinisa ky’Obukristaayo Obwire Bwona,” aha ruteerane orw’ebiro bishatu omwaka oguhweire, omu kyayorekirwe ngu abaheereza ba Ruhanga bashemereire kuteeraho kworeka ekitiinisa ky’Obukristaayo omu njwara yaabo n’omu muringo gu barikwebonezamu. Omwaka ogu, tushemereire kugaruka tukata omutima munonga aha nshonga ezi. Endebeeka yaitu neeyoreka oku turikutwara Yehova hamwe n’omugisha gw’okuba Abajurizi be ogu twine. Butoosha tushemereire kujwara ‘nk’abarikweyeta abarikutiina Ruhanga.’—1 Tim. 2:9, 10.
5. Nitubaasa tuta kuguma nitureebeka gye n’omu bwire obundi twaba turi omu kicweka ekirimu oruteerane?
5 Tushemereire kureebeka gye twaba turi omu ruteerane bwonka? Ijuka ngu baingi omu kicweka ekyo ekirimu oruteerane nibaija kutureeba tujwire zaabaagi zaitu. Endebeeka yaitu eshemereire kutaana aha y’abandi. N’ahabw’ekyo, n’omu bwire obundi, ka tugire nka twaba nituza ei turaariire bwanyima ya puroguramu, tushemereire kujwara nk’abaheereza abaizire omu kicweka ekyo ahabw’oruteerane kandi titushemereire kujwara empare ngufu, emyenda ya giini, nari za tiishaati. Eki ka nikiija kuha abantu obujurizi! Yehova naashemererwa enjwara yaitu yaayoreka ngu turi abaheereza be.
6. Ni birungi ki ebirikuruga omu kworeka ekitiinisa nk’Abakristaayo?
6 Ebirungi Ebirikurugamu: Okworeka ekitiinisa nk’Abakristaayo omu nteerane empango nikituha omugisha gw’okubuurira kitaraariire, kandi kireetera abandi kututeekateeho gye. Aha muheru gw’oruteerane rumwe orw’ebiro bishatu, omukuru omwe akagira ati: “Titukareebahoga abantu b’emicwe mirungi abari nk’imwe. Muri nk’oku Ruhanga arikwenda ngu tube.” Okworeka ekitiinisa nikyoreka ngu nitukundana kandi kuhaisa Yehova ekitiinisa. (1 Pet. 2:12) Nikworeka ngu nitutiina Ruhanga kandi ngu nitusiima omugisha gu twine ogw’okwegyesibwa Tataitwe. (Heb. 12:28) Ka tuteereho kworeka ekitiinisa obwo tutegyereize Oruteerane orw’Ebiro Bishatu orwine omutwe “Kuratira Kristo!”
[Akabokusi aha rupapura 5]
Eby’Okweijutsya Ebirikukwata aha Ruteerane Oruhango
◼ Eshaaha za Puroguramu: Ebiro bishatu byona, puroguramu neija kuba neetandika shaaha 3:20 ez’omukasheeshe. Enyigi niziija kwigurwa shaaha 2:00 ez’omukasheeshe. Ebyeshongoro byatandika, twena tushemereire kushutama omu myanya yaitu kugira ngu puroguramu etandikye omu muringo ogw’ekitiinisa. Orwakataano n’Orwamukaaga puroguramu neija kuhendera shaaha 11:05 ez’omwabazyo kandi aha Sande ehendere 10:10 ez’omwabazyo.
◼ Ah’Okwemereza Ebiiruka: Omu myanya y’enteerane empango yoona, ahu tutungire ah’okwemereza ebiiruka, abaraabanze kwija nibo baraabanze kutunga ah’okubyemereza. Zaabaagi z’oruteerane nizo ziraabaasise omuntu kutunga ah’okwemereza ekiiruka kye. Obu omwanya gw’okwemerezamu ebiiruka gurikukira kuba gufunzire, abamwe baizire omu bya bataahi baabo nk’oku kirikubaasika.
◼ Okukwata Emyanya: Noobaasa kukwatira emyanya abu waija nabo nari abu orikutuura nabo bonka.
