Nitushemererwa Okwejumba omu Murimo Gwa Yehova n’Obweziriki!

¹ Entumwa Paulo akashemererwa ‘kwehayo n’age goona’ ahabw’okuhikiiriza obuheereza bwe obw’Ekikristaayo. (2 Kor. 12:15) N’omu bunaku obu, Abakristaayo baingi nibakora n’obweziriki nka baapayoniya. Abandi abaine obujunaanizibwa bwingi omu maka gaabo nibatungayo akiire buri saabiiti beejumba omu kubuurira. Abamwe abaine amagara mabi nibakoresa amaani gaabo makye kwongyera omu maisho eby’Obukama. Ka nikigaruramu amaani okureeba abantu ba Yehova, ab’emyaka yoona, n’ab’embeera zitari zimwe na zimwe barikwehayo n’agaabo goona omu buheereza bwe!

² Okukunda Abataahi: Okukora kyona eki turikubaasa kuheereza Yehova, tutyo tukooreka rukundo ei twiniire Ruhanga n’abataahi, nikitureetera kugira omutima ogutarikweshinja. Ahabw’okugira ngu Paulo akabuurira amakuru marungi n’omutima gwe gwona, n’okushemererwa akabaasa kugira ati: “[Niimpamya] omu maisho ganyu mwena nti: Ndi mwere ahabw’eshagama y’abantu boona.” (Byak. 20:24, 26; 1 Tes. 2:8) Okubuurira nk’oku embeera zaitu zirikutubaasisa nikiija kutuhwera obutagiibwaho orubanja rw’eshagama y’omuntu weena.​—Ezk. 3:18-21.

³ Okukora n’amaani kuhwera abandi nikitureetera okushemererwa. (Byak. 20:35) Ow’eishe-emwe omwe akagira ati: “Omu mwabazyo, ku ndikugaruka omuka ahanyima y’okumara eizooba ryona omu buheereza bwa Yehova, n’amazima nimba nduhire. Kwonka nimba nshemereirwe, kandi niinyebaza Yehova ahabw’okumpa okushemererwa oku omuntu weena atarikubaasa kuunyihaho.”

⁴ Okukunda Ruhanga: Enshonga erikukirayo obukuru ahabw’enki turikwejumba omu buheereza bwa Yehova n’agaitu goona n’okugira ngu nikishemeza Tataitwe ow’omu iguru. Rukundo ei twiniire Ruhanga neetuhiga okworobera ebiragiro bye, ebirimu n’eky’okubuurira n’okuhindura abantu abeegi. (1 Yoh. 5:3) N’obu abantu baakuba batarikufayo nari baakutuhakanisa, n’okushemererwa, nitweyongyera kukorera Yehova n’agaitu goona.

⁵ Obu tibwo bwire bw’okuhwamu amaani. Turi omu bwire bw’igyesha. (Mat. 9:37) Omuhingi naakira kukora eshaaha nyingiho omu ishaaruura ahabw’okuba yaaba atakoreise obwira, ebihingwa nibisiisikara. N’obwire obw’okushaaruuriramu eby’omwoyo nibukye. Turikwijuka ngu turi omu bwire bw’eigyesha, twena ka tugume nitubuurira n’agaitu goona.​—Luka 13:24; 1 Kor. 7:29-31.