◼ Kyamushana: Nyabura ’we, ija na kyamushana yaawe, omu mwanya gw’okuza kugisherura ahandi omu shaaha za kyamushana. Noobaasa kureetera entanda yaawe omu kintu kikye eki orikubaasa kuta ahansi y’entebe. Ebintu ebihango, ebirikwatika, n’amaarwa tibirikwikirizibwa aha mwanya gw’oruteerane.
◼ Okuhayo: Nihashohora empiiha nyingi omu kuteebekanisa enteerane empango. Nitubaasa kworeka okusiima kwaitu turikuhayo twekundiire kushemba omurimo gw’Obukama ogurikukorwa omu nsi yoona, twaba turi omu Kyombeko ky’Obukama nari omu nteerane empango. Ceeki ezirikuheebwayo omu nteerane empango, zishemereire kuhandiikwa omu iziina ry’ekibiina eririkukoresibwa omu ihanga eryo.
◼ Zaabutandu: Haabaho orikwetenga obujanjabi obw’ahonaaho aha ruteerane oruhango, hikiirira omwe aha barikwakiira abantu oraahikiirire abarikukora aha by’obujanjabi omu ruteerane kugira ngu abakugu abo babaase kwetegyereza embeera ye kandi bamuhe n’obujanjabi oburikwetengyesa. Kyayetengyesa, omuntu ogwo naabaasa kutwarwa omu irwariro eriri haihi.
◼ Okukwata eby’Aha Ntambi: Ebintu ebirikukwata eby’aha ntambi eby’omuringo gwona tibishemereire kuteebwa aha mashanyarazi nari aha byooma ebirikukoresibwa omu ruteerane kandi omu kubikoresa tibishemereire kuteganisa abandi.
◼ Emigaju: Enteerane empango ezimwe niziba omu byombeko. N’ahabw’ekyo, nikiba kiri kirungi okutakoresa emigaju ey’amaani, erikubaasa kukora kubi abaine oburemeezi omu kwitsya.—1 Kor. 10:24.
◼ Obupapura bw’Okusheruriraho Abarikworeka ngu Nibenda Kumanya: Akapapura Please Follow Up (S-43) kashemereire kukoresibwa kuha ebirikukwata aha muntu weena oraayorekye ngu naayenda kumanya ebirikukiraho bwanyima y’okumubuurira. Ababuurizi bashemereire kwijana akapapura kamwe nari bubiri aha ruteerane. Obupapura obwo nibwija kuba buri n’aha mwanya gw’oruteerane ahu barikugabira ebitabo. Obupapura obwijuziibwe gye nibubaasa kuheebwa abarikukora aha kugaba ebitabo nari omuhandiiki w’ekibiina kyawe waaheza kugarukayo.—Reeba Our Kingdom Ministry, eya Febwari 2005 rup. 6.
◼ Hoteeri: Omu myanya mingi, n’ekya butoosha okusigira abarikukora omu hoteeri akasiimo kurugiirira aha ki baakukorera.
◼ Roogi: (1) Nyabura ’mwe mutakaakwatisa ebishengye ebi mutaraakorese, kandi mutakaarenga aha mubaro ogurikwikirizibwa kuraara omu kishengye kyanyu. (2) Kandi waahindura ebiteekateeko aha kuraara omu roogi egyo, oshemereire kubamanyisa kare. (3) Twara akagaari k’emigugu obu orikuba nooza kukakoresa bwonka, kandi waaheza, kagarure ahonaaho kugira ngu n’abandi bakakorese. (4) Mutakaatekyera omu bishengye kyaba kitarikwikirizibwa. (5) Sigira orikuboneza ekishengye akasiimo buri izooba. (6) Nk’Abakristaayo titurikwenda kukoresa kubi ebintu ebi aba roogi baraatuhe, nk’eby’okurya n’eby’okunywa. (7) Obwire bwona, mworekye ebyana by’omwoyo omu kukorengana n’abarikukora omu roogi. (8) Habaho oburemeezi omu kishengye eki murikuraaramu, reeba ngu mwamanyisa abarikukora aha by’oburaaro mwaba muri aha mwanya gw’oruteerane.